Amosi 7
7
Kayere taane
1Yuu-tu Baŋa Wɛ na le kolo o bere-ne to mo tento:
Dɛ dedwe ba na zage pɛ wom mena ba ti, ye kare sem wodiiru tedwonna ta wora te kwi to, mo Wɛ toŋe kayere se se ba se chɔge tega kam. 2Amo ma nii a na we kayere sem deilimi wo-lɛɔ dwi maama na wo tega kam ne to mo nyɔ! Amo laam maa we, “Yuu-tu Baŋa Wɛ, popo, yage n ma n chɛ n nɔɔna bam! Nmo ná wo ke konto, Jakob dwi dem daa bá wane ba wori, ba na tiini ba bwona to ŋwaane.”
3 Baŋa Wɛ ma sɛ ye o leiri o boboŋa. O maa we, “Nmo na nii n na tei to daa bá ke.”
Mini taane
4Yuu-tu Baŋa Wɛ daa na veere kolo o bere-ne to mo tento:
Amo nɛ we Yuu-tu Baŋa Wɛ boŋe se o tɔre min-lɔŋɔ o ma waare o nɔɔna bam. Mini dem ma di naneo kom maama nyɔ, ye de laam wora de di tega kam. 5Amo laam maa we, “Yuu-tu Baŋa Wɛ, a lwoori‑m se n yage! N ná wo yage konto, Jakob dwi dem daa bá wane ba wori, ba na tiini ba bwona to ŋwaane.”
6Yuu-tu Baŋa Wɛ daa ma leiri o boboŋa ye o we, “Nmo na nii n na tei to de daa bá ke.”
Lɔra ŋona taane
7Wɛ daa ta na le kolo o bere-ne to mo tento:
Amo nii a na kabira kalo lɔra bam na kwei ŋona ba ma lɔ-ka ba fɔge ba zege deiki to mo. A ta ma na we Baŋa Wɛ zege ka teiŋa ne ye o zei lɔra ŋona kam o jeŋa ne. 8Baŋa Wɛ ma bwei-ne o we, “Amosi, bɛ mo n nɛa?” Amo ma leiri a we, “Amo nɛ lɔra ŋona mo.”
O laam maa we, “Amo wó kwei lɔra ŋona kanto mo a maŋe a nɔɔna Isarele tiina bam se ko bere we ba ba zege chekke. Amo nam daa bá yage ba wɛleera a ma chɛ-ba. 9Amo lage a chɔge jei selo maama Izaak dwi tiina bam na diini ba ke kaanem to mo. Isarele tiina wara-jei selo na ye wose to maama wó ji di-dwonnu mo. Amo ta wó zaŋe a tɔge jara baŋa ne a chɔge Pɛ Jeroboam paare dem.”
Amosi dedaane Amazia taane
10Amazia déem ye kaanem tu mo Bɛtel ne. Wonto ma toŋe kwora o pa Isarele tiina pɛ Jeroboam o we, “Amosi jege nmo ta-balwaaro mo o ŋɔɔna debam Isarele tiina teo kom tetare ne. O ni taane dem lage de soge nɔɔna bam pa se ba lɔ nmo kwaga ne mo. 11O maa tɛ o we, ‘Jeroboam wó te jara wone, se ba daare ba ja Isarele tiina bam ba nwoŋi ba tete teo kom wone ba kale ba vo sa-teo kodwoŋi.’ ”
12Amazia laam ma toŋe o ta de Amosi o we “Wɛ ni-jwoŋinu, ko maŋe konto! Laam jwoori n vo n tete teo Judah, se n ta‑n pworisi dáane. Nmo ma‑n wó ta‑n nae n ni-wodiu da. 13Daa‑n yé pworisi Bɛtel ywo-seeni. Jei sento ye pɛ wom tete wara-jei mo, ye dé teo kom maama zuli da!”
14Amosi ma leiri Amazia o we:
“Amo maŋe a dae sampwora! A wo nwoŋi sampwori selo na pworisi ŋweero ŋwaane to kɔgɔ kom wone. Amo ye nayero mo! A maa kale a vara. A ta maa nii kaporro baŋa ne ye a pore kapera yam. 15Baŋa Wɛ ma le-ne a vara bam kwaga ne, ye o ta o we, a véi a pworisi a bere omo nɔɔna Isarele tiina bam.#Amosi 1:1
16Nam cheigi Baŋa Wɛ kwora kam!
Nmo mo tage n we,
a yé pworisi a chɔge Isarele tiina bam,
se a yé tɔɔle kwor-lɔŋɔ a pa-ba.
17 Baŋa Wɛ ni dem mo tento:
Amazia, nam lɔre se n kaane
wó ji ka-bworo
o taa kare teo kom ne
o beeri baara.
Nmo bia bam wó te jara wone,
bakeiri de busankane sem maama.
Ba maa wó pɔɔre nmo tega kam
ba pa nɔɔna badwonna.
Nmo tete nam wó te dwi-gɛ teo ne.
Ba maa wó seene ba ja
Isarele tiina bam ba nwoŋi
ba tete teo kom wone
ba kale ba vo sa-teo kodwoŋi.”
Currently Selected:
Amosi 7: KBG
Highlight
Share
Copy
Want to have your highlights saved across all your devices? Sign up or sign in
© 2020, Ghana Institute of Linguistics, Literacy and Bible Translation (GILLBT)
