Mataio 21

Iesu Ierusalema voa pataipe

(Mareko 11:1–11; Luka 19:28–44; Ioane 12:12–19)

1Ere patei Ierusalema haekao lei, Betefage, Olive Raepa voa forerōpe soa, Iesu areve satiriaraita karu oraka la itapi, 2mō ōpe, Euka eukave omopa voa eaeipeta lea karikara voa patei oropaia, aea euka lōvoa oropaita lea mea, euka fasi peita asini areve mere ita la utohoa ofae eavai roi; ereukaro felaukea lariōvi mōvoa kerori faukaia. 3Karu aea eukaro o ari oria, euka mō aria, Papuvita ereukaro haikaeaipeta eavia; aea are ereukaro utohoa itapai roi.

4Soka lea leipe etau forerōpe ipi peroveta karu sa mōri moipe o la lei okofa leiti vei,

5Siona ve mori la mō moia,

Ofae eavaia, ave King haimafu ita

asini voa forea la kotipea,

aea asini mere, etau la taiovaita animala ve mere voa.#Seka 9:9

6Soka lei satiriaraita karu oraka patei, Iesu sa moipe mai feare lōri leipe. 7Ereuka asini areve mere ita la lariōvi fauka, ere ereve maea puta ereukave kōu‐uti voa fururukea miavi, Iesu forea avōpe reha. 8Karu sitavu rovaeka ereve maea puta otiharo voa fururukea, aea karu hea ta tola lakai koseva sairea miavaiape. 9Areve omopa voa roroaiape karu sitavu aea aite voa pataiape karu i mō isa moiape, Hosana, Davida ve Atute vei! Papuvita ve rare ita kotipeta mea vita lareva ita meava! Hosana aria koakoa‐eiteapo voa!#Sal 118:25–26

10Are Ierusalema voa oropōpe soa, karikara karu foromai lavukakaea mō ape, Lea leisa? 11Aea karu sitavu mō ōpe, Peroveta vita Iesu meha, Nasareta Galilea soa voa koti foreraita vita.

Maso Uvi voa leipe mai

(Mareko 11:15–19; Luka 19:45–48; Ioane 2:13–22)

12Aite Iesu Ualare ve Maso Uvi voa oropi, aea Maso Uvi itaea lei miaraiape karu aea itaea lei maravaiape karu la toa liōvea, moni ilala leiape karu ve posa, aea sua la itaea lei miaraiape karu ve kiriposa ita la mavitoaiape. 13Are erero ta mō ōpe, Mea o uka laisisea, Arave uvi rare Ualare ve veveu leita uvi rare aravai roi, a—, e arero toarōrisa torea leita karu ve arafukaita uta la leipea.#Isa 56:7; Iere 7:11

14Soka ofae kuku karu aea mora kaiae karu arero tai Maso Uvi voa foreri, are erero lei lareva leiape. 15Soka maso harofave karu aea Safu Karoro ore karu are leiape haihava etau aeata atutemori ta Maso Uvi voa i mō isa moiape, Hosana, Davida ve Atute vei! lea la ofae eovi ere kitou lei, 16arero mō ōpe, Ere moipeta lea o a mapaia kao ei? Soka Iesu erero mō ōpe, A; e mea o muti kao ei? Mere popora aea kō laloita atutemori ita ve ape voa a maeati o lei kekese lei foreraitore.#Sal 8:2 17Soka are erero kiripi, karikara rovaea ve mana voa foreri Betania voa kei, faita soa lovoa iavōpe.

Fare auke haue tola la leipe mai

(Mareko 11:12–14, 20–26)

18Soka miori soa voa are karikara rovaea voa maea lei kotiape soa, are eroa sōpe. 19Soka are haue tola farakeka aea otiharo peto voa peiape la ofae eovi, areve ipi voa te foreri eavōpe soa, eite kakaeite, tolotolo sa haria, aea are lea tola la mō ōpe, A fare tai auke lei peava roi. Soka lea haue tola utohoa fefeopōpe reha. 20Satiriaraita karu lea la ofae eovi, haihava lei, mō ōpe, Haue tola utohoa fefeopaita meha! 21Lō mei Iesu tava o erero mō ōpe, Okofa ara ero o la moi, E haiiri horahora auke ita sukaereait’ oria, e mea haue tola la loita mai feare ta leiti roi, aea lea sa haria kasirau, a—, e mea raepa ta mō aritōva, Fareōvi makaikara voa farea isaia, aea are lōri leiti roi.#Mat 17:20; 1 Kor 13:2 22E sukaerereaita haiiri ita veveu lei Ualare la loki leita lea etau etau foromai, e lea la maravai roi.

