Luka 2

Iesu la Betelehema voa epōpe

(Mataio 1:18–25)

1Lea soa voa Kaisara Augusto safu o itapi moipe, Areve basileia ve karu foromai ve rare rare ukai vei. 2Oarehōva rare ukōpe soa reha, Kurenio are Suria ve gavana leipe soa voa. 3Lea vei karu foromai rare ukai vei ereve elore elore papa karikara voa terōpe.

4Iosefa ta reha, Nasareta Galilea soa ve karikara kiripi Iudea voa isei forerōpe, King Davida la epōpe karikara voa rare Betelehema, ipi Davida areve papa eavia; 5lōvoa areve rare ukai vei, areve mai etau miarōpe ua Maria ita farehoria, are ére ia. 6Ereuka lōvoa pepeiape lea soa voa, areve mi ari soa forerōpe. 7Are areve atute toare la epi, arero puta sa fasi fasi ovi boromakao ve larietau susu voa vuapōpe; ipi sariva karu ve uvi voa oti auke leipe eavia.

Mamoe kiva karu aea aneru ita

8Mamoe kiva karu hea lea mea ve kavuru oti voa ereve mamoe sitavu la faita soa kiva lei aipepeiape. 9Lea mea Papuvita ve aneru aea erero tai foreri, Papuvita ve sosorusosoru sa ere voa haea eakoa toepi, ere tore foromai leipe. 10Lei, lea aneru erero mō ōpe, Tore levi leitia; ipi ara fari lareva ero omoi vei foreri mea, karu foromai la lei hailareva rovaea leiti vei. 11Ipi faitora Davida ve karikara voa ero lei makuri leiti atute la epaita meha, Keriso Papuvita are reha. 12Peise e vei mōfeare: e boromakao ve larietau susu iri voa puta sa fasi eaeipeta mere la eavai roi. 13Soka utohoa kauri ve aneru sitavu foreri, lea aneru ita fareho topiari Ualare la marase a’ mō ōpe,

14Koakoa‐eiteapo oti voa Ualare la maeatia,

aea maearovaeka voa tairu are sa ere vei hailareva leita lea karu voa leitia.

15Soka lea aneru sitavu sa erero kiripi kauri voa ata papatavōpe soa voa, lea mamoe kiva karu elore elore mō ōpe, Ereita Betelehema voa te, Papuvita sa ereitaro lei ore loita mea etau la ofae eavai vei. 16Lōfeare mei ere lavelave te foreri, Maria aea Iosefa aeata boromakao ve susu iri voa eaeiape mere la eavōpe reha. 17Eovi, ere aneru sa erero lea atute vei moipe o la pisiri fafarapōpe. 18Soka mapaiape karu foromai mamoe kiva karu sa moipe lea o vei haihava leiape. 19A—, Maria lea etau foromai la areve haiiri voa miavi haikaeakaea ape. 20Soka mamoe kiva karu ata kerori. Ualare la marase a’ maeati vovo terōpe, ipi ere sa mapi aea ofae eavōpe lea etau foromai usoso erero moipe lea o feare leipe eavia.

21Sare eight kaleipe lea mea arero peritome leiti sare foreri, arero rare Iesu rare la aravōpe, ususo aneru sa Maria arero ére ovai auke soa voa everori moipe lea o feare.#Levi 12:3; Luk 1:31

Iesu la Maso Uvi voa muiōpe

22Soka Iesu auka lou ita la lei ovava leita soa forerōpe usoso Mose sa moipe Safu O feare. Lea soa losefa auka Maria ita atute la ovi, Papuvita la muiai vei Ierusalema voa kei forerōpe.#Levi 12:6–8 23Usoso Papuvita ve Safu Buka voa mōri uka siseita o fefeare, Atute toare foromai la lei ere Papuvita voa safu leiti roi.#Eso 13:2, 12 24Aeata maso etau ta omopa posaseai vei, usoso Papuvita ve Safu Buka voa mōri uka siseita o fefeare, Orilalaisa marota farakeka, ō sua áre orakoria.

25Soka karu farakeka aea Ierusalema voa peiape, areve rare Simeona; are mai haura aea Ualare ve o la kakeva lei haihahari lei, Israela la lei vovoro leiti soa la tai vovo meiape vita, Safu Arahoha Lareva ta are ita fareho peiape. 26Safu Arahoha Lareva sa arero ta o mōri moipe, Are levi opai roi, pepepe are Papuvita ve Keriso la ofae eavai ao. 27Soka Simeona Arahoha Lareva sa lariōvi, Maso Uvi voa oropōpe. Lea mea oalou‐ita atute Iesu la maso uvi voa ovi oropōpe, usoso Safu O voa haikaeaita lea mai feare are vei leiti vei. 28Soka Simeona arero mai sa itapiovi Ualare la maeati mō ōpe,

29Papuvita rovaeka e, faitora a ave sarufa karu la paraea itapaia,

tairu ita terai vei usoso ave lea otoare feare.

