Luka 9

Iesu areve aposetolo la itapōpe

(Mataio 10:5–15; Mareko 6:7–13)

1Soka are lea twelve karu la isa kokoruka rofo ita, siahu ita erero miarōpe harisu foromai la larivati, aeata eka hariaharia la lei lareva leiti vei. 2Are Ualare ve basileia la itoro ari vei, aeata eka karu la lei lareva leiti vei erero itapi mō ōpe, 3Eve sariva vei etauroro levi maravaia, mora kaika kao, oroa ta kao, larietau ita moni ita ta kasirau, aeata maea puta orakoria ta levi maravaia.#Luk 10:4–11; Apos 13:51 4E oropaita lea uvi voa, au pavaia, pepepe e maea lei teraita lea soa voa. 5Ero maeafukapai auke leita lea karu, e ereve karikara la kiripaita soa eve mora voa pasaea siseita tetere la pailalaea sisapaia ereve mai maealolo ve muiaita peise vei.

6Soka ere maea lei karikara haroharo voa te Ovoro Lareva itoro a’, eka karu la lareva lei vovo roroaipe otioti foromai voa.

Heroda ve haiiri ve heafo

(Mataio 14:1–12; Mareko 6:14–29)

7Soka lohio karu Heroda are Iesu sa leiape etau foromai ve fari la mapōpe lea mea, haiiri kapekapeōpe, ipi karu hea mō ape, Ioane opi ata itoita meha.#Mat 16:14; Mak 8:28; Luk 9:19 8Hea ta mō ape, Elia ata foreraita meha, aea hea ta mō ape, Evera soa ve peroveta karu aea ata foreraita meha. 9A—, Heroda mō ōpe, Ioane ve harofave la ara sarapi fareovōpe; a—, ara mōfeare etau are vei mapaipeta, mea vita leisa? Aea are Iesu la ofae eavai vei otiharo seseōvaiape.

Iesu karu 5,000 la savuōpe

(Mataio 14:13–21; Mareko 6:30–44; Ioane 6:1–14)

10Soka aposetolo karu ata keroripe lea mea, ere sa leiape etau ve fari arero o moipe. Soka are erero murufakao lariōvi, karikara rare Betesaida voa kavōpe. 11A—, karu sitavu lea la ore lei, ere arero aitetaipe. Are erero hailareva o ita sukaea, Ualare ve basileia vei erero itoro a’, aea eka karu la lei lareva leiape.

12Soka sare sōsi leipe soa twelve karu koti arero mō ōpe, Karu sitavu la mea itai itai forōva oti ita karikara karikara voa itapaita leafeare, ere larietau ita ivutu oti ita la lōvoa sukaeai vei; ipi ereita mōvoa oti merava voa roroa. 13A—, are erero mō ōpe, Eve elore mai sa larietau erero miaraia. Soka ere mō ōpe, Ela te mea karu foromai vei larietau itaea leiti auke leitita, a—, eite poi koru five aeata ekaka orakoria haria ia. 14Ipi ere heavita 5,000 feare. Soka are areve satiriaraita karu la mō ōpe, Erero lei firufiru ava puavaia, firu farafarapo voa karu fifty feare. 15Soka ere erero lōfeare lei, ere ava puavōpe. 16Are lea poi koru five aea lea ekaka orakoria ita la ovi, kauri voa misilei, larietau vei Ualare la maeati, larietau fofi, satiriaraita karu la miōri ere karu sitavu la omopa posaseōpe. 17Soka ere foromai larietau la’ la’ ére popōpe. Aea ere larietau ve hohoi hohoi la maravi, vovoisea vovoisea posea twelve soōpe.

Iesu are Ualare ve Keriso

(Mataio 16:13–20; Mareko 8:27–30)

18Soa aea voa are hariakao Ualare la loki lei vovo meiape; satiriaraita karu ta lōvoa. Soka aite voa are erero lalasi lei mō ōpe, Karu araro lea’ moitore, ara leisa? 19Ere tava o mō ōpe, Ioane Bapatiso Vita; hea mō aritore, Elia; aea hea ta mō aritore, ata itoita evera peroveta karu aea.#Mat 14:1–2; Mak 6:14–15; Luk 9:7–8 20Soka are erero mō ōpe, A—, eo, e araro lea’ moitore, ara leisa? Petero tava o arero mō ōpe, A Ualare ve Keriso.#Ion 6:68–69 21Soka are erero o kere ita o erere ōpe, ere lea o karu aea la levi moi vei.

