Amosi 5

Isarele tiina na jege se ba leiri ba wo tei to

1Isarele dwi tiina bam, cheigi-na, se a lage a leeni abam lua luseim leiŋa mo:

2“Isarele dwi dem nye de busankan-pwola na to tega ne to mo.

O daa bá zaŋe.

O tigi tega ne

ye nɔɔn-nɔɔno yeiri ko ni ne,

se o ja‑o se o zaŋe.”

3Yuu-tu Baŋa Wɛ daa ta maa we:

“Abam teo dedoa ná pɛ nɔɔna morro

nwoŋi ba vo ba kwaare jara,

nɔɔna bi yerane mo wó jwoori

ye ba ŋwe.

Á teo kodwoŋi ná pɛ

nɔɔna bi nwoŋi,

nɔɔna fuga yerane mo wó jwoori.”

4 Baŋa Wɛ maa tɛ de Isarele dwi dem o we:

“Jwoori-na á ba amo tei

se á ta‑á ŋwe.#Izaya 55:6

5Nam yé ta‑á kare á beeri amo jei

Bɛtel ne.

Yé ta‑á véi-na Giligal.

Yé beeri-na á vo Beeriseba de.

Ko nam ná ye Giligal,

ba wó ja ko nɔn-bia

ba kale ba vo sa-teo kodwoŋi.

Ko ta ná ye Bɛtel tiina,

lɛɛro mo wó yi-ba.”

6Nam fɔɔre-na á yi Baŋa Wɛ tei

se á ta‑á ŋwe!

Á ná wo sɛ se á jwoori,

Wɛ bane wó zaŋe

Josɛf dwi dem baŋa ne,

ye o daare o chɔge-ba

ne mini na zwɛ wonnu tei to.

Bɛtel maama mo wó chɔge,

ye nɔɔn-nɔɔno bá wane o dwei mini dem.

7Lɛɛro wó ba abam baŋa ne,

á na yeini á pipiri chega kam

pa se ka ji vwa to ŋwaane.

Chega kam dae kolokolo

ka pae abam!

8 Baŋa Wɛ mo ke chalechwe

dwi dwi o tigisi daane.#5:8 chalechwe dwi dwi = Pleiades de Orion

Wonto mo pae se tete leiri

ko jiri te-pora.

O maa pae se wea jiri tete.

Wonto mo yeini o kwoori

naneero tem na bam

o jwoori o lwoi tega kam baŋa ne.

O yere mo Baŋa Wɛ.

9O yeini o pae se chɔgem tui

dedɛɛra baŋa ne mo lela,

ye o daare o chɔge ba dam jei sem.

10Abam nam chuli balo na di taane

de chega to mo,

á ta maa vae balo na tɛ chega to

ni taane.

11-12Abam bɛɛse yiniga tiina,

ye á fe-ba se ba kwei ba mena

ba ma ŋwe lampwoo dedɛ.

Amo yei abam wɛleera yam

na daga tei,

de á na tiini á chɔge

amo nia yam tei to.

Konto ŋwaane á bá ta‑á zoore

sɔ-fwaaro telo á na lɔge to wone.

Ko ná ye Vini teeni á na dugi

á kadwi sem wone

ye de tiini de lana to,

á daa bá nyɔ de tio-bia sana bam.

Abam daane nɔn-laaro

ye á fe-ba se á jwoŋi dim.

Á maa yeini á vere yiniga tiina

de ba bora.

13Konto ŋwaane, boboŋa tiina

wó taa ye chemm,

kokuri to, ko ye lwarem maŋa mo.

14Yage-na totoŋ-lwanno keim,

á daare á ta‑á ke wo-laaro,

se á ta‑á ŋwe.

Ko maa wó pa se Paŋwa Tu Baŋa Wɛ taa wo abam tei ne,

nenɛɛne abam na yeini á tɛ tei to.

15Ta‑á chuli lwarem á daare

á ta‑á swoi kolo na lamma to.

