Luka 12

Iesu areve satiriaraita karu la moipe ovoro

(Mataio 10:26–33)

1Lea soa voa karu siviri sivirieiteapo sa kokoruka elore elore mora sa pōvi sasape. Sa’ sa’, are areve satiriaraita karu vei ovoro vei mō ōpe, Farisea karu ve aiera‐aiera mai la haiarara leitia, lea mai usoso faloa la lei fefesita etau feare.#Mat 16:6; Mak 8:15 2A—, aieri siseita etau foromai pisiri voa muiai roi, aea milafukaita etau foromai ta ore leiti roi.#Mak 4:22; Luk 8:17 3Ipi e murumuru soa voa omoita lea o la ovava soa voa mapai roi, aea e iri lalava voa kefa uri arita lea o la uvi kōu voa itoro ari roi.

4Moraitai‐tai e, ara ero o mō la auai, Maea la paea aea aite etau aea la leitita ore auke leita lea karu la tore levi leitia. 5A—, ara ero kureai mōfeare karu la tore leitia: ero paea opaita soa ve aite voa ero Gehena voa toapai vei siahu ia, lōfeare vita la tore leitia. Okofa ara ero o moi, arero tore kofa leitia!

6Ilipu‐titira five ve tava toea orakoria, ei? A—, Ualare erero farakeka aea la haisafai sore. 7Eve haro‐tui foromai la mai muti roroka. Lea vei tore levi leitia; eve eite ilipu‐titira rauapo ve tava la sapatai.

8Ara ero o mō la auai, Araro karu ve soso voa vavavaita lea karu foromai la Karu ve Atute ta Ualare ve aneru ve soso voa erero vavavai roi. 9A—, araro karu ve soso voa avoa arita lea karu la Karu ve Atute ta Ualare ve aneru ve soso voa erero avoa ari roi.

10Karu ve Atute la sukavuteaita o la arita lea karu foromai ve kaiae tava sasuka mutapai roi, a—, Safu Arahoha Lareva la o kaiae arita lea karu ve kaiae tava la levi sasuka mutapai roi.#Mat 12:32; Mak 3:29

11Sunako harofave karu aea karikara papukoru aea siahu karu ve omopa voa kōto leiti vei ero lariōvi foreraita soa, e tava o ō laua leafeare sukavai vei haikavora levi leitia;#Mat 10:19–20; Mak 13:11; Luk 21:14–15 12ipi lea ora kofa voa Safu Arahoha Lareva sa ero moi o satiriarai roi.

Parabole o pisoso karu vei

13Soka karu sitavu voa heavita farakeka arero mō ōpe, Satiriaraita Papuvita e, arave paua la o mei are elakave oa ve etau la faea arave firu araro miarai vei. 14A—, Iesu arero mō ōpe, Heavita e, eukaro seseōvi aea etau faeaita tivi leiti vei araro leisa miarai ei? 15Are karu foromai la mō moipe, Kiva kofa leitia, aea etau maravai vei haikakare levi araia, ipi karu ve makuri ve eite are sa maravaita lea etau etau voa kasirau.

16Soka are parabole o erero mō ōpe, Pisoso karu farakeka ve mea voa larietau rauapo forerōpe. 17Foreri are areve haiiri seseōvi mō ōpe, Ara leafeare leiti roi? ipi ara arave larietau rauapo toea miavai oti usoso kasirau. 18Are o aeata mō ōpe, Ara mōfeare la leiti roi, ara arave toea miavaita uvi uvi la sasuka, uvi metameta kofa la turi vipi, lōvoa arave larietau aea arave etauroro foromai ita la toea miavai roi. 19Aite ara arave ove la o mō ari roi, Ove e, a etau rauapo la sisoro rauapo vei toea miavaita meha; haioraia, larietau ita ma ita hailareva ita laria. 20A—, Ualare arero mō ōpe, Maeakakare e, mea faita kofa voa ave ove la a voa fareovai roi; soka a toea miavi kekese leita lea etau la leisa maravai roi? 21Pisoso areve elore maea vei toea miavaita, a—, Ualare vei lei pisoso auke leitita lea karu ere ta lōfeare.

Haikavora vei

(Mataio 6:25–34)

22Soka are areve satiriaraita karu la mō ōpe, Ipi lōfeare vei are ero o mō la moi, Eve makuri vei haikavora levi leitia ipi larietau lekōru la lari roi, aea eve maea vei, puta lekōru la mopai roi. 23Makuri are arori voa, larietau are ipi voa, aeata maea are arori voa, puta are ipi voa. 24Haiiri akoako la seseōvaia; ere etau mere vipai sore, ere fare ta sarapai sore, ere larietau arua aeata toea miavaita uvi ta kasirau, a—, Ualare sa erero savua vovea. Eve eite ori la sapatai kao ei? 25E karu leisa, are haikavora leitita, a—, are areve makuri voa sisoro hea ata topiari taheka lei savori feare leiti roi ei? 26E etau titilese lōfeare leiti vei usoso auke leitita, a—, e etau haria vei haikavora leitita ipi leavea? 27E tola merava ve pupuri la ofae aura eavai, ere mai leafefeare asai vovea, ere tivi heafo leiti sore aea puta ta sari sore; a—, ara ero omoi, Solomono areve sosorusosoru voa, ereve lea puta feare mopai kasirau.#1 King 10:4–7; 2 Basil 9:3–6 28Soka Ualare furuka ve kavuru la moupa lōfeare araita, aea lea kavuru iso sare makuri aea vevere a iri voa toapai roi, are ero ta puta etakofa mopai roi, sukaerereai auke karu e!

