Luka 11

Ualare la loki leita mai vei

(Mataio 6:9–13; 7:7–11)

1Soka are oti aea voa Ualare la loki lei lei, are loki o sa kaleipe lea mea, areve satiriaraita karu aea arero mō ōpe, Papuvita e, Ualare la loki leita mai elaro satiriaraia, usoso Ioane sa areve satiriaraita karu firu la satiriaraiape lea mai feare. 2Lea mea Iesu erero mō ōpe, E Ualare la loki leitita lea mea, o mō aria:

Oa e,

ave rare safu lei taivotai meava,

ave basileia lei foreraia.

3Saresare ve larietau sare foromai voa elaro miaraia.

4Elave kaiae ve tava la felaukea mutapaia,

ipi ela ta elaro kaiae leitita karu ve tava la felaukea mutapai vovea;

aea vuteaita mea voa elaro levi lariōvaia.

5Are o aeata mō ōpe, E voa moraitai ita karu leisa, aea apisi soa voa arero tai te, arero mō arita varo, Moraitai e, a poi koru oroisoria araro miaraia, ara tava aro ata miarai roi; 6ipi arave moraitai aea sa arave uvi voa, sariva iti foreraita meha, aea ara arero miarai larietau kasirau. 7A—, are uvi iri voa eaea, mō arita varo, Araro heafo levi leitia; utape sasauka, aea ara arave atutemori ita farehoria ivutu posa voa iavi laisisea; ara etau aro miarai vei levi itoi roi. 8Soka ara ero o mō aipea, ipi are areve moraitai eavia, are etau arero miarai vei levi itoita varo, a—, ipi areve loki taupi peita mai vei are, are sa haikaeaita lea etau foromai arero miarai vei itoi roi.

9Ara o aeata ero mō la auai, Loki leitia, soka ero miarai roi; elia, soka e eavai roi; utape totoaia, soka are e vei fapai roi. 10Ipi loki leita lea karu foromai ovaitore; aea elita lea karu ta eavaitore; aea utape la totoaita lea karu vei ta fapaitore. 11E voa oa leisa, areve atute arero poi vei loki leitita, a—, are fave arero miarai roi ei? Aea are arero ekaka vei loki leitita, a—, are ikaroa arero miarai roi ei? 12Aea are kokora fare vei loki leitita, a—, are a‐misa arero miarai roi ei? 13Soka e karu maealolo, a—, e meru etau lareva eve atutemori la miaraita ore, lōfeare mai ve arori voa, eve kauri voa peita Oa sa Safu Arahoha la arero loki leita lea karu la miarai roi.

Iesu aea Beelsebulo

(Mataio 12:22–30; Mareko 2:22–27)

14Soka are okuku harisu la larivatōpe, aea lea harisu maria voa soeōpe soa okuku karu laua sukavōpe reha, karu sitavu haihava leipe. 15A—, karu hea mō ōpe, Are Beelsebulo, harisu ve harofave vita ve siahu ita harisu la larivatai.#Mat 9:34; 10:25 16Aeata karu hea arero seseōvai vei arero o serea ita kauri voa faukaita peise vei haisa eliape.#Mat 12:38; 16:1; Mak 8:11 17A—, are ereve seseōvaita haiiri la ore lei erero mō ōpe, Tofei itai itai leitita lea basileia foromai la saroroapai roi, aea uvi karu tofei haiiri hariaharia leitit’ oria, ere ta tofukavi maealolo leiti roi. 18Soka Satani ta tofei itai itai elore elore toaita, a—, areve basileia leafeare lei pavai roi? Ipi e mō auai, Ara Beelsebulo ve siahu ita harisu la larivatai. 19A—, ara Beelsebulo ve siahu ita harisu la larivataita, a—, eve elore karu leive siahu ita erero larivataitore ei? Lea vei ere sa ero seseōvi tava miarai roi. 20A—, ara Ualare ve mai lakoka ve siahu ita harisu la larivataita, a—, Ualare ve basileia ero tai lōfeare vei foreri laepea.

