Luka 10

Evanelia tivi karu seventy‐two

1Lea ve aite voa Papuvita karu haria hea seventy‐two la haikaea ovi, arero marota ita marota ita itapōpe, are forerai vei leiape lea karikara haroharo aeata otioti foromai ita voa areve omopa voa everori isorai vei. 2Are erero mō ōpe, Fare sora rauapo, a—, tivi karu hiake, lea vei forōva oti ve Papuvita la loki leitia, are areve forōva oti voa tivi karu hea ta itapai vei.#Mat 9:37–38 3Maea lei isorai puavaia; mea ore leitia, ara ero usoso mamoe mere la furuka ave merava ve aru voa itapaipeta fefeare.#Mat 10:16 4Moni oroa, aea surua aivaiva, aeata tamaka maea aea ita la levi maravi isaia; aea otiharo voa karu la eapo o si moi vei levi sukatei pavaia.#Mat 10:7–14; Mak 6:8–11; Luk 9:3–5 5E oropai vei leita lea uvi voa, e mō o aura mei eavai, Mea uvi karu e, e foforoe meha. 6Soka maeaforoe karu lōvoa peit’ oria, eve maeaforoe ta are voa peava roi; a—, lōfeare leiti auke leitit’ oria, eve maeaforoe e ita ata kerori roi. 7Ero mei oropaita lea uvi kofa voa pavaia, omopa posaseaita larietau ita ma ita la au laria, ipi tivi karu ereve tivi tava ovaita haura reha. Uvi hariaharia voa levi teraia.#1 Kor 9:14; 1 Tim 5:18 8E karikara aea voa oropi, karu ero maeafukapait’ oria, ero omopa posaseaita larietau au laria. 9Ereve eka karu ta lei lareva lei erero mō aria, Ualare ve basileia ero tai foreri haekao voa la mea. 10A—, e karikara aea voa oropi, karu ero maeafukapai auke leitita, a—, e karikara pisiri voa forera o mō aria,#Apos 13:51 11Eve karikara ve tetere elave mora voa pasaeaita la ela roroapi sisapai ero sukavuteaita peise vei; etau farakeka e ore leitia Ualare ve basileia ero tai foreri haekao loita meha. 12Ara ero o moi, seseōvi tava miaraita lea sare voa Sodoma kaiae ve tava pasoa ovai roi, a—, lea karikara kaiae ve tava pasou rovaea ovai roi.#Gen 19:24–28; Mat 11:24; 10:15

Sukaerereal auke karikara karikara

(Mataio 11:20–24)

13Ahai‐e Korasini aea Betesaida vei! Ipi euka voa ara sa leivota lea siahu etau etau ara Turo aea Sidono ita voa leitit’ oria, ereuka ve karu pute puta mopa mopa a’ afutae voa ava ava a’, haiiri evera kerori lare.#Isa 23:1–18; Esek 26:1—28:26; Ioe 3:4–8; Amos 1:9–10; Seka 9:2–4 14A—, seseōvi tava miaraita soa voa Turo ita Sidono ita kaiae ve tava pasoa ovai roi, a—, e kaiae ve tava pasou ovai roi. 15A ta reha, Kaperanauma e, a kauri voa moravi patai roi ei? Kakaeite, aro mearovaeka ve hiairi voa sukavutea faukai roi.#Isa 14:13–15

16Eve o la mapaita lea karu, araro ta mapai roi, aea ero sukavuteaita lea karu, araro ta sukavuteai roi, aea araro sukavuteaita lea karu araro itapōpe Ualare ta sukavuteai roi.#Mat 10:40; Mak 9:37; Luk 9:48; Ion 13:20

Karu seventy‐two ata keroripe

17Soka lea karu seventy‐two hailareva ita ata kerori mō ōpe, Papuvita e, ela ave rare ita moita soa, harisu ta elaro mapi kakeva leititore. 18Lō mei are erero mō ōpe, Ara Satani oeia la ofae eavaita usoso kauri voa mavaita kevaro feare. 19Mapaia, ara siahu ero miaraita meha, ikaroa aeata a‐misa ita la mora sa patai vei, aea Ote Vita maealolo ve siahu foromai la mora sa pōvi sari vei; aea etau aea sa ero levi hasiavai roi.#Sal 91:13 20A—, harisu sa eve o la mapaita lea vei hailareva levi leitia; a—, hailareva mea etau vei leitia, ipi eve rare la kauri voa uka siseipeta lea vei.

