Mataio 23

Safu Karoro ore karu aeata Farisea karu ve mai maealolo

(Mareko 12:38–40; Luka 20:45–47)

1Aite Iesu karu sitavu areve satiriaraita karu ita la laua mō sukavōpe. 2Safu Karoro ore karu, Farisea karu ita ere Mose ve kiriposa voa aipepea vovea. 3Lea vei ere ero moita lea o foromai la kakeva leitia. A—, ereve mai feare levi leitia, ipi ere o sa moi vovea, a—, eite leiti sore. 4Ere foia pasou la fasi karu ve soro voa miava vovea, a—, ere elore mai lakoka farakeka sa lea foia la fareovai vei haikeai sore. 5Ere ereve leita mai foromai la karu sa ofae eavai vei lei vovea; ere ereve harihari voa fasaita Safu Karoro o ita etau la lei pisasa lei, ereve puta fufusi fufusi ta lei sosovori leititore.#Mat 6:1; Num 15:38; Deut 6:8 6Ere toare oti sosoka soasoa voa, aea avaita toare posa sunako uvi voa ta avai haikaeai vovea; 7aea karikara pisiri otioti voa arero marase arita o la mapai vei, aea karu ta erero satiriaraita papukoru rare aravai vei haikaeaitore. 8A—, e voa, ero rare satiriaraita papukoru rare levi aravaia. Ipi eve Satiriaraita Papuvita farakeka haria meha, aea e foromai paumarehari reha. 9Aea mearovaeka voa karu aea la oa rare levi aravaia; ipi eve oa farakeka haria, kauri Oa reha. 10Ero rare lariōvaita harofave vita rare levi aravaia, ipi ero lariōvaita harofave vita farakeka haria, Keriso meha. 11E voa rovaeka kofa vita are eve tivi karu leiti vei.#Mat 20:26–27; Mak 9:35; 10:43–44; Luk 22:26 12Areve elore maea la moravaita lea vita la ipi voa sukavutea faukai roi, a—, areve elore maea la ipi voa leita lea vita la moravi arori voa patai roi.#Luk 14:11; 18:14

13Ahai‐e e vei, Safu Karoro ore karu aea Farisea karu, aiera‐aiera karu e! Ipi e kauri ve basileia ve utape la karu ve soso voa au sasauka vovea; e elore maea kofa sa oropai sore, a—, oropai vei haikaeaita karu ta e au sukelapai vovea.

14Ahai‐e e vei, Safu Karoro ore karu aea Farisea karu, aiera‐aiera karu e! Ipi e ua vitōva vitōva ve etau maeamaea ta maravaita karu, aeata e veveu o si ita lohalai toaitore. Lōfeare vei kaiae ve tava rovaea‐rovaea‐eite ero aite miarai roi.

15Ahai‐e e vei, Safu Karoro ore karu aea Farisea karu, aiera‐aiera karu e! Ipi e makaikara mearovaeka ita la eakoa toepi tera vovea, haiiri kerorita karu farakeka aea la ovai vei; ovaita lea mea, e arero lei Gehena ve atute e feare lei maealolo soa orakoria ta topiari lōri lei vovea.

16Ahai‐e e vei, lariōvaita karu ofae kuku e! Ipi eve o meha, Karu Maso Uvi ve rare ita otoare arita o ari oria, lea eite kao; a—, karu Maso Uvi ve gold rare ita otoare arit’ oria, lea otoare arero fasaita reha. 17Haiivavu ofae kuku karu e, rovaea kofa leavoa, gold ei, a—, gold la lei safu leita lea Maso Uvi ei? 18Eve o aeata meha, karu alitara ve rare ita otoare arit’ oria, lea eite kao; a—, areve arori voa eaeita meru ve rare ita otoare arit’ oria lea otoare arero fasaita reha. 19E ofae kuku karu e, rovaea kofa leavoa, meru etau ei, a—, meru la lei safu leita lea alitara ei? 20Soka alitara ve rare ita otoare la okofa lei arita lea karu, alitara ve rare aeata areve arori voa siseita etau foromai ve rare ita arita reha. 21Aea karu aea maso uvi ve rare ita otoare arit’ oria, are maso uvi voa peita lea Ualare ve rare ita otoare arita reha. 22Aea karu aea kauri ve rare ita otoare arit’ oria, are Ualare ve terona ve rare, aea lōvoa aiseseita Ualare ve rare ita otoare arita reha.#Isa 66:1; Mat 5:34

