Luka 3

Ioane Bapatiso Vita ve itoro o

1Tiberio Kaisara basileia ve siahu ovi peiape fifteen sisoro voa, Pontio Pilato ta Iudea ve gavana leipe, aea mea karu oroiso ta lohio karu leipe: Heroda Galilea voa, areve paua Filipi Iturea aea Trakonito voa, aea Lusania Abilene voa, 2aeata Anasi auka Kaiafasi ita ereuka maso harofave karu lei peiape lea soa voa, Ualare ve o Ioane Sakaria tai forerōpe furuka merava voa. 3Aea Ioane Ioridana mai ve eakoa toepōpe mea foromai voa te, iri kaiae la sasuka mutapai vei lea haiiri kerorita bapatiso la itoro ari vei te forera vovo meiape. 4Usoso peroveta Isaia ve buka voa mō uka siseipeta o fefeare,

Furuka merava voa karu aea i mō la isa moipea,

Papuvita ve otiharo la lei kekese lei,

areve terai oti la lei haura lei puavaia.#Isa 40:3–5

5Lorara pōkoka foromai la susukea,

raepa mea kupai foromai ita la lei vevete lei,

terai oti kaiae kaiae lei haura lei,

areare otiharo la pitipiti lei,

6maeasarōva karu foromai Ualare ve lei makuri leita siahu la ofae eavai roi.

7Soka karu sitavu Ioane tai bapatiso leiti vei forera forera a’, are erero mō ōpe, Ikaroa ve atutemori e! forerai vei leipeta kitou la kiripi oroai vei ero kureaita vita leisa?#Mat 12:34; 23:33 8Haiiri kerorita eite la muiaia; aea haiiri mōri levi kaeaia, Elave papa Abrahama reha, ipi ara ero o mō la aipea, Ualare siahu ia mea fave korukoru la maravi atutemori Abrahama vei lei foreraita ore.#Ion 8:33 9Mea faitora soa naoita tola ve ipi voa la muiaipea; lea vei fare lareva tai auke leita lea tola foromai la fei putei a voa la toapaipea.#Mat 7:19

10Soka karu sitavu arero lalasi lei mō ōpe, Ela leati roi? 11Are erero tava o mō ōpe, Maea puta orakoria ita karu, are farakeka aea la ovi puta auke karu la miaraia; larietau ita karu ta lōfeare leitia.

12Takis kokorukaita karu hea bapatiso ovai vei ta foreri arero mō ōpe, Satiriaraita Papuvita e, ela leati roi?#Luk 7:29 13Are tava o erero mō ōpe, Takis ve moni kofa la haria maravaia, moni maea aeata levi topiaraia. 14Maola karu hea ta arero lalasi mō leipe, Aea elao, ela leati roi? Are tava o erero mō ōpe, Irori mai ita ō havara apeva ita, karu ve etau la toapi levi maravaia; eve tivi ve tava kofa la haiiri haura ita maravaia.

15Soka areve o la mapaiape lea karu haiiri horahora lei, ereve haiiri voa seseōvi elore maea mō ape, Ioane are Keriso varo. 16A—, Ioane erero foromai la o mōri moipe, Ara ero ma sa bapatiso lei vovo mea; a—, arave siahu la sapataita vita koti vei la roi; ara hiopi, areve tamaka éla la felaukeai vei lareva kasirau; are ero Safu Arahoha Lareva aeata sarita a ita sa ero bapatiso leiti roi. 17Areve mai sa areve miruru la ovi toatoa areve uiti ruru la toaita oti la lei ovava leiti vei, aeata uiti eite la arisovi areve sitoa uvi voa toea miavi, uiti ruru la are futai auke leita a voa suka sisōvi a sa sa’ kaleiti roi.

18Lōfeare kureaita o rauapo ita Ioane sa karu la ovoro lareva itoro ape. 19A—, Ioane lohio karu Heroda ta o erere ōpe ipi areve paua Filipi ve ua Herodiasa ita leipe mai vei, aeata areve mai mealolo hariaharia vei ta reha.#Mat 14:3–4; Mak 6:17–18 20Lea mea Heroda lea kaiae foromai ve arori voa áre aeata topiari mōfeare leipe, are Ioane la dibura uvi voa sasaukōpe.

Iesu la bapatiso leipe

(Mataio 3:13–17; Mareko 1:9–11)

21Soka lea mai leipe soa ve omopa voa, karu foromai la Ioane sa bapatiso leiape lea mea, Iesu ta bapatiso leipe. Bapatiso lei roroka lei, Iesu Ualare la loki leipe soa, kauri fapi, 22aea Safu Arahoha Lareva, usoso sua ve maea feare, arero tai fauka, aea i kauri voa forera mō ōpe, Arave haikakare Atute a reha; ara a vei hailareva leititore.#Gen 22:2; Sal 2:7; Isa 42:1; Mat 3:17; Mak 1:11; Luk 9:35

Iesu ve mileri‐ita ve rare rare

(Mataio 1:1–17)

23Soka Iesu areve tivi oarehōva leipe soa, areve makuri ve sisoro thirty feare reha. Karu ve seseōvaita haiiri are Iosefa ve atute, aeata areve mileri ve asease mōfeare: Heli, 24Matata, Levi, Meleki, Ianai, Iosefa, 25Matatia, Amoso, Nahumu, Eseli, Nagai, 26Maata, Matatia, Semeini, Ioseka, Ioda, 27Ioanana, Resa, Serubabele, Sealtiele, Neri, 28Meleki, Adi, Kosama, Elmadama, Ere, 29Iosua, Eliesere, Iorimi, Matata, Levi, 30Simeona, Iuda, Iosefa, Ionama, Eliakimi, 31Melea, Mena, Matata, Natana, Davida, 32Iese, Obede, Boasa, Salamono, Nasono, 33Aminadaba, Adamini, Areni, Heserono, Perese, Iuda, 34Iakobo, Isako, Abrahama, Tera, Nahoro, 35Seruga, Reu, Pelege, Ebere, Sela, 36Kainana, Afasada, Sema, Noa, Lameka, 37Metusela, Enoka, Iareda, Mahalalele, Kainana, 38Enosa, Seta, Adamu, aeata Ualare.

Currently Selected:

Luka 3: TQO1983

Highlight

Copy