Iesu ve hailareva

(Mataio 11:25–27; 13:16–17)

21Lea soa kofa voa Iesu Arahoha Lareva vei hailareva lei mō ōpe, Oa, kauri ita mearovaeka ita ve Papuvita e, ara aro maeati ipi mea etau la haiore ita haiiri pisasa ita karu voa arorisa sisea, a—, erero haiiri tero karu la muiai; Oa e, okofa, ipi a sa maeaforoe leiti haikaeaita haiiri reha.

22Etau foromai la arave Oa sa araro miōri laisisea. Karu farakeka aeata Atute ve eite kofa la ore kasirau, a—, Oa sa haria; aea karu farakeka aeata Oa ve eite kofa ta ore kasirau, a—, Atute sa haria, aeata Atute sa Oa la muiai haikaeaita lea karu ta reha.#Ion 3:35; 10:5

23Lea mea are satiriaraita karu tai kerori erero murufakao mō ōpe, E sa eavaipeta mea etau la eavaita karu lareva ia! 24Ipi ara ero omoi, peroveta karu ita king karu rauapo ita e ofae eavaipeta mea etau la eavai haikaeaiape, a—, eavai kasirau; aea e mapaipeta mea etau la mapai haikaeaiape, a—, ere mapai kasirau.

Samaria karu lareva

25Soka Safu Karoro ore vita farakeka Iesu la seseōvai vei itei mō ōpe, Satiriaraita Papuvita e, ara lekōru la lei, peita makuri la ovai vei.#Mat 22:35–40; Mak 12:28–34 26Are arero mō ōpe, Safu Buka voa o lea’ uka sisea, a muti seseōvaia leafeare? 27Are tava o mō ōpe, A Papuvita ave Ualare ave haiiri foromai ita ave ove foromai ita, aea ave rofo foromai ita, aea ave ore leita haiiri foromai ita haikakare leiti vei; o aeata meha, aro haekao peita karu la ave elore maea feare haikakare leiti vei.#Levi 19:18; Deut 6:5 28Soka Iesu arero o mō moipe, A tava o haura moi; lōfeare leitita, a—, a makuri leiti roi.#Levi 18:5

29A—, are areve lalasi o la lei haura leiti haikaea, Iesu la mō ōpe, Arave haekao peita karu leisa?

30Iesu tava o mō ōpe, Karu aea Ierusalema kiripi fauka, Ieriko voa kavaiape soa are irori ita torea leita karu sa sukaea, ere areve puta foromai la fareōvi, arero sarisari savae toa toa kiripōpe. 31Maso tivi karu aea lea otiharo voa foreri, arero ofae eovi, otiharo itai voa foapōpe. 32Levi karu aea ta lōfeare lei, lea oti voa foreri, arero ofae eovi, otiharo itai voa ta foapōpe. 33A—, sariva lei meiape Samaria karu aea are eaeiape lea oti voa foreri, arero ofae eovi arero rapi maeaforoe lei,#2 Basil 28:15 34arero tai te teoru, aea uaina areve maea murisi murisi la sisōvi, puta sa fasōpe; aea are arero moravi areve asini ve kōu‐uti voa miavi, arero sariva karu ve uvi voa lariōvi iti kiva leipe. 35Soka aite sare voa are moni koru oraka oroa voa pauovi, lea uvi papuvita la miōri mō ōpe, Arero kiva leitia, aea a etau aea la itaea leitit’ oria, lea ve tava ara ata kotita lea soa voa aro miarai roi. 36Aita, ave haiiri leafeare, lea karu oroisoria voa, torea karu sa hasiavōpe lea vita ve haekao peita karu kofa leisa? 37Are mō ōpe, Arero maeaforoe leipe lea vita. Iesu arero mō ōpe, A ta te lōfeare leitia.

Mareta auke Maria ia

38Soka ere sariva lei roroa karikara aea voa forerōpe, lōvoa ua farakeka rare Mareta sa elore uvi voa arero maeafukapōpe.#Ion 11:1 39Are morōvu ia rare Maria; aea mea morōvu forera, Papuvita ve mora ipi voa avi areve o la mapaiape. 40A—, Mareta larietau tivi vei heafo lei lei, maea kakapiso lei, arero tai forera mō ōpe, Papuvita e, a haiiri seseōvaia kao ei, ipi arave morōvu araro kiripi tivi ara sa haria la leipea. Arero o moia araro toarai vei. 41A—, Papuvita tava o arero mō ōpe, Mareta e, Mareta e, a etau rauapo vei haiiri heafo lei haisora loi; 42a—, haikaeaita etau farakeka sa haria. Maria sa haikaea ovaita etau lareva kofa, aea lea etau la are voa levi fareovai roi.

Currently Selected:

Luka 10: TQO1983

Highlight

Copy