Kikia 13

Yezu kɔgɔ kom le Banabas de Sɔɔl

1Yezu kɔgɔ kolo déem na wo Antioka ne to maa jege Wɛ ni-jwoŋina balo na wae ba tɔɔle Wɛ kwora ye ba bere o chega kam to ba wone. Banto mo ye Banabas, de Simeon wolo ba na bwoi we nazwono to, de Kurene tu Lukius, de Manayan wolo déem na ye yuudwoŋo dedaane gɔmena tu Pɛ Herodi to, dedaane Sɔɔl. 2Dɛ dedwe ba maa wora ba ke kolo na wó pa Baŋa Wɛ zula to, ye ba ta kwori ba vɔ ba nia Wɛ ŋwaane. Wɛ Sin-laao kom laam ma ta ko bere-ba we, “Abam jege se á le Banabas de Sɔɔl amo ŋwaane se ba taa ke totoŋe delo amo na maŋe a kuri-ba se ba ke to.”

3Yezu nɔɔna bam na nigi konto to, ba daa ta ma vɔ ba nia ye ba lwoori Wɛ ba pa-ba. Ba ma daare ba daŋe ba jea ba baŋa ne, ye ba laam bane-ba pa ba viiri.

4Wɛ Sin-laao kom déem na pɛ Banabas de Sɔɔl zaŋe ba kɛ konto to, ba ma vo ba yi Selukia. Ba ma zo nabworo ba tɔge naneo kom wo ba vo ba bɛ ba yi Kupirus. 5Ba ma vo ba zo Kupirus teo kodwoŋi, ko yere mo Salamis. Ba na wora to, ba maa zoore Juu tiina jeerim di sem ba bere Wɛ taane. Jɔn Maake maa wo ba tei ne o woli-ba.#Kikia 12:25

6Ba ma zaŋe Salamis ne ba tole jei sem maama ba kɛ. Ba ma vo ba yi Pafos. Ba ma jeeri liri tu wodwoŋi dáane, o yere mo Ba-yezu, ye o ye Juu tu. O déem pɛ se o ye Wɛ sampwora mo ye o dae. 7O maa ye gɔmena tu Sɛgiu Pɔɔla kwaga nɔɔno mo. Gɔmena tu wom maa ye yi-pore-nyem. O ma bwoŋi Banabas de Sɔɔl se ba ba o tei. O maa lage se o ni Wɛ kwora kam. 8Liri tu wom ma zaŋe o wora o tɔne ba berem dem. O maa kwaane se o che gɔmena tu wom se o yé sɛ Wɛ chega kam. Liri tu wom yere dedwoŋi mo ye Elumas de Girisi tiina taane dem. 9Sɔɔl yere dedwoŋi daa ta maa ye Pɔɔl. Wɛ Sin-laao kom maa wo o tei ne ye ko dam su‑o lanyerane. O ma yɔɔre o nii liri tu wom ye o we, 10“Nmo ye setaana pɛ jeŋa nɔɔno mo. Nmo chuli wonnu telo maama na lana to. Nmo kwaane se n ma n swa n gane nɔɔna mo. Nmo yeini n kwaane se n pipiri dé Teiru wom chega kam se ko taa ye vwa. 11Nii, Baŋa Wɛ wó ba o waare nmo de o je-dɛa leile konto. Nmo wó ba n ji lilwei ye n daa‑n bá‑n na wea pwooni se ko taa vei maŋa kalo Wɛ na lage to.”

O na tage konto to, bedwe baŋa ne mo Yɛlumas yia yam dwei ya ji lim yerane. O maa kare o kekara ye o lage vaŋeno se o ja o jeŋa. 12Gɔmena tu wom ma na kolo na ke to. O laam ma ba o ke o wo-dedoa de Yezu. Dé Teiru wom chega kam ba na bere‑o to ma kagele‑o.

13Pɔɔl de o badwonna bam laam ma zaŋe Pafos ne ba zo nabworo ba vo ba yi Panfilia teo kodwoŋi, ko yere mo Pɛɛga. Jɔn Maake ma yage-ba dáane ye o daare o jwoori Jerusalem.#Kikia 15:38 14Ba daa maa zege Pɛɛga ne ba vo Antioka kolo na wo Pisidia ne to. Juu tiina siu dɛ dem na yi to, ba ma vo ba zo ba jeerim diga kam wo ba jei da. 15Nɔɔna ma zaŋe ba ga Moses de faŋa faŋa Wɛ sampwori sem twanno tem wone. Ba na gage ba ti to, ba yiga tiina bam ma toŋe ni ba pa Pɔɔl ba ye ba we, “Dé nu-bia bam, abam ná jege taane delo na wó fɔge nɔɔna bam to, se á zaŋe á ta.” 16Pɔɔl ma zaŋe wɛɛne o zeiŋi o jeŋa ba baŋa ne, ye o laam daare o ta o we:

