Luka 13

Haiiri keroria e opai ave

1Soka lea soa kofa voa karikara karu ere Galilea karu hea ve fari Iesu la moipe; Pilato sa karu ve ovo ere savi Ualare lei omopa posaseaia animala ita ve ovo la lei sisapi toilafisōpe lea fari. 2Lō mei, Iesu tava o erero mō ōpe, Erero paeaia lea vei, e haiiri mōfeare seseōvai ei, lea Galilea karu ere kaiae rovaea kofa, Galilea karu haria foromai kaiae lōfeare kao ei? 3Ara ero o mō la auai, Kasirau; a—, e haiiri kerori auke leitita, a—, ero ta lōri saroroapi kaleiti roi. 4Aeata Siloama ve fave uvi koa foforuka erero safori opōpe lea karu leafeare ei? E haiiri mōfeare seseōvai ei, ere karu maealolo kofa, Ierusalema voa pepeita karu hariaharia foromai lōfeare kao ei? 5Ara ero o mō la auai, Kasirau, a—, e haiiri kerori auke leitita a—, ero ta lōri saroroapi kaleiti roi.

Fare tai auke haue tola

6Iesu mea parabole o mō moipe, Karu farakeka areve vine forōva oti voa haue tola farakeka aeata vipōpe. Vipi are aite koti fare are voa eliape, a—, eavai kao. 7Soka are areve forōva arita karu la mō ōpe, Mapaia, ara mea sisoro oroisoria voa fare la mea haue tola voa eli vei koti vovea, a—, eavai sore. Arero foia; are mea voa auraka auea peita ipi levea? 8A—, areve tivi karu tava o arero mō ōpe, Papuvita e, mea sisoro ta are pea, ara areve ipi voa mea isa eakoa toepi, e sisōvi mea la lei tapare leiti vei. 9Are fare aite pisahu voa tait’ oria, lareva reha; a tai auke leitita, a—, arero au foia.

Sabati sare voa lei lareva leipe ua vei

10Soka Sabati sare voa are sunako uvi aea voa satiriaraiape. 11Lōvoa ua farakeka sisoro eighteen maea‐uti sisapaita harisu sa lei, maea pakokoa, itoita ore kasirau. 12Iesu arero ofae eovi, arero mō isa moipe, Ua e, ave maea‐uti sisapaita eka paraeaita meha. 13Lō mei arero mai sa mopi, arero utohoa lei haura lei, are Ualare la maeatipe reha. 14A—, ipi Iesu sa Sabati sare voa arero lei lareva leipe lea vei, sunako harofave vita kitou lei, karu la mō ōpe, Tivi leita sare six reha; lea sare voa kotia, eve eka la lei lareva leiti vei, a—, Sabati sare voa levi leitia.#Eso 20:9–10; Deut 5:13–14 15A—, Papuvita tava o arero mō ōpe, Aiera‐aiera karu e, e voa karu areve boromakao varo asini varo Sabati sare voa felaukea arero ma lari vei lariōvaitore. 16A—, mea ua, Abrahama ve mori aea, Satani sa sisoro eighteen voa fasi pea vovea; a—, arero Sabati sare voa mea fasaita etau voa levi felaukeai roi ei? 17Soka are o lōri moipe soa, arero sukavuteaita karu foromai maeamariti leipe; a—, karikara karu foromai are leiape haihava etau foromai vei hailareva leipe reha.

Parabole o sinapi mere vei

(Mataio 13:31–33; Mareko 4:30–32)

18Soka are o aeata mō ōpe, Ualare ve basileia usoso ita etau larelekōru? Ara are ita lekōru la topiari seseōvai roi? 19Are sinapi mere farakeka feare, karu farakeka aea sa ovi areve forōva oti voa vipōpe. Vipi are asi rovaea lei tola feare leipe, aea arori voa roroaita ori areve lakai voa ereve avaita roro miavaiape.

Parabole o faloa fefesita muramura vei

(Mataio 13:33)

20Are o aeata mō ōpe, Ara Ualare ve basileia ita lekōru la topiari seseōvai roi? 21Are usoso faloa fefesita muramura feare, ua aea sa ovi faloa kōkusaesa oroisoria voa korari korari tetete faloa foromai fefesipe reha.

Utape koko

(Mataio 7:13–14, 21–23)

22Are Ierusalema otiharo voa sariva leipe soa, are karikara metameta kaekae ita voa foreri satiriara vovo meiape. 23Soka karu farakeka aea arero lalasi mō leipe, Papuvita e, karu fafareso la haria lei makuri leiti roi ei? Iesu erero tava o mō ōpe. 24Utape koko voa oropai vei haiiri rofo leitia: ipi ara ero o mō la auai, Karu rauapo oropai vei seseōvai roi, a—, usoso levi leiti roi.

25Uvi ve papuvita sa itei utape sasauka roroka leita soa; aite e maria voa soi popōvi, utape voa totoa mō ari roi, Papuvita e, utape ela vei fapaia. A—, are tava o ero mō moi roi, Ara ero ore kasirau, e leavoa koti? 26Lea mea e o mō ari roi, Ela larietau ma ita a ita fareho lalape, aea a elave karikara pisiri otioti voa satiriaraipe. 27A—, are ero ata mō moi roi, Ara e foreraita oti ore kasirau; araro kiripi oroaia, e mai maealolo leita karu foromai e!#Sal 6:8 28E Abrahama aea Isako aea Iakobo aea peroveta karu foromai Ualare ve basileia ve iri voa pepeita la ofae eavaita, a—, ero maria voa sukavuteaita lea mea, e fi a’ tao karekare ari roi.#Mat 8:11–12 #Mat 22:13; 25:30 29Aea mairimairi itai aea avora itai aea maruru itai, aea diho itai voa karu ta koti foreri Ualare ve basileia ve sosoka voa avai roi. 30Mapaia, aite kofa karu hea omopa kofa karu leiti roi, aea omopa kofa karu hea aite kofa karu leiti roi.#Mat 19:30; 20:16; Mak 10:31

Iesu Ierusalema vei fi ōpe

(Mataio 27:37–39)

31Lea soa kofa voa Farisea karu hea koti arero mō ōpe, Mōvoa kiripi soeaia, ipi Heroda aro paeai hai la kaeaipea. 32A—, are erero mō ōpe. Te lea ave merava la o mō aria, Mapaia, ara iso sare aeata vevere sare harisu la larivati larivati, aea eka karu la lei lareva lei lei, oroisoria sare voa arave tivi la lei roroka leiti roi. 33A—, iso sare aea vevere aeata a sare ara maea lei au patai roi; ipi peroveta karu la oti haria voa paea opaita usoso kasirau, a—, Ierusalema voa haria.

34Ierusalema e, Ierusalema e, a peroveta karu la paea opaitore, aea aro tai itapaita lea karu la fave sa toa opaitore. Soa rauapo ara ave atutemori la kokorukai haikaeai vovea, usoso kokora lou areve mere areve avako ora voa kokoruka haropaita feare; a—, e haiarara. 35Mapaia, eve pepeita otioti la kiripi meara lei laepepea. Ara aro o mō la auai, A araro ata ofae levi eavai roi tetete a mō ari roi, Papuvita ve rare ita kotita lea vita lareva ia!#Sal 118:26; Iere 22:5

Currently Selected:

Luka 13: TQO1983

Highlight

Copy