Kikia 16

Pɔɔl de Silas de Timoti bere Wɛ chega kam

1Pɔɔl daa ta ma beeri o vo o yi Dɛɛbe de Lustera.#16:1 Nii map nyenyego kolo na wo tɔnɔ kom kwaga kam seeni to. Yezu tɔgeno wodwoŋi maa wora, o yere mo Timoti. O nu maa ye Juu tu ye o de sɛ Yezu.#2 Tim 1:5 O kwo maa ye Girisi tu.#1 Tim 1:1 2Yezu kɔgɔ kom nɔɔna balo na zoore Lustera ne de Ikonium ne to maa pae o ye nɔn-ŋom lanyerane. 3Pɔɔl maa lage se o ja‑o se ba tɔge daane ba taa beera. Juu tiina balo maama na zoore jei sem konto ne to maa yei we Timoti kwo ye Girisi tu mo. Konto ŋwaane Pɔɔl ma pa se o gwoni o peini ne Moses déem na bere Juu tiina bam se ba taa ke tei to. 4Ba laam ma zaŋe ba vo ba tole teene dem se ba nii Yezu kɔgɔ kom nɔɔna maama. Ba na beeri konto to, ba ma bere-ba nia yalo Yezu totoŋa nakwa bam de o kɔgɔ kom nakwa bam na tage Jerusalem ne to. Ba ma kwoori-ba se ba taa tɔge nia yam konto. 5Konto mo wɛ-di sem nɔɔna bam déem nɛ dam de ba Wɛ chwoŋa tɔgem, ye dɛ maama ba kɔgɔ kom puli ko ke da.

6Pɔɔl de o dwonna bam daa ma vo ba tole Firijia de Galatia te-nia yam wone, kokuri Wɛ Sin-laao kom déem mo chege-ba se ba yé vei ba bere Wɛ kwora kam Asia teene dem wone. 7Ba ma vo ba yi Musia siseini dem ni. Ba ma kwaane se ba zo Bitunia wo. Yezu Sin-laao kom maa wo pɛ-ba chwoŋa se ba zo da. 8Ba na kwaane ba ga konto to, ba ma yɔɔre ba tɔge Musia wo ba kɛ, ye ba vo ba yi Torase. 9Ba na yi da ye tega yi to, Pɔɔl ma dwɛ o na nɔɔno na zege o yiga ne. O maa ye Makedonia tu mo. O ma lwoori Pɔɔl o we, “Popo, zaŋe n tɔge naneo kom wo n bɛ se n woli debam Makedonia ne.”

10Pɔɔl na dwɛ konto to, debam ma ke lela dé ke siri se dé vo Makedonia, kolo ŋwaane dé maane we ko ye Wɛ mo bwoŋi debam se dé vo dé tɔɔle Wɛ kwor-ywoŋa kam dé bere nɔɔna jei sem konto ne.

11Dé laam ma kwei nabworo Torase ne dé yɔɔre dé vo dé yi Samotaraka. Tega na poore to, dé daa ma zaŋe dé tɔge naneo kom dé vo Niyapola. 12Dé laam ma zege dáane dé vo tega ne dé vo dé yi Filipi. Teo kom konto ye Makedonia kateiri dem teo kamunu mo. Rom tiina bam maa tei-ko. Dé ma ke da kɔgɔ kɔgɔ teo kom konto ne.

13Juu tiina siu dɛ dem na yi to, dé ma nwoŋi teo kom wo dé vo buga ni. Dé ya boŋe we jeiga wó taa wora dáane Juu tiina bam na yeini ba ware Wɛ da to. Dé na nɛ to, dé ma jeini tega ne ye dé ŋɔɔne de kaana balo na lage daane jei sem ne to. 14Kaane wodwoŋi déem tɔge o wora, o yere mo Lidia. O nwoŋi Tuatera mo, ye o kɔre Wɛ lanyerane. O maa jege gwaaro telo na tiini te jege nenɔŋa to o yeiga. Dé Teiru wom ma pa se o bochare sɛ wonnu telo Pɔɔl na jege o tɛ to. 15O déem ma ba o jwoŋi sɛɛm Yezu ŋwaane, de o sɔŋɔ tiina de. O laam ma zaŋe o lwoori debam o we, “Abam na sɛ we amo seene a ke a wo-dedoa dedaane dé Teiru Yezu to, se á ba á ta‑á zoore debam sɔŋɔ ne.” O maa wo sɛ se dé viiri.

Ba ke Pɔɔl de Silas peena diga ne

16Dɛ dedwe mo dé zaŋe dé maa vei Wɛ wara-jei sem. Dé na maa vei to, dé ma jeeri busankana kalo na ye nɔɔna kabaa to. Chichira déem maa tɔge‑o pa se o wae o pworisa. O na wuuri o bere wonnu telo na lage te ke konto to, o yuu tiina bam déem nɛ sabu dedɛ ko baŋa ne. 17O maa tɔge Pɔɔl de debam kwaga ye o baga o we, “Nɔɔna banto ye Yuu-tu Baŋa Wɛ tontoŋena mo. Ba tu se ba bere abam chwoŋa mo se á tɔge da á na verem.”

18O déem yeini o ke konto mo taa, da kɔgɔ kɔgɔ. Pɔɔl bane laam ma zaŋe. O ma pipiri o ta de chichira kam o we, “A ta de nmo Yezu Krista yere ŋwaane, nwoŋi o tei ne n kɛ!” O na tage konto to, chichira kam ma yage‑o bedwe baŋa ne.