“Amo dwonna Isarele dwi tiina bam dedaane dwi-gɛ tiina balo na tu á sɛ Wɛ to, cheigi-na amo. 17Isarele tiina bam Wɛ wom déem le dé nabaara bam se ba taa ye o nyem. Maŋa kam ba déem na ye veira Ejipti ne to mo Wɛ pɛ se ba puli lanyerane. O ma daare o ma o tete je-dɛa kam o le-ba pa ba nwoŋi teo kom konto ne. 18Ba na beeri kagoa yuu ne taa, bena finna to, o ma peene o bane de-ba. 19Ba na zo Kanaan to, o ma pa se logo kom dwia yera yera kuni berepɛ na chɔgem, ye o daare o pa se o tete nɔɔna Isarele tiina bam taa tei tega kam konto. 20Konto keim dem maama ye nenɛɛne bena bia yana de finnu (450) mo.

Konto kwaga ne, Wɛ laam ma kuri dedɛɛra o pa-ba ye banto tei-ba taa, se ko yi maŋa kam o sampwora Samuwel na tu o ba o tei-ba to. 21Nɔɔna bam laam ma lwoori Samuwel se o tiŋi pɛ o pa-ba. Wɛ ma tiŋi Benjamin dwi tu dedoa o pa-ba, o yere mo Sɔɔl. O maa ye Kisi bu. O ma di paare bena finna. 22Wɛ déem ma ba o le Sɔɔl paare dem wone, ye o daare o pa se David ji ba pɛ. Wɛ déem tage wonto taane o we, ‘Ko ná ye Jesse bu David, o ye nɔɔno wolo kikia na dɛ amo wo to. Wonto wó ke kolo maama a boboŋa na lage to.’#Lei 89:20

23Ko maa ye wonto dwi dem wone mo Wɛ pɛ Yezu zaŋe o ba. Wɛ ma tɔge ni delo o na tiŋi o pa o nɔɔna bam to o pa Yezu ba o ji debam Isarele tiina bam Vereno.#Izaya 11:1 24Maŋa kam Yezu ta na wo bobo o totoŋa yam to, Jɔn déem mo bere Isarele tiina bam maama o we, ba leiri ba wo de ba wɛleera yam, se ba daare ba jwoŋi sɛɛm Wɛ ŋwaane. 25Ko ta na daare fenfee se Jɔn ti o totoŋa yam to, o ma bwei nɔɔna bam o we, ‘Abam boŋe we amo ye wɔ mo? Amo dae wolo wom á na jege o teena to. Wonto nam lage o saŋe amo kwaga o ba, ye amo wo maŋe se a bwoli o nɛ natera de.’

26Amo nu-bia bam, Abaraham dwi tiina, de dwi-gɛ tiina balo na tu á kɔre Wɛ to, ko ye debam mo Wɛ pɛ se dé ni o taane dem konto se dé wane dé lɔre o na lage o jwoŋi debam o yage tei to. 27Jerusalem tiina bam de ba yiga tiina bam nam wo lɔre Yezu na ye wolo to. Ko daa ta ná ye wonnu telo Wɛ sampwori sem na popone ba tiŋi ye nɔɔna yeini ba gare-te ba siu da yam maama ne to, ba ba ni wonnu tento kuri de. Ba nam na pɛ se Yezu na chɔgem to, ko pɛ se Wɛ sampwori sem na popone kolo to seene ko ji chega. 28Ba maa wo nɛ taane delo na wó pa se ba go‑o to. De konto de, ba ta ma lwoori Pilata se o pa o te. 29Ba ma ke kolo maama na maŋe ko popone Wɛ tɔnɔ kom ne ye ko ta o taane to ba ti. O na tege to, ba laam ma pare‑o dagara kam yuu ne ba daare ba ke‑o yibeeli wone. 30Wɛ laam ma pa o bi toone wone. 31O maa wora da kɔgɔ kɔgɔ. O na wora to, kuni dedɛ mo o veere o tete o tɔgena bam yia ne. Balo ya na tɔge ded‑o Galili ne ba beeri ba vo Jerusalem to mo konto. Banto laam zege o chega kam kwaga ne ba pa debam Isarele tiina bam.

32Debam laam tu abam tei se dé ta Wɛ kwor-ywoŋa kam dé bere abam. Ko maa ye we, Wɛ déem na pwooli de dé nabaara bam we o wó ke kolo to mo 33o laam seene o ke o pa debam balo na ye ba naaro to. Ko ye o bi Yezu toone wone mo konto. Ko ta ye nenɛɛne ko na maŋe ko popone Wɛ Seinim Lei tɔnɔ belei tu wone to ye ko we:

‘Nmo mo ye amo Bu,

ye zem amo de ji nmo Kwo.’#Lei 2:7

34Wɛ tɔnɔ kom daa ta bere Wɛ na wó bi‑o toone wone pa se o yera daa bá pɔ to. Ko maa we:

‘Amo wó pa se n na wo-laaro telo na ye chekke

ye a maŋe a tiŋi ni se a pa David na-te to.’#Izaya 55:3

35Wɛ tɔnɔ kom jei sedwoŋi ne ko popone we:

‘Nmo bá‑n sɛ se n tete Wo-pwoŋo Tu wom yera pɔ.’#Lei 16:10

36Ko nam ná ye David tete, wonto déem toŋe Wɛ totoŋa yam maŋa kalo o na ŋwe to ye o laam ba o te. Ba ma kwei‑o ba suli o nabaara bam tei ne. O yera ma seene ya pɔ. 37Ko daare wolo wom Wɛ na pɛ o bi toone wone to, wonto yera nam wo pɔge kɔtaa.

