Kikia 14

Ko na ke tei Ikonium ne

1Pɔɔl de Banabas déem ma vo ba yi Ikonium. Ba na wora to, ba yeini ba vei Juu tiina jeerim diga kam, ye ko ke-ba ne ko na maŋe ko ke tei to. Ba déem ŋɔɔne Wɛ taane dem ba bere nɔɔna bam pa se ba dedɛ ke ba wo-dedoa de Yezu, Juu tiina de dwi-gɛ tiina de. 2Ko daare Juu tiina badwonna ve Wɛ taane dem. Banto ma zaŋe ba vugimi dwi-gɛ tiina bam boboŋa pa se ba wo chɔge de Yezu nɔɔna bam. 3Pɔɔl de Banabas maa zoore da taa se ko dáane. Ba na wora konto to, ba maa ŋɔɔne dé Teiru wom taane de baare. Ba maa tɛ dé Teiru wom na ke nɔɔna zaane tei to, ye o zege ba taane dem kwaga ne de o na pɛ-ba dam se ba taa ke wo-kenkagela de maana tei to. 4Teo kom nɔɔna bam maama déem pɔɔre belei mo. Ba badaara tɔge Juu tiina bam mo, ye badaara bam de maa tɔge Yezu totoŋa nakwa bam.

5 Dwi-gɛ tiina de Juu tiina badwonna boboŋa laam ma ja se ba tɔge dedaane ba yiga tiina bam ba ke lwarem ba pa Yezu tontoŋena bam, se ba dole-ba de kandwa ba go. 6Ba na lɔre ko ni ne to, ba ma duri ba vo Lukayonia teene Lustera de Dɛɛbe, de de nawuura yam. 7Ba na wora to, ba ma yɔɔre ba tɔɔle Wɛ kwor-ywoŋa kam.

Ko na ke tei Lustera ne

8Nɔɔno déem mo wo Lustera ne ye o nɛ sem gwarege. Ko zege o lora maŋa ne o maŋe o ye gɔrɔ mo, o ware o vo. 9O déem maa tɔge o jei o cheigi Pɔɔl na ŋɔɔne taane delo to. Pɔɔl ma yɔɔre o nii‑o ye o lɔre we o jege wo-dedoa de Yezu se o wane o na yazura. 10O laam ma ta de kwor-dɛa o we, “Zaŋe wɛɛne n zege n nɛ sem baŋa ne yɔm!” O na tage konto to, gɔrɔ kom ma zaŋe wɛɛne o faŋe o chu ye o bobo veiŋa. 11Nɔn-kɔgɔ kom na nɛ kolo Pɔɔl na ke to, ba ma tiini ba ŋɔɔne baŋa baŋa de ba tete teo kom taane dem ba we, “Ko ye debam wa yam mo jigi nabiina ya tu ya ba debam tei.” 12Ba ma pa Banabas yere we Zeusa. Pɔɔl de yere maa ye Hɛmesi, kolo ŋwaane ko ye wonto ya mo ŋɔɔne taane dem.#14:12 Zeusa de Hɛmesi ye ba wa yam yera mo.

13Ba déem maa jege diga ba teo kom manchwoŋo ni ne ba na yeini ba kaane ba wɛ Zeusa da to. Ba kaanem yuu tu wom ma zaŋe o ja nabɛ de teeni punnu telo ba na sɔge to o ba o zege teo kom ni dem ne. Wonto dedaane nɔn-kɔgɔ kom maama déem maa lage se ba go nabɛ sem ba ma kaane Yezu nɔɔna bam. 14Yezu totoŋa nakwa Banabas de Pɔɔl ma lɔre ba na boŋe se ba ke tei to. Ba wo ma chɔge dedɛ. Ba ma ja ba tete gwaaro tem ba kaare kaare, ye ba daare ba duri lela ba zo nɔn-kɔgɔ kom wo. Ba maa tɛ baŋa baŋa ba we, 15“Nɔɔna bam, bɛ mo ye abam lage á ke konto? Debam ye nabiina mo, ne abam tete tei. Debam nam tu ywoba seeni se dé tɔɔle Wɛ kwor-ywoŋa kam mo dé bere abam, se ko pa á yage jwona kaanem, se á daare á ta‑á tɔge ŋwea tu Baŋa Wɛ. Wonto mo ke wɛyuu, de tega baŋa, de naneo kom, de wonnu telo maama na wo te wone to. 16Faŋa to Wɛ déem yage chwoŋa o pa logo baŋa dwi maama tiina se ba taa tɔge chwei selo ba na lage to. 17De konto de o ta yeini o ke abam lanyerane se ko pa á lɔre we o ye Wɛ chekke. O yeini o pa se doa nena ye wodiiru ke te maŋa ne. O maa pae abam wodiu ye á di, ye o pa se á na ywoni á bochara ne lanyerane.”