Á nakwa bam jege se

ba taa tɔge chega mo

de ba na di nɔɔna taane tei to.#Rom 12:9

Dɛ delo, Paŋwa Tu Baŋa Wɛ

wó duri á ŋwaŋa,

abam balo na daare

ye á ye Josɛf dwi dem to.

16Abam na tusi to ŋwaane, dé Teiru Paŋwa Tu Baŋa Wɛ na tage tei mo tento:

“Nɔɔna keira wó zaŋe

teo kom pwola maama ne.

Ba wó taa keeri ba we,

‘Lɛɛro! Lɛɛro!’.

Ba ta wó ware vala bam

se ba taa tɔge ba keera

ko woli de balo na wae luseim

ba leeni to.

17Wopwolo bá taa wo á kare sem maama wone,

keira yerane mo wó taa wora,

amo na wó tɔge abam tetare ne

a waare abam to ŋwaane.”

Baŋa Wɛ mo tage konto.

Baŋa Wɛ dɛ-kamunu kom taane

18Abam balo na jege teena

se Baŋa Wɛ borem dɛ dem

ba de yi to,

lɛɛro taa wo á yuu ne!

Bɛŋwaane mo á lage

se Baŋa Wɛ dɛ dem ba?

Dɛ dem konto wó taa ye yibiri mo

de pae abam,

se de bá ja pwooni de ba.

19Ko wó taa ye nenɛɛne nɔɔno ná duri se o lu nywoŋo jeŋa ne tei to mo.

O ma duri o vo o jeeri ga-naao#5:19 ga-naao = bear

na cheiŋi‑o to.

O ma daare o vo o yi sɔŋɔ se

o daŋe o jeŋa kabira baŋa ne,

ye tega-veilu laam done‑o

o jeŋa seeni!

20Chega to, Baŋa Wɛ borem dɛ dem

wó taa ye yibiri dedaane lim mo.

Pwooni bá taa wora de fenfee de.

Wɛ na chuli wonnu telo to

Baŋa Wɛ maa we:

21“Amo chuli abam na yeini á di

kura yalo maama amo ŋwaane to.

Amo yi ba sui de abam na jeeri daane se á zuli-ne tei to.#Izaya 1:14

22Abam ná jaane zwɛɛm pɛɛra

naa wodiu pɛɛra

se á ba á kaane á pa-ne,

amo bá jwoŋi-ya.

Ko ta ná ye vare-begela yalo

á na jege se á ke yazura kaanem

á pa-ne to,

amo yiga tera de-ya.

23Ja-na á tia lei sem á vo daa!

Se ye sɔɔ mo amo zwa wone.

Á ná kwei kwanno

se á ma á tei amo yere,

amo bá cheigi abam lei sem,

de se ná maŋe se ywomma

tei maama de.

24Nam pa-na se chega borem

de lanyerane keim taa wora

maŋa maama,

ne bu-dura na duri ka via

ye ka ba we tei to.

25Isarele dwi tiiina bam, bena finna yalo abam déem na wo kagoa kam wone ye á zuli-ne to, ko dae vara bam naa pɛɛra yam á na kwei á ma á ke kaanem á pa-ne to ŋwaane mo á ke konto. 26Abam laam nam jege á jwona yalo abam tete na mɔɔne-ya to á zeŋe á maa kɛa. Á maa bwoi ya dedoa we abam pɛ Sakuti. Dedwoŋi dem maa ye á jwoni Kayiwan, á na zuli-de ne chalechoa tei to. 27Á na zuli jwona yanto to ŋwaane, amo wó ja abam a nwoŋi á teo kom wone a kale a vo jei selo na gaale Damasika to.”#Kikia 7:42-43

Yuu-tu Baŋa Wɛ wom, o yere na ye Paŋwa Tu Baŋa Wɛ to mo tage konto maama.

Currently Selected:

Amosi 5: KBG

Highlight

Copy