38A nu-bia bam, abam jege se á lɔre we ko ye Yezu ŋwaane mo dé jege chwoŋa se dé bere abam we, Wɛ wó wane o yage á wɛleera o ma chɛ abam. 39Wɛ nia yalo o na ke Moses jeŋa ne to ware ya pa á wɛleera yam saare. Ko daare wolo maama na ke o wo-dedoa de Yezu to wó na bora Wɛ tei ne, de o wɛleera yam maama na saare wonto ŋwaane to. 40Nam ta‑á yei-na á tete ni ne, se lɛɛro telo Wɛ sampwori sem na popone te taane to yé seene te ke abam baŋa ne. 41Ba déem we:

‘Nii-na, wɛ-lwɛɛna bam,

abam yera wó sɔɔre ye á daare á te.

Kolo ŋwaane amo lage a ke woŋo abam da yam wone,

ye nɔɔno ná maŋe o bere abam ko kuri tei maama de,

á bá sɛ we ko ye chega’ ”#Habakuki 1:5

42Pɔɔl na tage konto o ti to, o de Banabas ma zaŋe se ba nwoŋi jeerim diga kam wone. Ba na lage ba viiri to, nɔɔna bam ma ta de-ba se ba jwoori ba siu dɛ dedwoŋi dem ne, se ba daa ta wonnu tem konto taane. 43Nɔɔna bam ma zaŋe ba jage se ba vo sam. Ba dedɛ ma tɔge Pɔɔl de Banabas, Juu tiina de dwi-gɛ tiina balo na tu ba sɛ Wɛ to de. Pɔɔl de Banabas maa tɛ de nɔɔna bam se ba taa kwaane ba dale Wɛ, de zaane delo o na ke ba yuu ne to.

44Ba siu dɛ dem ma jwoori de yi. Nɔɔna dedɛ ma la daane se ba cheigi Baŋa Wɛ kwora kam. Ko déem nye de ko ye teo kom nɔɔna maama mo jeeri da. 45Juu tiina bam na nɛ kɔgɔ kom na su jei sem maama to, ba maa tiini ba jege puseŋa de-ba. Ba ma yaale Pɔɔl na tɛ kolo to ye ba kwori ba twe‑o. 46Pɔɔl de Banabas laam fɔge ba ŋɔɔne de baare ye ba we, “Dé ya jege se dé bobo abam tei ne mo dé ŋɔɔne Wɛ kwora kam. Abam nam na maŋe á wo sɛ-ka to, ko bere we á ba boŋe se á maŋe de Wɛ ŋwe-doŋa kam. Konto ŋwaane mo dé laam wó vo dwi-gɛ tiina bam tei dé daare abam. 47Dé Teiru Baŋa Wɛ na pɛ debam o ni tei to mo tento:

‘Amo tiŋi nmo se n ji pwooni

n nye dwi-gɛ tiina bam baŋa ne,

se n wane n pa nabiina na verem

logo baŋa jei maama ne.’ ”#Izaya 49:6

48 Dwi-gɛ tiina balo na wora to na nigi konto to, ba maa jege wopwolo ye ba pa se Baŋa Wɛ kwora kam jege dam. Balo maama Wɛ na kuri se ba na o ŋwe-doŋa kam to mo seene ba ke ba wo-dedoa de Yezu.

49Baŋa Wɛ kwora kam ma jage laŋa kam konto maama wone. 50Ko daare Juu tiina bam ma kwaane ba pa se nɔɔna bane zaŋe de Pɔɔl de Banabas. Ko ná ye kaana balo jeŋa na gare ye ba kɔre Wɛ to, de teo kom dedɛɛra bam, ba déem pɛ se ba yaare Pɔɔl de Banabas, ye ba daare ba zeili-ba pa ba nwoŋi ba teo kom ne. 51Ko na ke-ba konto to, Pɔɔl de Banabas ma kokɔge ba nɛ fwogo kom ba yage da se ba kaane nɔɔna bam.#Maake 6:11 Ba laam ma daare ba vo Ikonium. 52Yezu tɔgena bam déem tiini ba di ywoni. Wɛ Sin-laao kom maa wo ba tei ne ko su-ba lanyerane.

Currently Selected:

Kikia 13: KBG

Highlight

Copy