Danyeli 1

Danyeli de o badwonna bam taane

Danyeli na ke tei Babilon teo ne to

1Judah teo Pɛ Jehoyakim paare dim bena yatɔ bene dem ne mo Babilon teo Pɛ Nebukadeneza vei Jerusalem se o ke jara de-ba, ye o kaare teo kom maama o pu.#2 Pwa 24:1-2 2Baŋa Wɛ déem ma yage chwoŋa se o di Pɛ Jehoyakim. Pɛ Nebukadeneza ma pɛ Wɛ diga kam zela yadwonna o ja o viiri. O na jwoori o tete teo Babilon to mo o jaane Wɛ diga zela yam o zo o teo jwoni zula diga kam o tiŋi da.#2 Tigisim 36:7

3Pɛ Nebukadeneza déem jege nɔɔno dedoa na nii o nakwa maama baŋa ne. O yere maa ye Asepenaza. Pɛ wom ma pa‑o ni se o beeri Isarele tiina bam tetare ne balo ya na nwoŋi Judah teo pɛ sɔŋɔ kom ne, naa Judah tiina naduna badwonna wone to o pa‑o. 4Banto jege se ba taa ye nɔn-donno telo na lana fase ye gɛɛ tera ba yera ne to. Ba maa wó taa ye yi-pore-nyena balo boboŋa na dana se ba wane wonnu ba zamese to. Ba maa jege se ba taa ye balo na maŋe se ba toŋe Pɛ sɔŋɔ totoŋa to mo. Asepenaza nam mo wó zamese-ba se ba lɔre Babilon tiina taane dem se ba daare ba taa gare ba twanno.#2 Pwa 24:14 5Pɛ wom ma pa ni se dɛ maama wone, ba pa nɔɔna bam konto wodiu kolo wonto tete de o sɔŋɔ tiina na wó di to. Nɔn-donno tem nam jege se ba kwei bena yatɔ mo ba zamese lanyerane, se ba zamesem dem kwaga ne ba taa toŋe ba pae pɛ wom o sɔŋɔ kom ne.

6Judah teo nɔɔna balo ba déem na kuri to badwonna mo tento: Danyeli, de Hanania, de Misayeli, de Azaria. 7Nebukadeneza nakwa yiga tu wom déem ma jwoori o pa-ba yere-doora. O déem page Danyeli yere we, Bɛletesaza. Hanania yere maa ye Saderake. Misayeli maa ye Mesake, ye Azaria yere leiri de ji Abedenego.

8Danyeli ma ke o boboŋa ne se o yé biini o tete de pɛ wom wodi-laaro telo ba na pɛ‑o se o taa di to.#1:8 Juu tiina déem jege wodiiru chullu dwi dwi. O ma lwoori chwoŋa Pɛ nakwa yiga tu wom tei ne se o taa di wodi-gaa. 9Wɛ déem ma pa Asepenaza lage Danyeli ni taane pa se o duri o ŋwaŋa. 10De konto maama de, nɔɔno wom ta kɔre foone de pɛ wom mo. O ma ta de Danyeli we, “Amo tu Pɛ wom mo pɛ ni abam na wó ta‑á di wodiiru telo, de á na wó ta‑á nyɔ sana balo to. Abam ná lage á ta‑á di wodiiru tedwonna, ye ba ba ba maane we á yera ba zura ne á yuudwonna bam, Pɛ wom wó wane o chigili amo ba o de tega ne ko ŋwaane.”

11Asepenaza nam ya le nɔɔno mo se o taa nii Danyeli, de Hanania, de Misayeli, de Azaria baŋa ne. Danyeli ma yi o tei o ta ded‑o o we, 12“Pa se dé maane dé nii da fuga laŋa ne se n ta‑n pae debam dwo-vɔɔro yerane se dé taa di, de na-gaa se dé taa nyɔa. 13Da fuga ná yia, se n pa dé nwoŋi dé zege. Nmo ma‑n wó kwei debam ya-tega kam n maŋe de nɔn-donno telo tem na di pɛ wom wodi-laaro to ya-tega. Nmo yi laam ná nɛ kolo, se n ke dedaane debam ne ko na maŋe tei to.” 14Nɔɔno wom ma sɛ se o maane-ba da fuga baŋa ne o nii.

15Da fuga kam na yi to, ba ma nii ba na we Danyeli de o yuudwonna bam déem mo nugi lanyerane ye ba jege lam ba dwoi nɔn-donno telo na di pɛ wom wodiiru tem to. 16Wolo na nii ba baŋa ne to daa maa wo fe-ba se ba di pɛ wom wodi-laaro tem se ba daare ba nyɔ o sana bam. Dwo-vɔɔro yerane mo ba déem laam jege ba di.

17Wɛ déem ma pa nɔn-donno tena tento yi-poro de yeino, se ba wane ba zamese twanno de swa dwi maama. Ko woli da, Wɛ déem pɛ Danyeli boboŋa mo se o taa wae o maŋe veera de dendwa kuri chekke.

18Bena yatɔ yalo Pɛ Nebukadeneza na pɛ se ba ma ba bere nɔn-donno tem to ma yi. Asepenaza ma ja ba maama o ja o jeeri Pɛ wom yiga ne. 19Pɛ wom ma ŋɔɔne de-ba dedoa dedoa, ye o daare o bwei-ba bwia. O ma maane we nɔn-donno tem maama wone, Danyeli, de Hanania, de Misayeli, dedaane Azaria mo ke lanyerane ba dwoni wuu. O ma pa ni se ba taa bwola ded‑o ba taa toŋe ba pa‑o. 20Ba déem na wora to, pɛ wom ná lage se ba woli‑o de swa, o yeini o maane we nɔn-donno tem konto swa de ba yiyiu kɛ o yi-nara bam de o liri-keira bam maama swa mo kuni fuga laŋa ne. 21Danyeli déem maŋe pɛ sɔŋɔ kom ne mo o toŋe taa se ko yi maŋa kalo Pɛ Sarusi na bobo o di paare to.#2 Tigisim 36:22

Currently Selected:

Danyeli 1: KBG

Highlight

Copy