Luka 1
1
1Teofilo lareva e, ipi karu rauapo sa ereitave aru vo lei foreraiape mai ve fari la ukai vei seseōvaiape, 2usoso oarehōva soa voa lea etau la ofae eovi aeata Ovoro Lareva la itoro ape karu sa ereitaro lei ore leiape o feare; 3ara ta reha, soa savori voa lea o ve eite la haisukafori eli eli ore lei, lea fari la a vei metakao ukai vei haiiri ta ovai. 4Lea vei a ore leiti roi aro satiriaraiape lea o okofa ia.
Sakaria auka Elisabeta ia
5Iudea ve King Heroda ve soa voa, maso tivi vita aea peiape, areve rare Sakaria, are Abia ve firu karu aea. Areve ua Aarona ve maiape mori, areve rare Elisabeta reha.#1 Basil 24:10 6Ereuka auka mai haura leiape Ualare ve omopa voa, Papuvita sa moipe safu o la miroapai auke ita kiva lei vovo roroaiape. 7A—, ereuka atutemori kasirau ipi Elisabeta are korōvu, aea ereuka ta oasora uasora ita eavia.
8Soka Sakaria areve firu karu ve otoare maso tivi soa forerōpe lea mea, are Ualare ve safu uvi voa foreri maso tivi leiape. 9Lei, lea maso karu sa leiape mai feare, ere feai fasi are voa forea miarōpe, aikaera muforoe a‐eaita tivi leiti vei. Are Ualare ve safu oti voa oropōpe; 10a—, veveu vei kokorukōpe karu foromai maria voa seseravi, Ualare la loki leiape. 11Lea soa are Papuvita ve aneru aea, aikaera muforoe ve alitara ve mai toare itai voa soi peiape la ofae eavōpe. 12Eovi are haiisei tore leipe reha. 13A—, lea aneru arero mō ōpe, Sakaria e, tore levi leitia, ipi ave loki o Ualare sa mapi, ave ua Elisabeta atute a vei epi, a areve rare Ioane rare la aravai roi. 14A hai itatapi haimeta lei, karu rauapo arero mi arita lea vei ta hailareva leiti roi. 15Ipi Papuvita ve omopa voa are rovaeka lei meava roi; are uaina ita maeakakare leita ma ita la levi lari roi, a—, soa are areve lou ve ére iri voa aiseseaita soa voa Safu Arahoha Lareva sa areve iri voa sukafasi peava roi.#Num 6:3 16Are Israela ve susumori rauapo la lei kerori, Papuvita ereitave Ualare tai lei forerai roi; 17aea are Elia ve arahoha ita siahu ita ovi Papuvita ve omopa voa meava roi, oa‐ita ve haiiri la lei, ere atutemori ita haiiri farakeka leiti vei, aeata ōvafae kere karu ta lei kerori haiovoro lei, ere mai haura karu leiti vei; aeata Papuvita vei karu firu aea la lōfeare sa lei foreri kekese leiti vei.#Mala 4:5–6
18A—, Sakaria lea aneru la mō ōpe, Ara mea etau leafeare ore leiti roi? Ipi ara oasora, arave ua ta uasora. 19Lō mei aneru tava o arero mō ōpe, Ara ita Gabriele, Ualare ve omopa voa soi peita vita; araro aro tai itapai, mea fari lareva la aro omoi vei.#Dan 8:16; 9:21 20Mapaia, a okuku lei, laua sukavaita haveva leiti roi pepepe mea etau foreri roroka leitita lea sare voa, ipi a arave mea o la sukaerereai auke loita eavia. A—, lea etau ve eite areve soa kofa voa forerai roi.
21Soka veveu vei kokorukōpe karu Sakaria la tai tai are Ualare ve safu oti iri voa mai savori leipe lea vei, ere haihava leipe. 22Lei, are pisiri voa forerōpe lea mea are o erero omoi usoso leiti kao. Ere haiiri voa ovava mō leipe, are safu oti voa haiako auka la paeai, are mai ove sa muia muia a’ okuku lei peiape. 23Pepe areve tivi sare sare sa kaleipe lea mea, are elore voa lōfeare te pavōpe.