22Are ta mō ōpe, Karu ve Atute aite haisora rauapo leiti roi, aea omopa sorasora, aeata maso harofave karu, aeata Safu Karoro ore karu arero sukavutea, arero paea opi, a—, are oroisoria sare voa ata itoi roi.

Makuri leita o

(Mataio 16:24–28; Mareko 8:34—9:1)

23Aite are karu foromai la mō ōpe, Karu aea araro aitetai haikaeai oria, are areve elore maea la haiarara lei, areve satauro la saresare taiovi, araro lōri aitetaia.#Mat 10:38; Luk 14:27 24Ipi areve makuri la kiva lei meita lea vita ve makuri la lei veverapai roi; a—, areve makuri la hoare a’ ara vei veverapaita, a—, lea vita makuri la ovai roi.#Mat 10:39; Luk 17:33; Ion 12:25 25Karu aea mearovaeka foromai la ovait’ oria, a—, areve iri ve makuri la lei hasiōvi veverapaita, a—, lea etau are vei lareva leavoa? 26Ipi ara vei aeata arave o vei maeamariti leitita lea vita, Karu ve Atute ta are vei maeamariti aite leiti roi are areve sosorusosoru, areve Oa ita safu aneru ita ve sosorusosoru ita kotita lea soa voa. 27Ara ero okofa ita omoi, mōvoa pepeipeta karu hea levi opai roi pepe ere Ualare ve basileia la ofae eavai ao.

Iesu raepa voa soso toarōrisa haria leipe

(Mataio 17:1–8; Mareko 9:2–8)

28Soka lea o mei mei sare eight feare leipe soa, are Petero aea Ioane aea Iakobo ita la lariōvi, Ualare la loki leiti vei raepa voa pataipe.#2 Pet 1:17–18 29Patei are Ualare la loki leiape soa, areve soso toarōrisa maea haria lei, areve puta kevarokevaro fei, seaseakao leipe. 30Lea mea heavita oraka, Mose auka Elia ita, 31sosorusosoru ita foreri, are ita laua sukōvi are Ierusalema voa opi, Ualare sa haikaeaita mai lōri lei kekese leiti o la moiape. 32Soka Petero aea areve maeapavora karu oraka ita ivutu sisea, itei areve sosorusosoru aea are ita fareho soi pepeiape heavita oraka ita la ofae eavōpe. 33Soka lea heavita oraka Iesu la kiripai vei leipe soa, Petero Iesu la mō ōpe, Papuvita e, ereita mōvoa pavaita lareva; ela harotōvu oroisoria safai vei, farakeka a vei, farakeka aea Mose vei, farakeka aea Elia vei. A—, are lea o ve eite seseōvi auke ita moipe soa, 34mea‐e koti erero aierōpe reha. Soka mea‐e sa erero aierōpe soa satiriaraita karu oroiso tore leipe. 35Lei, mea‐e voa o foreri mō moipe, Mea arave Atute, ara sa haikaea ovaita farakeka, arero mapaia.#Isa 42:1; Mat 3:17; 12:18; Mak 1:11; Luk 3:22 36Soka lea o mei kaleipe lea mea, ere ofae Iesu la haria eavōpe. Ere ofae eavōpe lea etau ere laua tōva lei sukavai kasirau, aea lea soa voa karu aea ta omoi kasirau.

Iesu harisu sa toōpe siare la lei lareva leipe

(Mataio 17:14–18; Mareko 9:14–27)

37Lea aite sare voa ere raepa voa fafuka forerōpe lea mea, karu sitavu rovaea arero sukaeōpe. 38Soka heavita farakeka aea karu sitavu ita pea mō isa moipe, Satiriaraita Papuvita e, ara aro loki arave atute la eapo ofae eavaia, ara atutemori aeata kasirau. 39Harisu arero toaia lea soasoa voa are utohoa maea fi a’ mora ita mai ita sukasuka a’, ape soare foreri, lea harisu arero toatoa maea opaopa a’, arero heafo ita kiripa vovea. 40Ara ave satiriaraita karu la loki loi lea harisu la larivatai vei, a—, ere usoso leiti kao. 41Iesu tava o mō ōpe, E sukaerereai auke ōvafae kere maraiosu tao e, ara e ita fareho mea, ero morari vovo meia soa savori leafeare? Soka are lea atute ve oa la mō ōpe, Ave atute mōvoa lariōvi kotia. 42Are kotiape lea soa kofa voa harisu arero toatoa, are mai ita mora ita sukasuka ape. A—, Iesu lea harisu maeasiaviri la o erere a’, siare la lei lareva lei, arero areve oa la ata miarōpe. 43Karu foromai Ualare ve siahu rovaeka vei haihava leipe.