21Maea rofo vita maola etau ita areve elore uvi la kiva lei peita soa, areve etauroro lareva ita siseiava roi. 22A—, rofo rovaeka vita sa foreri, marehauka arero ovi aieraita soa, are lea vita sa sukaerereaita maola etau la toapi ovi, areve etauroro la faea faea a’ maravai roi.

23Ara ita fareho toari mei auke leitita lea karu, araro sukavutea vovea, aea ara ita fareho kokorukai auke leitita lea karu mamoe la liōvea fu ō vovea.#Mak 9:40

Parabole o harisu maeasiaviri vei

(Mataio 12:43–45)

24Harisu maeasiaviri sa karu aea la kiripi soeaita soa, are ma auke otioti voa haiorai vei soeai roi; a—, haioraita oti sukaeai auke leitita lea vei, areve o mōfeare, Ara kiripaia arave lea uvi voa ata kerori vei. 25Soka are koti, lea uvi tailia ovava lei, metakao pisosi eaeita la eovi, 26are te areve maealolo la sapataita harisu seven la taravi koti ere oropi lea uvi voa popōvaita reha. Lōfeare sa lei, lea karu ve omopa soa ve maealolo taheka seika, a—, aite kofa soa areve maealolo rovaea kofa.

27Soka are lea o la moipe soa, ua aea lea karu sitavu voa arero o mō isa moipe, Aro miōpe lea ére lareva, aeata a sosoōpe lea kō oraka ta reha. 28A—, Iesu mō ōpe, Okofa; a—, Ualare ve o la mapi kakeva leita lea karu ere ta lareva‐lareva‐eiteapo ia.

Laua ipi peise vei

(Mataio 12:38–42)

29Soka karu rauapo kokoruka topiferavaiape lea mea, are o mō moipe, Taotao karu ve maealolo maealolo ta meha; ere peise la haisa elipea, a—, peise erero levi muiai roi, a—, Iona ve lea peise sa haria.#Mat 16:4; Mak 8:12 30Ipi usoso Iona peise feare leipe Nineve karikara karu vei, lōfeare Karu ve Atute ta lōfeare peise feare leiti roi mea taotao karu vei.#Iona 3:4 31Seseōvi tava miaraita soa voa, Diho soa ve pukari ua mea taotao karu ita fareho soi pōvi ereve kaiae la pisiri muiai roi; ipi are mearovaeka ve itua‐tao kiripi koti forerōpe Solomono ve haiovoro o la mapai vei, a—, mapaia, Solomono ve arori vita mōvoa.#1 King 10:1–10; 2 Basil 9:1–12 32Seseōvi tava miaraita soa, Nineve karu ta mea taotao karu ita fareho soi popōvi, ereve kaiae la pisiri muiai roi; ipi Iona ve itoro o vei ere haiiri keroripe, a—, mapaia, Iona ve arori vita mōvoa la mea.#Iona 3:5

Laua ipi ovava vei

33Soka karu aea lamepa suka roroka lei, arero uvi hiairi voa levi vipai roi, aeata elōela sa levi kaupi vipai roi, a—, areve posa kofa voa vipaitore, iri voa alaeaita karu ere ovava la ofae eavai vei.#Mat 5:15; Mak 4:21; Luk 8:16 34Ave maea ve lamepa ofae reha; ave ofae lareva leitita, a—, ave maea foromai ovava leiti roi; a—, ave ofae maealolo leitita, a—, ave maea foromai murumuru leiti roi. 35Lea vei, kiva leitia, ave iri voa eaeita lea ovava murumuru leiti ave. 36Ipi ave maea foromai ovava kofa lei, murumuru taheka aeata eaei auke leitita, a—, are ovava foromai haeai roi, usoso lamepa sa haea aro lei ovava leita lea mai feare.

