Amosi 6
6
Isarele dwi dem na wó na lɛɛro telo to
1Abam balo na zoore Zion ne
ye á di ywoni to,
lɛɛro yi abam!
Abam balo na zoore Samaria peo yuu ne de bochare-zuri to,
lɛɛro yi abam!
Abam pae á ye nɔn-kamuna
á te-fɔrɔ kom ne.
Isarele dwi tiina yeini ba tui abam tei ba lwoori wolim.
2Véi-na Kalenɛ teo kom
á nii ko na ye tei to.
Véi-na Hamafa te-fɔrɔ kom,
á daare á kɛ Gafa teo kom
Filisi tiina na zoore mɛ to.
Abam teene dem gare
teene dem konto na?
Abam laŋa kam yala ka dwoi
banto nyem na?
3Á ba jeini á jeeli we
chɔgem wó ba abam baŋa.
Abam kikia maama nam vaŋe lɛɛro dɛ dem mo
pa se de twɛa.
4Á yeini á ma tuu yeili
á kwɛ á gadworu tem
pa se te lana dedɛ.
Á laam maa tigi á konkwallo tem ne á sii ywoni yerane.
Á yeini á done pipeili nɔna,
de na-mɔre nɔna mo á sui.
5Abam swoi se á ta‑á leeni lein-doora,
ye á tae á kwanno,
nenɛɛne Pɛ David
déem na leeni tei to.
6Abam maa swoi se á ta‑á nyɔ sana dedɛ á sui.
Á maa yeini á kwei nu-ywoŋa kalo na jege kwora to
á ma á turi á yera.
Á yiga nam tera de Josɛf dwi dem na wora de chɔga tei to.
7Konto ŋwaane ba wó da yiga mo
ba ja abam
ba nwoŋi á teo kom wone
ba kale ba vo sa-teo kodwoŋi.
Abam yera na zoora tei to,
de á ywoni dem maama
wó jei mo bedwe baŋa ne!
8Yuu-tu Baŋa Wɛ dugi o tete yere ŋwaane o ta konto mo.
Paŋwa Tu Baŋa Wɛ maa we:
“A wo mo nwoŋi Jakob dwi dem de ba na pae ba tete kamunim tei to.
A yiga tera de ba sɔ-fwaaro tem!
Amo wó kwei ba teo kamunu kom#6:8 ba teo kamunu kom = Samaria
de ba jejegero tem maama
a ke ba dona jeŋa ne.”
9Nɔɔna fuga ná daare sɔŋɔ kolo wone ye ba seigi da, ba maama wó te. 10Too wom choro kolo na tu se o nii o lua totoŋa baŋa ne to ná zo sɔŋɔ kom se o kwei too wom o ja nwoŋi, o wó bwei nɔɔno wolo yerane na wori ye o seigi sɔŋɔ kom gugworo wone to o we, “Nɔɔno daa tɔge o wo nmo tei ne na?” Nɔɔno wom maa wó leiri o we, “Aawo!” Too wom choro kom laam maa wó ta we, “Yé ke sɔɔ! Yé zaŋe n bwoŋi Baŋa Wɛ yere, se o wó ni n kwora!”
11Nii-na! Baŋa Wɛ lage o pa ni mo,
se o pa sɔ-kamuna de sɔ-balwa
maama mumugi mura-mura.
12Sisein-nɔɔna wae se wurigi
peero gugworru ne na?
Ba nam wae ba kwei naane
ba vare naneo wone na?
Konto maama ware ko ke.
Abam nam pɛ se chega kam leiri
ka ji chɔŋɔ,
ye lanyerane keim ji wo-chɛɛre.
13Abam ta bere á tete we,
á mage jara de Lo-Debara teo kom á wane-ba.#6:13 Lo-Debara kuri mo ye Ko dae kolokolo.
Á ta kwori á we,
“Debam mɛ dé dam mo
dé di Karenayim teo kom!”#6:13 Karenayim kuri mo ye Naan-kware selei, se na bere dam-fɔrɔ to mo.
14Paŋwa Tu Baŋa Wɛ nam tage o we:
“Isarele dwi dem, amo lage a pa
teo kodwoŋi dwi tiina mo
zaŋe ba kwaare jara de abam.
Nɔɔna banto wó tiini ba bɛɛse abam
á tega kam maama wone,
ko zege Lebo-Hamafa ne,
se ko taa vei Araba nabara kam na wo mɛ to.”#6:14 Lebo-Hamafa wo Isarele laŋa kam baŋa seeni mo. Araba nabara kam maa wo ka tega-kuri seeni.
Currently Selected:
Amosi 6: KBG
Highlight
Share
Copy
Want to have your highlights saved across all your devices? Sign up or sign in
© 2020, Ghana Institute of Linguistics, Literacy and Bible Translation (GILLBT)