18Pɔɔl na tage konto to, ko ya gɛ fenfee mo se nɔɔna bam kwei wonnu tem ba ma kaane-ba, ye ba laam yage.

19Juu tiina badwonna ya nwoŋi Pisidia teo Antioka mo ba ba. Badaara de ma nwoŋi Ikonium ba ba. Banto ma pa se kɔgɔ kom maama boboŋa leiri de Pɔɔl. Ba laam ma dole‑o de kandwa ye ba daare ba tuuri‑o ba ja nwoŋi teo kom wone. Ba ya boŋe we o tege mo. 20Yezu tɔgena bam laam ma vo ba gilimi‑o. O ma zaŋe ba tetare ne o jwoori o zo teo kom wo. Tega na poore to, o ma tɔge dedaane Banabas ye ba vo Dɛɛbe.

Ba jwoori ba vo Antioka

21Pɔɔl de Banabas na wo Dɛɛbe ne to, ba ma tɔɔle Wɛ kwor-ywoŋa kam ba bere nɔɔna pa se ba dedɛ ji Yezu tɔgena. Ba daa ma jwoori ba vo Lustera de Ikonium, ye ba daare ba kɛ ba yi Antioka kolo na wo Pisidia wone to. 22Ba na maa vei konto to, ba ma pa se balo maama na ye Yezu tɔgena to boboŋa su de baare, ye ba kwoori-ba se ba fɔge ba taa tɔge Wɛ chega kam, se ba yé yage-ka. Ba ta ma bere-ba we, “Debam balo maama na sɛ Yezu to jege se dé na yaara dedɛ mo se dé daare dé zo Wɛ woro kom wo.”

23Jei selo maama ba na vei to, ba déem le nakwa Yezu kɔgɔ kom wone se ba taa nii-ba. Ba ma yeini ba lwoori Wɛ ba pa nakwa bam ye ba vɔ ba nia Wɛ ŋwaane. Ba tɔge konto dwoŋi mo ba fɔge ba ke nakwa bam dé Teiru wom jeŋa ne, o na ye wolo ba na ke ba wo-dedoa ded‑o to ŋwaane.

24Ba déem ma da Pisidia ni maama ba kɛ. Ba ma vo ba yi Panfilia jei sem. 25Ba na wora to, ba ma vo Pɛɛga ba bere Wɛ kwora kam da, ye ba daare ba vo Atalia. 26Ba laam ma zege dáane ba zo nabworo ba jwoori ba vo Antioka kolo na wo Siria wone to. Ko déem ye konto jei sem ne mo Yezu kɔgɔ kom nɔɔna bam ya kwei-ba ba ke Wɛ jeŋa ne se o ke-ba zaane se ba wane ba vo ba beeri ba toŋe kolo ba laam na tu ba ke ba ti to. 27Ba na yi Antioka to, ba ma pa se Yezu kɔgɔ kom la daane, ye ba laam tole ba bere-ba kolo maama Wɛ na tɔge ba ŋwaane o ke to, de o na pore chwoŋa o pa dwi-gɛ tiina se ba wane ba ke ba wo-dedoa de Yezu to. 28Ba maa zoore Yezu tɔgena bam tei ne taa.

Currently Selected:

Kikia 14: KBG

Highlight

Copy