24Soka lea soa ve aite voa areve ua Elisabeta ére ovi, areve maea la papare five voa arorisa avi mō ōpe, 25Papuvita sa araro ofae fofoisa araro mai mōfeare loita meha, karu ve aru voa arave maeamariti la lei maea ovotolo fererōpeai vei.
Maria
26Soka papare six leipe soa, Ualare aneru Gabriele la Galilea karikara aea rare Nasareta voa itapōpe. 27Morihōva aea rare Maria lōvoa peiape. Are eite Davida ve maiape karu Iosefa vei, mai etau miarōpe morihōva reha.#Mat 1:18 28Soka lea aneru arero tai foreri arero mō ōpe, A eapo meha, Ualare sa maeaforoe leita mori e, Papuvita a ita fareho laipea! 29A—, Maria lea o la mapi haiiri heafo lei, lea eapo o ve eite vei haiiri pōvi seseōvaiape. 30A—, aneru arero mō ōpe, Maria e, tore levi leitia, ipi a Ualare voa maeaforoe la sukaea mea. 31Mapaia, a ére ovi, atute la epi, areve rare Iesu rare aravai roi.#Mat 1:21 32Are rovaea kofa lei, arero Koakoa‐eiteapo Ualare ve Atute rare aravai roi; aea Papuvita Ualare sa papa Davida ve king ve siahu arero miōri,#2 Sam 7:12, 13, 16; Isa 9:7 33are Iakobo ve toruipi karu voa king lei pepe, areve basileia sarapai auke lei lōri peava roi.
34A— Maria aneru la mō ōpe, Ara heavita aea ore kasirau; mea etau leafeare forerai roi? 35Lō mei aneru mō ōpe, Safu Arahoha Lareva aro tai fauka Koakoa‐eiteapo Ualare ve siahu sa aro aierai roi; lea vei a sa mi ari vei leipeta lea mere safu rare aea Ualare ve Atute rare ta aravai roi. 36Aea mapaia, ave aiōvu, Elisabeta areve uasora soa voa are ta ére ovi atute la epai roi; korōvu rare a’ meita lea ua are ta ére ovi, papare six lei la me reha. 37Ipi Ualare sa etau foromai la leitita ore kofa.#Gen 18:14
38Soka Maria mō ōpe, Ofae eavaia, ara Papuvita ve sarufa mori; usoso ave lea o feare, ara voa mai lōfeare leitia. Soka aneru arero kiripi terōpe.
Maria auka Elisabeta ia
39Soka sare aea voa Maria maea lei lavelave isei raepa oti, Iuda ve karikara aea voa foreri, 40Sakaria ve uvi voa oropi, Elisabeta la eapo o ōpe reha. 41Soka Elisabeta are Maria sa moipe lea eapo o la mapōpe soa, areve ére voa aiseseiape lea mere mikumiku au ōpe. Elisabeta Safu Arahoha Lareva sa soa’, 42are ape rovaea isa mō ōpe, Uamori foromai voa a sa lareva kofa ia aeata ave ére ve fare ta lareva kofa! 43Ara mea maeati leafeare sukaeai arave Papuvita ve lou sa araro tai foreri meipeta lea vei ei? 44Ipi mapaia, ave eapo o ve fi arave ōvauta sa mapaita soa arave mere arave ére voa hailareva lei mikumiku auai. 45A lareva ia, ipi a sa papuvita voa mapaia lea o etakofa leiti roi a sa lōfeare sukaerereaipeta lea vei.
Maria ve hailareva leita fara
46Lea mea Maria mō ōpe,
Arave haiiri Papuvita la maea la atipea.#1 Sam 2:1–10
47Aea arave ove araro lei makuri leita Ualare voa hailareva rovaea la leipea.
48Ipi are araro, areve sarufa mori ve merava la maeaforoe ita ofae fofoisaita.
Lea vei taotao foromai araro lareva o ari roi soa faitora pepe peava roi.#1 Sam 1:11
49Ipi Ualare rofo rovaekapo, areve rare ta Safu, are sa haihava etau ara voa loita meha;
50Aea are arero tore lei roroaita lea taotao foromai la maeaforoe lei pea vovea.
51Are areve mai sa areve rofo la muia,
maeamarōva karu la ereve haiarori haiiri ita voa lei fu arita meha.