Iesu areve opai vei o ata moipe

(Mataio 17:22–23; Mareko 9:30–32)

Ere foromai Iesu sa leiape etau foromai vei haihava leiape lea soa voa, are areve satiriaraita karu la mō moipe, 44Mea o eve ōvauta iri voa sukafori kiva leitia, Karu ve Atute la karu ve mai voa miarai roi. 45A—, ere lea o vei haiiri ovava leiti kao, aea lea o ve eite ta ere voa au milafukōpe, ere lea o la ore levi leiti vei; aea ere lea o vei arero lalasi leiti vei tore leipe.

Karu rovaea leisa?

(Mataio 18:1–5; Mareko 9:33–40)

46Soka ere o serea elore elore ape ipi ere voa rovaea vita leisa.#Luk 22:24 47A—, Iesu ereve seseōvaiape haiiri la ore leipe lea mea, are atute seika aea la ovi, areve maea maria voa vipi, 48erero mō ōpe, Mea atute la arave rare vei maeafukapaita lea vita, araro ta maeafukapai roi; aea araro maeafukapaita lea vita, araro itapōpe Ualare ta maeafukapaitore. Ipi e foromai ve aru voa seika kofa leita lea vita, eve rovaeka vita are reha.#Mat 10:40; Luk 10:16; Ion 13:20

49Soka Ioane o mei mō ōpe, Papuvita e, ela karu aea sa ave rare ita harisu la larivataia la ofae eovi, ela arero o erere arita, ipi are ereitaro aitetei mei sore. 50A—, Iesu arero mō ōpe, Arero o erere levi aria, ipi ero sukavuteai auke leita lea karu eve maeapavora reha.

Samaria karikara aea voa

51Soka arero kauri voa fareōvi patai vei haekao leipe soa voa, are haiiri foromai kekese leipe Ierusalema voa patai vei. 52Lei are meu karu areve omopa voa itapi, ere maea lei Samaria karu ve karikara aea voa etau are vei lei kekese leiti vei isei oropōpe. 53A—, lea karikara karu arero maeafukapai vei haiarara leipe, ipi areve sariva ve soso Ierusalema voa muiōpe eavia. 54Soka areve satiriaraita karu oraka, Iakobo auka Ioane ita, lōfeare la eovi mō ōpe, Papuvita e, a haikaeaipea ei, elaka sarita a la mei kauri voa fauka erero sa’ saroroapai vei?#2 King 1:9–16 55A—, are aiterori a’, ereukaro o erere ōpe. 56Soka ere maea ata lei karikara haria voa isei forerōpe.

Iesu la aitetai haikaeaita karu

(Mataio 8:19–22)

57Soka ere otiharo voa isaiape soa, karu aea arero mō ōpe, A sa meita lea otioti foromai voa ara aro aitetei meava roi. 58Lō mei Iesu arero mō ōpe, Furuka ave merava merava ereve iroropaita uta‐uta ia, aea fufukaita ori ta ereve orea avaita tōvu ta ia; a—, Karu ve Atute areve harofave miavaita oti kasirau. 59Are karu aea la mō ōpe, Araro aitetai kotiria. Lō mei are mō ōpe, Papuvita e, ara rapi te arave oa viopai ao. 60A—, Iesu mō ōpe, Opai karu ereve haria opai karu la viopaia; a—, a koti Ualare ve basileia la itoro ōvovo meava. 61Karu aea mō ōpe, Papuvita e, ara aro aitetai roi, a—, ara arave elore karu la kiripai o omoi ao.#1 King 19:20 62A—, Iesu mō ōpe, Siva la mai ovi, a—, aiterori arita lea karu are Ualare ve basileia vei usoso kasirau.

Currently Selected:

Luka 9: TQO1983

Highlight

Copy