Farisea karu aea Safu Karoro ore karu vei

(Mataio 23:1–36; Mareko 12:38–40)

37Are laua sukōvi sukōvi roroka leipe soa, Farisea karu aea are ita fareho larietau lari vei arero ava’ leipe. Soka are uvi voa oropi, larietau posa voa avōpe. 38Avi, Farisea karu arero ofae eovi haihava leipe, ipi are omopa mai maukai auke leipe eavia. 39Lea mea Papuvita arero mō ōpe, E Farisea karu kōkuveisa aea saesa ita ve kōu la uka ovava leititore, a—, eve haiiri voa e ivuru aeata mai maealolo sa soa’ laisisea. 40Haiivavu karu e, kōu la pisosipe lea Ualare sa iri ta pisosi kao ei? 41A—, eve kōkuveisa ita saesa ita ve iri voa siseita etau la maravi, merava karu ta maeaforoe lei au miaraia, aea etau foromai e vei lōfeare ovava leiti roi.

42A—, ahai‐e, e vei Farisea karu e! ipi e suaea aea likopa aea loloita tolotolo foromai la firu ten faea firu farakeka la maravi Ualare voa omopa posaseai vovea, a—, seseōvi haura leita mai aeata Ualare la haikakare arai vei haikaeai sore; mōfeare leitita aea lea omopa etau ta haikaeaita, a—, e mai lareva leiti lare.#Levi 27:30

43Ahai‐e, e vei, Farisea karu e! ipi e sunako uvi voa toare kiriposa aeata karikara pisiri otioti voa marase arita o la mapai vei haikaeai vovea. 44Ahai‐e, e vei Farisea karu e! ipi e fave auke everove tapu otioti fefeare, karu haiivavu lei ereve arori voa mora kerori vovea.

45Lō mei, Safu Karoro ore karu farakeka arero tava o mō ōpe, Satiriaraita Papuvita e, a lōfeare o moita soa voa, a elaro ta serovai. 46Iesu mō ōpe, Ahai‐e, e vei Safu Karoro ore karu e! ipi e foia pasou la fasi, karu ve soro voa miava vovea, a—, e eve elore mai lakoka farekeka aea sa lea foia pasou la mopai sore. 47Ahai‐e, e vei! ipi e eve papa‐ita sa paeaiape lea peroveta karu ve hiehe tapu la turi morava vovea. 48Lōfeare e eve papa‐ita sa leiape mai la vavavi ore lei aeata haiiri farakeka lei vovea, ipi eve papa‐ita sa erero paeaiape, a—, ereve hiehe tapu la e sa turi morava vovea. 49Lōfeare vei Ualare areve haiovoro ita o mō ōpe, Ara peroveta karu aeata aposetolo karu ita la erero tai itapi, ere lea karu hea la paea, hea ta hasiavai roi. 50Lōfeare vei mea taotao karu kaiae tava ovai roi ipi peroveta karu foromai ve sisapaiape ovo vei, mearovaeka ve oarehōva soa voa itiiti faitora. 51Okofa ara o ero mō auai, Soa Abela ve ovo soa Sakaria, alitara aea safu rovaea oti ve aru soa voa paea opōpe lea vita ve ovo ve tava mea taotao karu sa miarai roi.#Gen 4:8; 2 Basil 24:20–21

52Ahai‐e, e vei Safu Karoro ore karu e! ipi e haiore utape ve fapaita ki la fareovai; e elore maea kofa sa oropai sore, a—, oropai vei haikaeaita karu ta sukelapai vovea.

53Soka Iesu lea uvi kiripi terōpe soa, Safu Karoro ore karu aea Farisea karu ita arero sosori o ita o haiiri mei, etau rauapo vei arero o serea ita haisa lalasi lei lei, 54kekevari taiape, areve o aea la ovi arero lei kaiae leiti vei.

Currently Selected:

Luka 11: TQO1983

Highlight

Copy