29E larita etau aea ma ita vei levi elia, aea haikavora ta levi leitia. 30Ipi lōfeare etau mearovaeka torutoru karu sa eli vovea; aeata eve Oa ore, e ta lea etau haikaeai vovea. 31A—, areve basileia la elia, aea lōfeare etau ta ero topiari miarai roi.

32Mamoe firu seika e, tore levi leitia! ipi eve Oa sa haikaeaita haiiri basileia la ero miarai vei. 33Eve etauroro la itaea lei miōri, aea lea tava moni la maravi karu merava la au aioraia; titia leiti auke oroa la maravaia. Kauri ve pisoso kaleiti ore auke etau la aiperovaia; lōvoa torea karu alaeai sore, aea ao ta la’ haroavai sore. 34Ipi eve pisoso etau leavoa sisea, eve haiiri ta lōvoa siseava roi.

Kiva leita o

35Eve puta sii ve maea ovi aravaia, aea eve sasae‐a muia kekese leitia.#Mat 25:1–13 36Usoso ereve papuvita la taita sarufa karu fefeare leitia; are eva‐e sosoka kiripi elore voa ata kerori koti utape totoaita soa, ere utape are vei utohoa fapai roi.#Mak 13:34–36 37Ereve papuvita foreraita soa are erero ovoako la ofae eavaita, a—, lea sarufa karu lareva; okofa ara ero o moi, are elore sofa etau la fasi, erero lei larietau oti voa avi larietau sa erero omopa posaseai roi. 38Are apisi soa varo, mea ōpai soa varo koti, erero lōfeare ofae eavait’ oria, lea sarufa karu lareva. 39A—, mea etau ore leitia, uvi papuvita torea karu sa kotita soa la everori ore leitita, a—, are ovoako ita, areve uvi kiva lei ere areve uvi levi tofapai lare.#Mat 24:43–44 40E ta reha, kekese lei vovo roroava; ipi e sa ore auke ora voa Karu ve Atute forerai roi.

41Petero mō ōpe, Papuvita e, a mea parabole o ela haria vei moipea, ō karu foromai vei ta reha ei? 42Lō mei Papuvita mō ōpe, Etauroro la kiva leitita sarufa haiiri kakeva aeata haiore ita leitita lea karu leisa? Areve papuvita sa arero lei, areve uvi ve tivi harofave sarufa vita leiti roi, uvi karu ve larietau la soa kofa voa miarai vei. 43Areve papuvita foreraita soa, are lea sarufa sa lōfeare tivi leitita la eavaita, a—, lea sarufa lareva. 44Okofa ara ero omoi, are sa arero lei areve etauroro foromai la kiva vita leiti roi. 45A—, lea sarufa vita areve haiiri voa o mō aritōva, Arave papuvita si‐si‐eite, aea are sarufa irave ita marisa ita la teavi sa’, larietau ma ita la la’ maeakakare leitita varo, 46a—, lea sarufa ve papuvita, are arero tai auke sare, aea are ore leiti auke leiti ora voa foreri, arero paeai tava la miōri arero lei kaeava karu ita fareho topiarai roi.

47Areve papuvita sa haikaeaita haiiri la ore, a—, kekese auke lei areve haikaeaita haiiri feare leiti auke leitita lea sarufa karu la foromai teavi sari roi. 48A—, haveva vei morōve sa toaita tava ve kaiae la leita lea sarufa karu la soa farafarapo haria teavi sari roi. Etau rauapo erero miaraita lea karu foromai voa etau rauapo vei ta lalasi leiti roi; aea etauroro rauapo are kiva leiti vei miaraita lea karu voa, etauroro rauapo kofa la ata serea ita haisa moi roi.

Faeafaea oita haiiri ve ipi

(Mataio 10:34–36)

49Ara sosoita a la mearovaeka voa vifai vei koti; ara haikaeai lea a faitora sari vei. 50A—, araro bapatiso leiti soa la eaea; aea ara maea ta kakapiso la leipea pepepe lea bapatiso ara voa lei kekese leiti roi.#Mak 10:38 51E haiiri mōfeare seseōvaipea ei, ara mearovaeka voa totoeaita mai la lei forerai vei koti mea? Ara ero o mō la auai, Kakaeite, a—, faeafaea oita haiiri. 52Ipi mea soa ve aite voa uvi farakeka karu five faeafaea a’ itai oroisoria itai orakoria, aea itai orakoria itai oroisoria leiti roi. 53Lei, oa atute la sukavuteai roi, atute aea oa, lou aea mori, mori aea lou, ueri aea uevi, aeata uevi aea ueri, ere elore elore lōfeare sukavuteai roi.#Mika 7:6

54Iesu karu sitavu ta mō ōpe, E mea‐e avora itai voa pataita la eavaita soa, e utohoa mō ō vovea, Lai la koti; soka lai arita reha. 55Aea e diho itai voa itoita mea la eavaita soa, e mō ō vovea, Sare hehea rovaea leiti roi; soka hehea loita reha. 56Aiera‐aiera karu e, e mearovaeka ita kauri ita ve soso la seseōvi ore leitita usoso, a—, e mea soa la seseōvi ore auke leipeta ipi levea?

57E haura leita mai la ore leiti vei eve elore haiiri sa seseōvai auke leipeta ipi levea? 58Karu farakeka aea aro havara paraea, euka kōto oti voa terait’ oria, otiharo voa lea karu ita laua kekese leiti vei sukavaia, are seseōvi tava miaraita vita ve omopa voa aro aruovi, dibura kiva karu sa aro ovi dibura voa fasi sasaukai ave. 59Ara aro o mō auai, A lea oti la levi kiripai roi, pepepe a tava foromai la miōri kekese leitita soa voa.

Currently Selected:

Luka 12: TQO1983

Highlight

Copy