Kikia 15

Yezu kɔgɔ kom ŋɔɔne dwi-gɛ tiina taane

1Nɔɔna badwonna ma zaŋe Judea ne ba vo Antioka. Ba na yi da to, ba maa wora ba bere Yezu nɔɔna bam ba we, “Abam ná wo sɛ á tɔge Moses nia yam na bere tei se á gwoni á peina, á bá wane á na verem.”#Chullu 12:3 2Pɔɔl de Banabas na nigi konto to, ba ma tiini ba mage ni-kantɔgɔ de nɔɔna bam. Konto ŋwaane Yezu kɔgɔ kom nɔɔna bam boboŋa ma ja se ba le Pɔɔl, de Banabas, de nɔɔna badwonna ba wone se ba ja taane dem ba vo Jerusalem ba ke Yezu tontoŋena bam de o totoŋa nakwa bam jea ne.

3Yezu kɔgɔ kom ma bane-ba ye ba kɛ. Ba ma vo ba tɔge Fonikia de Samaria jei sem. Ba na maa vei to, ba maa tɛ dwi-gɛ tiina na pipiri ba sɛ Wɛ tei to ba bere nɔɔna. Yezu tɔgena bam na nigi konto to, ko ma pa se ba maama jege wopwolo lanyerane. 4Ba ma vo ba yi Jerusalem. Yezu kɔgɔ kom maama, de ba nakwa bam, de Yezu totoŋa nakwa bam tete ma jeeri-ba lanyerane. Ba laam ma tole taane dem ba bere-ba Wɛ na dɛ ba ŋwaane o ke kolo to. 5Juu tiina badaara balo na wo Farisi tiina kɔgɔ kom wone ye ba ba ba sɛ Yezu to maa wora. Ba na nigi taane dem to, ba ma zaŋe ba ta ba we, “Nɔɔna banto jege se ba gwoni ba peina mo, se ba kwori ba tɔge Moses nia yam maama.”

6Yezu tontoŋena bam de o kɔgɔ kom nakwa bam ma la daane se ba bwɛ taane dem ba nii. 7Ba na ŋɔɔne konto dwoŋi taa to, Piita ma zaŋe ba wone o ta o we, “A nu-bia bam, abam yei we Wɛ déem kuri amo mo abam wone se a vo dwi-gɛ tiina bam tei se a tɔɔle o kwor-ywoŋa kam a bere-ba se ba daare ba sɛ-ka.#Kikia 10:1-48 8Wɛ nam yei nabiina bochara na ye tei to. O ma pa-ba o Sin-laao kom, ne o na maŋe o ke o pa debam tei to, se ko bere we o seene o jwoŋi-ba. 9O maa wo pɔɔre banto de debam daane. O fɔge o kwɛ ba bochara ba na ke ba wo-dedoa de Yezu to ŋwaane. 10Konto to, bɛ mo ke ye á boŋe se á maŋe Wɛ á nii de á na lage á pa Yezu tɔgena bam zeiŋi zela yalo na dumma ya dwoi-ba to? Ko ná ye dé nabaara bam naa debam tete, dé ware dé tɔge kikia yanto chwoŋa, ye á lage á pa banto tɔge-ka. 11Ko nam dae konto. Wɛ na jwoŋi debam o yage tei to tɔge dé Teiru Yezu zaane dem ŋwaane de dé na ke dé wo-dedoa ded‑o to mo. Ko ta ye bedwe mo de banto de.”

12Ba kɔgɔ kom maa jei ye ba cheigi sɔɔ se ba ni taane dem. Pɔɔl de Banabas ma zaŋe ba ta Wɛ na dɛ ba baŋa o ke wo-kenkagela de maana dwi-gɛ tiina bam tetare ne tei to. 13Ba na ŋɔɔne ba ti to, Jemsi ma zaŋe o ta o we, “A nu-bia bam, cheigi-na amo. 14Simon Piita maŋe o ta o bere debam Wɛ na bobo o veere o tete dwi-gɛ tiina bam tei ne se o le nɔɔna ba wone se ba taa ye o nyem tei to. 15Wɛ sampwori sem na tɔɔle kwora kalo faŋa faŋa to dedaane keim dento maama ye bedwe mo. Ko popone Wɛ tɔnɔ kom ne we:

16‘Ko kwaga ne amo Wɛ wó jwoori a ba

ye a fɔge a lɔ David sɔŋɔ kom na chɔge to.

Amo wó fɔge a kwɛ ko di-dwonnu tem

pa se ko jwoori ko ji sɔ-doŋo.

17Konto to, nabiina balo na daare to

wó kwaane se ba lɔre amo Baŋa Wɛ.

Dwi-gɛ tiina balo amo na le se ba taa ye amo nyem to

wó ba ba lɔre amo.

Yuu-tu Baŋa Wɛ mo tage konto

ye o pa se wonnu tem seene te ke.

