Amosi 8

Tetɔgɔ na su de tio-bia to memaŋe

1Yuu-tu Baŋa Wɛ daa ma le woŋo kodwoŋi o bere-ne. Amo ma nii a na tetɔgɔ ye tio-bia na bege to ya su ko ni. #Jeremia 24:1-10 2O ma bwei-ne o we, “Amosi, bɛ mo n nɛa?” Amo ma leiri a we, “Tetɔgɔ mo a nɛa, ye ko su de tio-bia na bege to.”

Baŋa Wɛ laam maa we:

“A nɔɔna Isarele tiina bam kikia laam bege ya yi se a waare-ba. Amo nam daa yage ba wɛleera a ma chɛ-ba. 3Maŋa kam konto ná yia, pɛ sɔŋɔ wopwolo lei sem wó ji keira mo. Twa wó taa tigi teo kom jei maama ne, ye ba daare ba zeŋe-ba ba ja nwoŋi chemm.”

Yuu-tu Baŋa Wɛ mo tage konto.

Isarele tiina lɛɛro tem taane

4Abam balo na pini nabwona

ye á vere ba wonnu to,

ko woli de abam balo na yaare

á teo kom yiniga tiina

pa se ba chɔge ba ti to,

cheigi-na!

5Abam yeini á tɛ á we, “Dé lage se Wɛ siu dɛ dem naa chan-doŋa kuri dem ti lela se dé jwoori dé vo dé kwei dé mena yam dé taa yeiga. Dé maa wó kwei bwɛ selo na muri to dé ma pini dé yeilla bam dé jwoŋi ba sabia dedɛ. 6Dé ta wó kwei mena yalo na gwaane de swanno to dé laam yeigi-ya dé jwoŋi sabu dedɛ. Dé ta wae dé beeri yiniga tu wolo na ware o jene o ŋwe to, se dé yeigi kotu dé ma dé ji dé kabaa, o jene dem ná maŋe de mae de o naga natera yam yerane.”

7 Baŋa Wɛ na ye wolo Jakob dwi tiina na jege o teena to, o mɛ o tete yere mo o du duuri o we:

“Amo bere a bá fɔge a swei wo-balwaaro telo ba na kare ba ke to. 8Ba kikia yam konto wó pa se tega kam ziziŋi. Nɔɔna balo maama na zoore tega kam ne to wo maa wó chɔge. Tega kam jei maama wó ziziŋi ka zaŋe wɛɛne ye ka daare ka to, nenɛɛne Naili buga kam na yeini ka pɛɛle ye ka toe tei Ejipti ne to.”

9Yuu-tu Baŋa Wɛ ta ma ta o we:

“Maŋa kam konto ná yia, a lage a pa wɛ vo de zo wea tetare ne, pa se yibiri taa wo jei maama ne wea maŋa ne. 10A maa wó pipiri abam kura dim se ya leiri ya ji lwi. Á wopwolo lei sem de wó ji luseim. Abam wó zo gare-nyenyaaro, ye á daare á cheeri á yuni wo-chechɔgɔ ŋwaane. Á maa wó tiini á keeri se ko taa nye de nɔɔno na gɛ o bu-doa ye o keeri o bu wom lua tei to. De dɛ ná yia, ko wó tiini ko taa chamma ko pae abam!”

11Yuu-tu Baŋa Wɛ ta maa we:

“Nii-na! Maŋa lage ka yi ye a pa se kan-ware ba logo baŋa. Kana kam konto bá taa ye nɔɔna na gɛ wodiu se ba di naa ba gɛ na se ba nyɔ to ŋwaane. Ko nam wó taa ye we ba gɛ amo Baŋa Wɛ taane mo se ba ni. 12Tega kam jei maama ne mo nɔɔna wó taa kare ba lage Baŋa Wɛ taane se ba cheigi. Ko zege Yɛ naneo kom seeni se ko vo ko yi Mediterania naneo kom, ko ta woli de tega kam baŋa seeni de ka wɛ-puli seeni maama, ba wó beeri jei maama konto se ba nii ba ga wó ni Wɛ kwora mo ye ba nam bá na-ka.

13Kanto maŋa ne, na-nyɔm wó go abam nɔn-donno de busankan-pwoli tete. 14Ko ta ná ye balo na kwei Samaria jwona yam yera ba ma du duuri to, de balo na tɛ ba we, ‘Dan jwoni dem yere ŋwaane’, naa ‘Beeriseba jwoni dem yere ŋwaane’ to, nɔɔna bam konto wó to. Ba nam daa bá jwoori ba zaŋe wɛɛne.”

Currently Selected:

Amosi 8: KBG

Highlight

Copy