30Ipi ave lei makuri leita siahu,

31a torutoru karu foromai ve omopa voa lei kekese leita lea lei makuri leita siahu la

arave ofae sa eavaita meha.

32Ovava kofa meha, toru hariaharia karu la lei ovava lei,

aeata ave toruipi Israela la lei sosorusosoru leiti vei.#Isa 42:6; 49:6; 52:10

33Soka lea atute ve oalou are vei moipe lea o vei haihava leipe. 34Lei, Simeona ereukaro o sa lei lareva lei, areve lou Maria la mō ōpe, Mapaia, mea atute sa foreraita ipi karu rauapo la Israela voa lei putoi vei aeata lei moravai vei, aeata karu sa sukavuteai o arita peise vei, 35karu rauapo ve murufa seseōvaita haiiri lōfeare pisiri voa muiai vei. Lōfeare vei, haiiri eae usoso soi marekeke feare aro suka faropai roi.

36Peroveta ua aea ta reha, areve rare Ana, Fanuela ve mori, Asere ve toruipi ua; are uasora kofa, areve morihōva soa vita laea are ita sisoro seven peiape; 37aite are ua lelesi lei pepepe areve sisoro eighty‐four kaleipe soa voa. Are Maso Uvi kiripai auke ita, sare faita voa larietau avoha lei, veveu ta lei, Ualare la maso toa vovo meiape. 38Lea ora kofa voa are haekao voa foreri, Ualare la maeatipe reha. Are lea atute ve fari Israela la fareōvi lei makuri leita soa la taiape lea Ierusalema karu foromai la omoiape.

Ere Nasareta voa ata keroripe

39Soka Papuvita ve Safu O sa haikaeōpe mai foromai la ere sa lei kekese leipe lea mea, ere ereve elore karikara Nasareta, Galilea soa voa ata kerori kei forerōpe.#Mat 2:23 40Soka lea atute asi asi rofo lei, haiovoro sa soa’, Ualare ve haiforoe are voa lei meiape.

Atute Iesu Ierusalema voa

41Soka sisoro foromai voa Foapaita Sosoka ve soasoa voa areve oalou‐ita Ierusalema voa pataiape.#Eso 12:1–27; Deut 16:1–8 42Iesu sisoro twelve leipe soa are ere ita fareho sosoka voa pataipe, usoso lea soasoa voa leiape mai feare. 43Sosoka ve sare sare sa kaleipe soa ereuka ata kerori maea leipe lea mea, lea atute Iesu lōvoa seraipe. Areve oalou‐ita lea etau ore leiti kasirau. 44A—, ipi ereukave haiiri are karu sitavu ita fareho meiape lea vei, ereuka lea sare savori sariva lei lei, aea aite voa arero paumarehari aea ore leita karu voa arero eliape. 45A—, ereuka arero sukaeai auke lei, ereuka Ierusalema voa ata kerori arero eli vovo pataipe. 46Eli eli oroisoria sare voa ereuka arero Maso Uvi voa satiriaraita papukaru ita farehoria aisesea, ereve o la mapi aea erero lalasi leiape la eavōpe. 47Areve o la mapaiape karu foromai areve haisesera aeata areve tava o vei haihava leiape. 48Lea mea ereuka arero ofae eovi haihava foromai lei, areve lou arero mō ōpe, Atute e, a elakaro mōri loita ipi lekōru? Ofae eavaia, ave oa ara ita haikavora ita aro eli eli la roroa meha. 49Are ereukaro mō ōpe, Euka araro elipeta ipi lekōru? Ara arave Oa ve uvi voa lei vovo mea euka lea ore kao ei? 50A—, are ereukaro moipe lea o ve eite ereuka haiiri fapai kasirau.

51Soka are ereuka ita fareho Nasareta voa kei, ereukaro kakeva lei peiape; a—, areve lou lea etau foromai areve haiiri voa miavi haikaeakaea ape. 52Soka Iesu asi asi haiovoro ita maea ita rovaea lei, Ualare ita karu ita sa haikakare lei vovo meiape.#1 Sam 2:26; Hore 3:4

Currently Selected:

Luka 2: TQO1983

Highlight

Copy