19Busankana kam yuu tiina bam ma maane ba lɔre we ba daa ware ba na sabu o ŋwaane. Ba ma zi Pɔɔl de Silas ba vaŋe ba ja ba vo yaga ni ne se ba saŋe-ba dedɛɛra bam tei ne. 20Ba ma ja-ba ba vo ba pa Rom tiina dedɛɛra se ba di taane dem. Ba ma ta ba we, “Nɔɔna banto ye Juu tiina mo ye ba jege debam teo kom nɔɔna ba daana. 21Ba bere wonnu telo na chɔge debam chullu tem to mo. Debam nam ye Rom tiina mo ye dé bá wane dé sɛ banto na bere kolo to.”

22Kɔgɔ kom maama ma tɔge ba chiŋi Pɔɔl de Silas. Rom tiina dedɛɛra bam ma ja-ba ba vaŋe ba gwaaro tem ba kaare ye ba daare ba pa se nɔɔna fere-ba. 23Ba na tiini ba mage-ba konto to, ba laam ma ke-ba peena diga ne. Dedɛɛra bam ma ta de wolo na nii peena diga kam baŋa ne to se o fɔge o pe nɔɔna bam lanyerane.#2 Korinti 6:5 24Nɔɔno wom na nigi konto to, o ma pa se ba zo tetare diga kam wo ye o daare o ja ba nɛ o tore da-kwolo bɔɔna ne. 25Tega na kweere maŋa kalo to, Pɔɔl de Silas maa wora ba ware Wɛ ye ba leeni Yezu kɔgɔ kom lei ba zuli Wɛ. Peena badwonna bam maa jei ba cheiga. 26Tega kam laam ma pɔpɔ ka ziziŋi, ye peena diga kam sua se ko yi ka kuri maama. Diga kam bworru tem maama ma pɔpɔ te pore, ye chaponno tem kɔ peena bam maama yera ne. 27Nɔɔno wolo na yere diga kam to ma zaŋe ye o na peena diga kam na pore to. O ma boŋe we peena bam maama nwoŋi ba duri mo. Konto ŋwaane o ma le se-zɔɔ se o ma go o tete. 28Pɔɔl laam ma bage de o kwora maama o we, “Yé zaŋe n chɔge n tete, se debam maama wo ywoba.”

29Nɔɔno wom ma bwoŋi se ba ja mini ba pa‑o. O ma ke lela o zo diga kam o to Pɔɔl de Silas yiga ne, ye o yera sae de foone. 30O ma pa se ba nwoŋi pwooni, ye o daare o bwei-ba o we, “A nɔɔna bam, amo nam wó ke tɛ mo se Wɛ jwoŋi-ne o yage?” 31Ba ma leiri‑o ba we, “Nmo jege se n ke n wo-dedoa dedaane dé Teiru Yezu mo, se Wɛ wó jwoŋi nmo de n sɔŋɔ tiina bam de.”

32Ba ma daare ba ta Wɛ kwora kam ba bere o de balo maama na wo o sɔŋɔ kom ne to. 33Tete dem maŋa kam konto ne nɔɔ mo o jaane-ba o vo o zare ba fufwollu tem maama. O na ke konto o ti to, o de o sɔŋɔ tiina bam maama laam ma jwoŋi sɛɛm Yezu ŋwaane. 34O ma daare o pa se Pɔɔl de Silas zo o sɔŋɔ kom. O ma ke wodiu pa ba di. O na tu o sɛ Wɛ de wo-dedoa to, o maa jege wopwolo lanyerane, de o sɔŋɔ tiina bam maama de.

35Tega na poore to, Rom tiina dedɛɛra bam ma toŋe polisi tiina se ba vo peena diga kam ye ba we, “Yage-na nɔɔna bam se ba viiri.” 36Peena diga kam tu wom ma ta dedɛɛra bam na tage kolo to o bere Pɔɔl. O maa we, “Ba pɛ abam chwoŋa se á viiri. Véi-na de yazura.”

37Pɔɔl laam ma ta de polisi tiina bam o we, “Debam nam ye Rom teo jeŋa nɔɔna mo. Ba wo nɛ debam keim-balɔrɔ ye ba daa ta ja debam ba fere nɔɔna maama yiga ne, ba daare ba ke debam peena diga ne. Ba ya ba jege chwoŋa se ba ke konto. Bɛ mo ye ba laam lage se dé viiri chemm? Dé bá sɛ kɔtaa. Ba tete mo jege se ba ba ba le debam ba yage.”

38Polisi tiina bam ma vo ba ta Pɔɔl na tage kolo to ba bere Rom tiina dedɛɛra bam. Ba na lɔre we Pɔɔl de Silas ye Rom teo jeŋa nɔɔna to, foone ma zo-ba de ba na ke-ba tei to. 39Ba ma vo ba kwoori Pɔɔl de Silas se ba yage taane dem. Ba ma daare ba le-ba ba yage, ye ba ta-ba se ba nwoŋi teo kom wone ba viiri. 40Pɔɔl de Silas ma nwoŋi peena diga kam ne ba vo ba zo Lidia ba sɔŋɔ. Dáane mo ba jeeri dedaane Yezu nɔɔna bam ye ba ŋɔɔne de-ba, pa se ba su de dam. Ba laam ma zaŋe ba viiri.

Currently Selected:

Kikia 16: KBG

Highlight

Copy