Luka 14

Iesu maea patavaita eka karu la lei lareva leipe

1Soka Sabati sare aea voa are te Farisea harofave vita farakeka aea ve uvi voa larietau lari vei oropōpe. Lea mea ere arero ofae sa kiva leiape oti ára voa. 2Soka maea patavaita eka karu aea foreri areve omopa voa soi pōvi, 3Iesu Safu Karoro ore karu aea Farisea karu ita la lalasi lei mō ōpe, Sabati sare voa eka karu la lei lareva leiti vei, lea mai safu ō leafeare? 4A—, ere o kasirau. Lea mea Iesu lea eka karu la mai paea, arero lei lareva lei, arero itapōpe. 5Itapi are erero mō ōpe, E voa karu leisa, areve atute varo boromakao varo matoru voa oaita, a—, e arero Sabati sare voa utohoa levi aruovi patai roi?#Mat 12:11 6A—, ere lea o ve tava omoita usoso auke leipe.

Haiiri‐ipi leitia

7Soka Iesu are larietau lari vei isōpe karu, ere toare avaita oti la haikaeaiape la ofae eavōpe lea mea, parabole o erero mei mō ōpe, 8Karu aea ero eva‐e sosoka voa isai oria, toare oti voa levi avaia, sosoka papuvita ave arori karu ta isa koti ave;#Hore 25:6–7 9aea eukaro isaita lea papuvita koti aro mō arita varo, Ave oti mea karu la miaraia, aea a maeamariti ita te ipi kofa oti voa avai vei. 10A—, aro sosoka vei isaita soa, a te ipi kofa oti voa avaia. Lōfeare avi, sosoka papuvita koti aro mō arita varo, Moraitai e, a arori oti voa patei avaia. Lea mea a rare rovaea ovai roi a ita fareho avaita karu foromai ve omopa voa. 11Ipi ereve elore maea la moravaita lea karu foromai la ipi voa sukavutea fafukai roi, a—, ereve elore maea la ipi voa leita lea karu foromai la moravi arori voa papatavai roi.#Mat 23:12; Luk 18:14

12Lea mea Iesu arero larietau lari vei isōpe lea vita ta o mō ōpe, A sare koko larietau varo meafautu larietau varo lari vei karu la isaita soa, ave moraitai‐tai ō ave maraiosu ō ave paumarehari ō ave karikara ve pisoso karu la levi isaia; ere aite aro ta larietau lari vei isai ave, aea a tava lōfeare vei ovai roi. 13A—, a sosoka leita soa, merava karu aea maea mitutu karu, aea mora huaveahuavea karu aea ofae kuku karu ita la isaia. 14Lōfeare leitita, a—, a lareva leiti roi, ipi ere tava etau aro miaraita ore kasirau. Haura karu opi ata itoita soa voa a tava lōri ovai roi.

Parabole o sosoka rovaea vei

(Mataio 22:1–10)

15Are ita fareho la’ avaita karu farakeka aea lea o la mapi arero mō ōpe, Ualare ve basileia voa larietau larita lea karu lareva ia. 16A—, Iesu mō ōpe, Karu farakeka aea sosoka rovaea lei karu rauapo la sosoka vei isōpe. 17Sosoka soa kofa voa are areve sarufa karu aea la itapi sosoka lari vei o moiape lea karu la mō isai vei, Kotiria, ipi etau foromai kekese loita meha. 18A—, ere foromai haiarara o ōpe. Omopa karu arero mō ōpe, Ara mea itua la itaea lei ovaita meha, ara te lea mea la ofae eavai vei; ave papuvita la eapo omoia are kitou levi leiti vei. 19Karu aea ta mō ōpe, Ara boromakao marota five itaea lei ovaita meha; ara te erero seseōvai vei; ave papuvita la eapo omoia, are kitou levi leiti vei. 20Karu aea ta mō ōpe, Ara ua laeaita meha, lea vei ara kotita usoso kao. 21Soka lea sarufa karu ata kerori lea o areve papuvita la moipe. Lō mei, uvi papuvita kitou lei, areve sarufa karu la mō ōpe, Karikara otiharo pisasa aeata koko voa lavelave teraia, aea merava karu aea maea mitutu karu aea ofae kuku karu aea mora huaveahuavea karu la taravi kotia. 22Sarufa karu ata koti mō ōpe, Papuvita e, usoso ave o feare lei roroka loi, a—, oti uta‐uta ia. 23Soka papuvita lea sarufa karu la ata mō ōpe. Furuka oti haroharo aea forōva oti haroharo voa kavaia, aea karu la serea ita koti vei haisaia, arave uvi soari vei. 24Ipi ara ero o mō la auai, Evera isaia lea karu farakeka aeata arave sosoka taheka aeata levi lari roi.

Rofo leitia!

(Mataio 10:37–38)

25Soka karu sivirikapo are ita fareho roroaiape; aea are aiterori a’ erero mō ōpe, 26Karu aea araro tai koti, a—, are areve elore oa ita lou ita, aea areve ua aea atutemori ita, aea maraiosu aea uarosu ita, aeata areve elore makuri ta haiarara auke leitita, a—, are arave satiriaraita karu leiti vei usoso kasirau.#Mat 10:37 27Areve elore satauro la taiovi araro lōri aitetai auke leita lea karu are arave satiriaraita karu leiti vei usoso kasirau.#Mat 10:38; 16:24; Mak 8:34; Luk 9:23 28E voa karu leisa fave uvi koa turai haikaeaita, a—, are omopa avi turaita tava la seseōvai ao, areve moni lea uvi la lei roroka leita usoso varo. 29Lōfeare leiti auke leitita, a—, are uvi ve ipi oti vipi kekese lei, are uvi lei roroka leitita usoso auke leita varo, aea lea uvi la rurita karu foromai arero area sa vutea a’, 30mō ari roi, Mea vita uvi turai haikaeaita, a—, arero roroka leiti moni kasirau. 31Ō mōfeare varo, king farakeka aea king haria ita marehaukai vei maea leiti vei leita soa, a—, are omopa avi haiiri levi seseōvai roi ei? Are maola karu 10,000 ita arero mare toai vei kotita lea king ve maola karu 20,000 ita marehauka sapataita usoso varo. 32Lōfeare auke leitita, a—, are meu karu la itapai roi lea king haria sa ára‐ita meita lea soa voa, arero tairu vei loki leiti vei. 33Lea vei e voa karu aea areve ovi meita etau foromai la haiarara lei kiripai auke leitita, a—, are arave satiriaraita karu leiti vei usoso levi leiti roi.

34Sōlo are etau lareva, a—, sōlo ve peroro veverapai oria, arero ata lei lareva leita otiharo kasirau. 35Are eite kao mea la lei tapare leiti vei varo, roro oti voa suka sisiōvaita varo. Karu lōfeare etau la au mutapaitore. Karu mapaita ōvauta ita oria, lea o la mapaia.

Currently Selected:

Luka 14: TQO1983

Highlight

Copy