Iesu sa leipe siahu ve ipi vei

(Mareko 11:27–33; Luka 20:1–8)

23Soka are Maso Uvi voa oropi, satiriaraiape lea mea, maso harofave karu, karikara opasora‐sora ita arero tai forera mō ōpe, A mea mai leipeta siahu ve ipi leavoa, aea aro miaraita siahu vita ta leisa? 24Iesu tava o erero mō ōpe, Ara ta o farakeka ero lalasi leiti ao; e tava o araro omoit’ oria, ara ta ara mea mai leipeta siahu ve ipi la ero omoi roi. 25Ioane sa leiape lea bapatiso ve ipi leavoa, kauri voa ei ō karu voa ei? Lō mei, ere elore elore o mō seseōvōpe, Ereita mō aritōva, Kauri voa, are mō ari roi. E arero sukaerereai auke leipe ipi levea? 26A—, ereita karu voa o arita, a—, ereita karu sitavu la tore loi, ipi karu foromai ve haiiri meha, Ioane are peroveta vita kofa. 27Lea vei ere Iesu la tava o mō ōpe, Ela ore kao. Soka are ta erero mō ōpe, Ara ta ara mea mai la leipeta siahu ve ipi la levi moi roi.

Parabole o ipi atute orakoria vei

28Soka eve haiiri leafeare? Karu farakeka aea atute orakoria ia; are toare tai te mō ōpe, Atute e, a iso sare te vine oti voa tivi leiti vei. 29A—, are tava o mō ōpe, Ara levi terai roi; eite are aite voa haiiri ata kerori terōpe. 30Soka are atute kokoe la tai te lōfeare ta moipe, Lō mei, are tava o mō ōpe, Oa meta e, ara terai roi, a—, eite are terai kasirau. 31Lea atute oraka voa oa sa haikaeaita tivi la leitita karu leisa? Ere mō ōpe, Toare vita. Iesu erero mō ōpe, Okofa ara ero o mō la moi, Takis fareovaita karu aea saruka uamori ita Ualare ve basileia iri voa eve omopa voa tera vovea. 32Ipi Ioane haura leita mai ve otiharo voa kotipe, a—, e arero sukaerereai kasirau, a—, takis fareovaita karu aea saruka uamori ita sa arero sukaerereōpe; e ta erero ofae eavōpe, a—, eite e aite voa arero sukaerereai vei haiiri kerori kasirau.#Luk 3:12; 7:29–30

Parabole o ipi vine oti la kiva karu vei

(Mareko 12:1–12; Luka 20:9–19)

33Mea parabole o ta mapaia. Mea ve papuvita farakeka aea vine forōva oti pisosi, vine mere vipi vipi, aea kora eli eakoa toepi, fare la faihohōroaita etau vei toru‐uta isa, uvi koa ta turōpe. Aea are lea forōva oti tava itai ovai vei otoare a’, vine forōva arita karu hea sa kiva leiti vei miōri, maea lei oti haria voa sariva lei au terōpe.#Isa 5:1–2 34Fare taita pisahu forerōpe lea mea, are areve sarufa karu aea la vine oti kiva karu tai itapōpe vine oti ve fare hea la maravai vei. 35A—, lea vine oti kiva karu areve sarufa karu la sukafori, ere farakeka aea la teavi sa’, farakeka aea la paea, farakeka aeata fave sa toōpe. 36Soa aea ta are sarufa karu rauapo itapōpe, omopa rauapo lōfeare kao; a—, ere erero ta lōfeare leipe. 37Aite kofa are areve atute la erero tai itapi mō ōpe, Ere arave atute la taivotai roi. 38A—, lea vine oti kiva karu ere atute la ofae eovi o elore elore a’ mō ōpe, Hasu ovai o oita vita meha; kotiria, ereita arero paea, areve oti la lōri ovai vei. 39Lō mei ere arero sukafori, vine oti ve koravasa voa toapi paeōpe.

40Vine oti ve papuvita foreraita soa, are lea oti kiva karu la leafeare leiti roi ei? 41Ere arero mō ōpe, Are lea kaiae karu la etakofa saroroapi, vine oti kiva karu haria la miarai roi, fare ereve pisahu kofa voa arero miarai vei lōfeare karu. 42Soka Iesu erero mō ōpe, E Safu Karoro voa mea o la muti sore ei?

Uvi turaita karu sa haiarara lei eite auke o ōpe lea fave,

are arori lalave fave lei la eaea.

Mea Papuvita sa leipe etau,

ereita ofae eovi haihava loita meha.#Sal 118:22–23

43Lea vei ara ero o la moi, Ualare ve basileia e voa fareōvi, aea basileia ve fare la lei taita lea toruipi‐ipi karu la miarai roi. 44Mea fave ve arori voa putoita lea karu foromai furira taratara leiti roi; a—, are ereve arori voa oaita lea karu la faihohōroa taratara lei terere feare tovuseai roi.

45Soka maso harofave karu aea Farisea karu ita areve lea parabole o la mapi, ere ore leipe are erero sukavuteai vei moipe. 46Ere arero sukaforai vei eliape, a—, ere karu sitavu la tore leipe ipi lea karu ve kekese leita haiiri mōfeare, Iesu are peroveta vita aea.

Currently Selected:

Mataio 21: TQO1983

Highlight

Copy