23Ahai‐e e vei, Safu Karoro ore karu aea Farisea karu, aiera‐aiera karu e! ipi e suaea aea likopa aea tivu ita la firu ten faea firu farakeka la maravi Ualare voa omopa posaseai vovea; a—, Safu O metameta, seseōvi haura leita mai aea maeaforoe aea otoare kofa ita leita mai ita la e au kiripa vovea. Lōfefeare etau metameta leitita, aea lea omopa etau ta lōri haikaeaita, a—, e au arapaitore.#Levi 27:30 24Lariōvaita karu ofae kuku e, e eve larita ma voa kikirivisa la keoti sa totoa fareovaitore, a—, kamela la e au arapaitore.

25Ahai‐e e vei, Safu Karoro ore karu aea Farisea karu, aiera‐aiera karu e! ipi e kōkuveisa aea saesa ita ve kōu la uka ovava leititore, a—, ereve iri voa ivuru aeata mai maealolo sa soa’ laisisea. 26Farisea karu ofae‐kuku e, kōkuveisa ve iri omopa maukaia, areve kōu ta lōri uka ovava leiti vei.

27Ahai‐e e vei, Safu Karoro ore karu aea Farisea karu, aiera‐aiera karu e! ipi e usoso oro sa toa sea leita sofa oti feare, maria voa ofae eavaita lareva, a—, iri voa opai karu ve uti aeata pikuru maealolo roro feri soa’ sisea vovea.#Apos 23:3 28E ta lōfeare eve maria ve etau karu sa eavaita haura feare, a—, iri voa e apeva aea kaiae ita sa soō vovea.

29Ahai‐e e vei, Safu Karoro ore karu aea Farisea karu, aiera‐aiera karu e! ipi e peroveta karu hiehe tapu oti ve fave la vipa vovea, aea haura karu ve sofa oti la moupa lareva ita ara vovea, 30aea eve o meha, Ela elave papa‐ita ve makuri soa voa pepeit’ oria, a—, ela ere ita farehoria peroveta karu la levi paeai lare. 31Lōfeare e eve elore leita mai sa vavavi ore loita reha, e ta peroveta karu la paeaiape karu ve meavusu. 32Soka eve papa‐ita sa leiape kaiae e ta topiari soaritore. 33Ikaroa e, ikaroa ve atutemori e, e Gehena voa terai vei lea kaiae tava la lea’ lei safauka aroai roi ei?#Mat 3:7; 12:34; Luk 3:7

34Lōfeare vei ara peroveta karu aea haiore karu aea Safu Karoro ore karu ita la ero tai itapai roi. Erero hea la e toa opai roi, aea hea ta e satauro voa paeai roi; aea erero hea ta e eve sunako uvi voa tola sa teavi sari roi, aea e karikara aea voa te karikara aea voa erero aitetei hasiavai vei larivatai roi. 35Lōfeare vei mearovaeka voa sisapaiape kaiae auke ovo foromai ve tava ero tai foreri siseava roi, soa Abela, haura vita ve ovo soa itiiti Sakaria Barakia ve ovo, e safu oti itai aea alitara itai ve aru voa paeōpe lea vita.#Gen 4:8; 2 Basil 24:20–21 36Okofa ara ero o la moi, Lea etau foromai ve kaiae ve tava mea taotao karu voa forerai roi.

37Ierusalema e, Ierusalema e, a peroveta karu la paea opaitore, aea aro tai itapaita lea karu la fave sa toa opaitore. Soa rauapo ara ave atutemori la kokorukai haikaeai vovea, usoso kokora lou areve mere areve avako ora voa kokoruka haropaita feare, a—, e haiarara. 38Mapaia, eve pepeita otioti la lei meara meara lei laisisea.#Iere 22:5 39Ara aro o mō la moi, A araro ata ofae levi eavai roi tetete a mō ari roi, Papuvita ve rare ita kotita lea vita lareva ia!#Sal 118:26

Currently Selected:

Mataio 23: TQO1983

Highlight

Copy