52Are harofave karu la lei ereve terona voa fafuka,
merava karu la lei papatavi laipepea.#Iob 5:11; 12:19
53Eroa sa soita karu la are etau lareva sa savua ére popi,
pisoso karu are maea harokao ita itapi terai.
54Ipi areve maeaforoe la haikaeai vei;
are areve sarufa Israela ve toruipi la toari laipea,
55Abrahamo areve meavumōla ita la maeaforoe lei pei vei,
usoso are ereitave papa ita ōpe lea otoare feare.#Gen 17:7
56Soka Maria are Elisabeta ita fareho papare oroisoria feare pōvi, pepe aite are kerori ata elore voa au kavōpe.
Elisabeta atute la epōpe
57Soka Elisabeta ve mi ari soa foreri, are atute la epōpe. 58Areve haekao pepeiape karu, areve paumarehari ita Papuvita sa leipe maeaforoe rovaea ve fari la mapi, are ita fareho hailareva leipe. 59Lei, eight sare voa ere lea atute la peritome leiti vei kokoruka, ere arero areve oa ve rare Sakaria rare aravai vei haikaeaiape:#Levi 12:3 60a—, areve lou mō ōpe, Lōfeare kasirau; a—, arero rare Ioane la aravaia. 61Lō mei ere arero mō ōpe, Ave paumarehari voa lea rare karu kasirau. 62Soka ere areve oa la mai ove sa lalasi leipe, are sa haikaeaita rare leisa ere lea la ore leiti vei. 63Lei, are ukaita susu vei mai muia ovi koti, o mō ukōpe, Areve rare Ioane. Ere farehoria haihava leipe. 64Soka areve ape utohoa fapi areve uri orali lei are laua sukōvi, Ualare la maeatipe. 65Ereukave haekao pepeiape karu foromai tore lei, aea karu mea etau foromai ve fari Iudea raepa oti‐oti foromai voa laua sukavaiape. 66Sukōvi sukōvi, lea fari la mapaiape karu haisukafori kaeakaea a’ mō ape, Mea atute are lea’ leiti roi? Ipi Papuvita arero toaraiape eavia.
Sakaria ve hailareva o
67Soka areve oa Sakaria Safu Arahoha I areva sa soa’ itoro a’ mō ōpe,
68Papuvita, Israela ve Ualare la maeatia;
ipi are areve toruipi karu tai foreri erero sukahavoeaita meha.
69Are ereita vei areve sarufa Davida ve maiape voa
lei makuri leita vita la lei foreraita meha,
70usoso areve o evera soa pepeiape areve lea safu peroveta karu ve ape sa moiape lea o fefeare;
71ereitave ote karu aea ereitaro kaifa leita lea karu foromai ve mai voa
ereitaro fareōvi lei makuri leiti vei.
72Ualare ereitave papa karu la maeaforoe leiti o ōpe,
areve safu otoare la haikaeai vei;
73are sa ereitave papa Abrahamo la ōpe lea otoare,
74ipi ereitaro ereitave ote karu ve mai voa fareōvi,
ereitaro lei tore auke ita arero maso toai vei,
75safu mai ita mai haura ita areve soso voa roroai vei,
ereitave makuri ve sare sare foromai voa.
76Soka ao, atute e, aro Koakoa‐eiteapo Ualare ve peroveta vita rare aravai roi;
ipi a Papuvita ve omopa voa terai roi
areve otiharo la lei kekese leiti vei.#Mala 3:1
77A makuri ve otiharo areve toruipi karu la satiriarai roi,
ipi ereve iri kaiae la sasukai vei.
78Ipi ereitave Ualare ve maeaforoe rovaea eavia,
are usoso ōpai voa pataita sare feare arori voa avi ovava ereita voa haeai roi.
79Murumuru voa aeata opai ve tōvu ora voa pepeipeta lea karu la lei ovava haeai vei,
ereitave mora la tairu ve otiharo voa lei terai vei.#Isa 9:2
80Soka lea atute asi asi rovaea lei, haiiri ove voa rofo lei, furuka voa peiape pepe are sa Israela voa pisiri muiōpe lea sare voa.
Currently Selected:
Luka 1: TQO1983
Highlight
Share
Copy
Want to have your highlights saved across all your devices? Sign up or sign in
Published by the Bible Society of Papua New Guinea in 1983.
