Mataio 22

Parabole o ipi ua laeaita sosoka vei

(Luka 14:15–24)

1Iesu parabole o ata topiari erero mō ōpe, 2Kauri ve basileia are usoso eva‐e sosoka la areve atute vei leipe lea lohio karu rovaea feare. 3Are areve sarufa karu la itapi sosoka lari vei o moipe lea karu la koti o moi vei, a—, ere koti haiarara leipe. 4Soka are sarufa karu haria la ata itapi mō ōpe, Sosoka lari vei o moia lea karu la mō moia, Mapaia, arave larietau roroka loita meha, arave boromakao aea tapare leiti vei savuaita animala ita la savi, aea etau foromai kekese lei laisisea; eva‐e sosoka vei kotiria. 5A—, ere haiarara lei, maea lei, farakeka areve forōva oti voa kavōpe, farakeka aea areve tivi oti voa terōpe. 6Lea karu hohoi hea areve sarufa karu la sukafori ivara eokere ita erero toa paeōpe. 7Soka lea lohio karu kitou lei, areve maola karu firu itapi aea areve sarufa la paeōpe karu la saroroapi, ereve karikara ta a sa vifaipe. 8Aite are areve sarufa karu la mō ōpe, Eva‐e sosoka kekese loita meha, a—, omopa isaia lea karu ere lareva kao. 9Otiharo lakalaka voa teraia, aea e eavaita lea karu foromai eva‐e sosoka voa koti vei o moia. 10Lō mei, lea sarufa karu maria otiharo voa te ere eavaiape karu foromai, lareva ita maealolo ita la kokoruka, eva‐e sosoka ve avai oti foromai soōpe reha.

11Soka lea lohio karu sosoka lari karu la ofae eavai vei oropōpe lea mea, are eva‐e sosoka puta mopai auke karu farakeka la lōvoa ofae eavōpe. 12Eovi are arero mō ōpe, Moraitai e, a eva‐e sosoka puta mopai auke lei a mōvoa leafeare lei oropai? A—, lea karu ape o forerai kasirau. 13Soka lea lohio karu sarufa karu la mō ōpe, Arero mora ita mai ita fasi, arero maria murumuru voa toapaia; lōvoa ere fi a’ a’, tao ta karekare ari roi.#Mat 8:12; 25:30; Luk 13:28 14Ipi rauapo la koti vei isaitore, a—, haikaea maravaita karu fafareso sa haria.

Kaisara la miaraita takis moni

(Mareko 12:13–17; Luka 20:20–26)

15Soka Farisea karu hea te laua seseōvai vei, ere areve laua sa fitōva feare feravi arero paeai vei. 16Aea ere ereve satiriaraita karu, Heroda ve firu karu hea ita la Iesu tai itapi mō ōpe, Satiriaraita papuvita e, ela ore a okofa vita, aea Ualare sa haikaeaita mai la okofa ita la satiriara vovea, a karu sa aro leita mai ve eite la seseōvai sore, aeata a karu ve soso o ari sore. 17Soka elaro o moia, mai haura leavoa? Takis moni Kaisara la miaraita haura ei, ō haura kao ei? 18A—, Iesu ereve haiiri maealolo la ore lei, mō ōpe, Aiera‐aiera karu e, e araro seseōvaipeta ipi levea? 19Takis moni koru aea la araro muiaia. Lō mei ere silva moni koru farakeka la arero tai ovitipe. 20Soka are erero mō ōpe, Mea ove ita karoro ita leive? Ere arero mō ōpe, Kaisara ve. 21Soka are erero mō ōpe, Kaisara ve etau Kaisara la miaraia, aea Ualare ve etau ta Ualare la miaraia. 22Ere areve lea o la mapi, haihava lei, arero kiripi terōpe.

Opi ata itoita soa vei

(Mareko 12:18–27; Luka 20:27–40)

23Lea sare voa Sadukea karu, opi ata levi itoi o la satiriaraita lea karu hea, ere arero tai foreri arero lalasi lei mō ōpe,#Apos 23:8 24Satiriaraita papuvita e, Mose mō ōpe, Karu aea, atutemori auke ita opaita, a—, areve marehari areve ua lelesi la laeaia, mere la lei epi areve paua ve rare ari vei.#Deut 25:5 25Ela voa paua ita maraiosu ita seven pepeiape. Omopa paua ua laea pepe opōpe, aea ipi are atutemori auke eavia, are areve ua lelesi areve marehari sa laeai vei kiripōpe. 26Aite vita ta lōfeare, aea aite kofa vita ta lōfeare lei lei tetete seven voa. 27Aite kofa voa lea ua ta opōpe. 28Soka opi ata itoita soa voa lea karu seven voa arero leisa ovai roi? Ipi ere foromai arero laeaiape eavia.

29Iesu tava o erero mō ōpe. E eve haiiri voa eae seseōvaipea, ipi e Safu Karoro ore kao, aea Ualare ve siahu ta haveva. 30Ipi karu opi ata itoita soa voa, ere ua ita vitaita levi laeai roi, a—, ere usoso kauri ve aneru fefeare lei pepeava roi. 31A—, ipi opi ata itoita mai vei, e Ualare sa ero moipe o la muti sore ei? Ualare ve o meha. 32Ara Abrahama ve Ualare, aea Isako ve Ualare, aea Iakobo ve Ualare. Lea o ve eite lea karu ere makuri, ipi are opaita karu ve Ualare kao, a—, makuri karu ve Ualare.#Eso 3:6 33Soka karu sitavu lea o la mapi, ere areve satiriaraita o vei haihava leipe.

Toare Safu O vei

(Mareko 12:28–34; Luka 10:25–28)

34Soka Farisea karu Iesu sa Sadukea karu ve o la sapataipe fari la mapōpe lea mea, ere kokoruka, 35aea ere voa, Safu O la ore vita farakeka arero vuteai vei lalasi mō leipe,#Luk 10:25–28 36Satiriaraita papuvita e, Safu O rovaeka leafeare? 37Iesu arero mō ōpe, A Iehova ave Ualare la ave haiiri foromai ita aea ave haikaeaita haiiri foromai ita, aea ave ore leita haiiri foromai ita arero haikakare arai vei.#Deut 6:5 38Safu O rovaeka reha aeata toare safu o. 39Aite safu o are ta lōfeare, A ave haekao peita karu la usoso ave elore maea feare haikakare araia.#Levi 19:18 40Lea Safu O oraka voa, safu o foromai aeata peroveta o foromai topiari sisea vovea.

Lalasi o ipi Davida ve Atute vei

(Mareko 12:35–37; Luka 20:41–44)

41Soka Farisea karu kokorukōpe lea mea, Iesu erero lalasi mō leipe, 42E Keriso vei eve haiiri leafeare seseōvaipea? Are leive atute? 43Ere arero mō ōpe, Davida ve. Are erero mō ōpe, Soka ipi levea Davida Arahoha ita arero rare Papuvita rare aravi, mō ōpe,

44Papuvita Iehova are arave Papuvita la mō ōpe,

Arave mai toare voa avaia

tetete ara ave ote karu la ovi, ave mora posa ve ora voa miavai ao.#Sal 110:1

45Soka Davida arero Papuvita rare aravaita, a—, are areve atute leafeare leitita ore ei? 46Soka karu farakeka aea arero tava o moita ore kao; aea lea sare ve aite voa karu aea arero lalasi o aeata omoi vei ivara leiti kasirau.

Currently Selected:

Mataio 22: TQO1983

Highlight

Copy