18Faŋa faŋa to o pɛ se nɔɔna lɔre ko ni ne.’ ”#Amosi 9:11-12

19Jemsi ta ma ta o we, “Konto ŋwaane amo boŋe we, dé ba jege se dé daane dwi-gɛ tiina balo na tu ba sɛ Wɛ to. 20Dé nam na wó ke kolo to mo ye dé wó popone tɔnɔ mo dé pa-ba, ye dé bere-ba we ba yé di wodiu kolo nɔɔna na mɛ ba kaane jwona pa se ko wo maŋe de dim to, se ba daare ba ja ba tete de kabwoŋa kikia maama. Dé wó ta-ba se ba yé di varem wolo ba na jujugi ba go to, de woŋo kolo maama na jege jana to.#Chullu 3:17 21Kokuri ko zege faŋa faŋa ba maŋe ba ga Moses tɔnɔ kom Juu tiina jeerim di sem ne ba siu dɛ maama wone, ye nɔɔna yeini ba bere wonnu telo na popone da to teo maama wone.”

22Ba maama na ŋɔɔne daane konto to, Yezu totoŋa nakwa bam de o kɔgɔ kom nakwa bam boboŋa ma ja se ba le nɔɔna ba wone se ba tɔge de Pɔɔl de Banabas ba vo Antioka. Ba déem ma le nɔɔna balei balo na ye yiga tiina ba dwonna wone to. Ba dedoa yere mo Judas wolo yere dedwoŋi na ye Basaba to. Wodwoŋi wom yere mo Silas. 23Ba ma popone tɔnɔ se ba toŋe-ba de-ko. Ko maa we:

Debam balo na ye á nu-bia to, Yezu totoŋa nakwa bam de o kɔgɔ kom nakwa bam, dé jɔɔne abam, dwi-gɛ tiina balo na tu á sɛ Yezu ye á zoore Antioka ne, de Siria de Kilikia ne to.

24Debam maane we dé kɔgɔ kom nɔɔna badwonna mo zaŋe ba ba abam tei ba daane abam, pa se á boboŋa chɔge de kolo ba na bere abam to. Debam nam wo pɛ-ba chwoŋa se ba ke konto. 25Konto ŋwaane debam maama mo ke ni daane se dé le nɔɔna dé toŋe-ba abam tei ne, se ba tɔge de debam badwoŋ-swonnu Banabas de Pɔɔl ba ba. 26Banto balei ya mo dɛ toone tei ba kɛ de ba na toŋe ba pa dé Teiru Yezu Krista tei to. 27Debam nam mo le Judas de Silas dé toŋe-ba abam tei ne, se ba ba ba fɔge ba ŋɔɔne ba bere abam kolo dé na wora dé popone to. 28Wɛ Sin-laao kom dedaane debam mo jege boboŋe dedwe ye dé sɛ se dé yé daane abam dedɛ. Kolo yerane dé na wó ta de abam to mo tento: 29Á yé zaŋe á di wodiu kolo ba na mɛ ba kaane jwona to. Á yé di woŋo kolo na jege jana to. Á yé di varem wolo ba na jujugi ba go to. Á ja á tete de kabwoŋa kikia maama. Á ná jege á tete de wonnu tento maama, á wó ta‑á ke lanyerane. Wɛ wó pa abam yazura.

30Ba na popone konto ba ti to, ba laam ma toŋe nɔɔna bam se ba kwei tɔnɔ kom ba ja ba vo Antioka. Ba na yi da to, ba ma la ba kɔgɔ kom maama daane ye ba daare ba pa-ba tɔnɔ kom se ba ga. 31Nɔɔna bam na gage-ko to, ba maa jege wopwolo lanyerane de ko na fɔge ba boboŋa tei to. 32Judas de Silas maŋe ba ye balo na wae ba tɔɔle Wɛ kwora kam to. Ba déem tiini ba ŋɔɔne de nɔɔna bam pa se ba na pu-dɛa de baare. 33Ba na dáane ba tei ne konto to, Yezu kɔgɔ kom nɔɔna bam ma bane-ba pa ba jwoori ba vo balo na toŋe-ba to tei de yazura. [34Silas boboŋa ma ja se o maŋe jei sem konto ne.]

35Ko daare Pɔɔl de Banabas ma maŋe Antioka ne ba dáane da fenfee. Ba déem maa tɔge de nɔɔna dedɛ ba tɔɔle dé Teiru wom kwora kam ye ba bere Wɛ chega kam.

Pɔɔl de Banabas pɔɔre daane

36Ko na wora ko wora to, Pɔɔl ma ta de Banabas o we, “Pa se dé jwoori dé vo dé nii dé nu-bia bam teo maama wone dé na maŋe dé tɔɔle dé Teiru wom kwora kam mɛ to, se dé nii ko na ke-ba tei to.” 37Banabas ma sɛ ye o lage se Jɔn Maake taa tɔge dedaane-ba o toŋa. 38Pɔɔl ma boŋe we ko wo maŋe se ba ja‑o ba woli ba wone, kolo ŋwaane maŋa kalo ba déem na wo Panfilia ne to wonto yage-ba mo ye o daa ba tɔge-ba o toŋa.#Kikia 13:13 39Ba ma tiini ba mage ni-kantɔgɔ daane pa se ba pwɛ da-tei ne. Banabas ma ja Maake ye ba vo ba zo nabworo se ba vo Kupirus. 40Pɔɔl de ma kuri Silas se ba tɔge daane ba kɛ. Yezu kɔgɔ kom nɔɔna bam ma ke‑o dé Teiru wom jeŋa ne se o pa‑o zaane. O laam ma zaŋe o kɛ. 41O ma tɔge Siria de Kilikia wo, ye o pa se wɛ-di sem nɔɔna fɔge ba zege de dam.

Currently Selected:

Kikia 15: KBG

Highlight

Copy