Mareko 16

Iesu opi ata itoipe

(Mataio 28:1–8; Luka 24:1–12; Ioane 20:1–10)

1Sabati sare kaleipe soa Maria Magadala karikara ua aea Maria lakobo ve lou aeata Salome, ere muforoe etau itaea lei maravi kavōpe areve maea la veveti vei. 2Soka hebedoma ve omopa sare ve miori kofa soa, sare pataipe lea mea, ere tapu oti voa kei forerōpe. 3Kei ere otiharo voa laua elore elore mō sukavōpe, Tapu oti ve utape sasaukaita fave ereita vei leisa aroruka fareovai roi? 4Ere ofae moravi, lea fave aroruka fapi eaeiape la ofae eavōpe; ipi lea fave rovaekapu. 5Ere tapu oti iri voa oropi, harokou farakeka aea puta maea‐sea mopi, mai toare itai voa aiseseiape la ofae eovi, ere haihava lei tore leipe. 6Are erero mō ōpe, Tore levi leitia; e Iesu Nasareta karu, satauro sa paeaia lea vita la elipea. A—, are itoi, are mōvoa kao; ofae eavaia, ere arero viopaia oti meha. 7Soka e teraia, areve satiriaraita karu Petero ita la mō moia, Are eve omopa voa Galilea voa la kavai; e arero lōvoa ofae eavai roi, are ero moia lea o feare.#Mat 26:32; Mak 14:28 8Ere maria voa foreri, tapu oti kiripi oroōpe, ipi ere maea‐uti oriri a’ haihava foromai lei, ere karu farakeka aea ta omoi kasirau, ipi ere tore leipe eavia.

EVERA SOA VOA MEA SISA O MAREKO VE OVORO LAREVA VOA KARU HARIA SA TOPIARI UKŌPE

Iesu Maria Magadala karikara ua tai forerōpe

(Mataio 28:9–10; Ioane 20:11–18)

[ 9Soka Iesu hebedoma ve omopa sare ve miori kofa voa opai voa itoipe lea mea, are Maria Magadala karikara ua, are sa harisu la areve maea voa larivatōpe lea ua la soso omopa muiōpe. 10Are te lea fari la Iesu ita fareho roroaiape karu la omoipe, ere haieae ita ovororo sisapi fi savoiape lea soa voa. 11A—, Iesu makuri aea arero Maria sa ofae eavōpe lea o la mapōpe soa, ere lea o la sukaerereai kao.

Iesu satiriaraita karu oraka tai forerōpe

(Luka 24:13–35)

12Lea ve aite voa Iesu soso haria lei ereve karu oraka tai forerōpe, ereuka karikara kiripi maria otiharo pisiri voa kavaiape soa. 13Soka ereuka serei ata kerori koti ereve karu hea la fari omoipe soa, lea karu ta ereukaro sukaerereai kao.

Iesu eleven karu tai forerōpe

(Mataio 28:16–20; Luka 24:36–49; Ioane 20:19–23; Aposetolo 1:6–8)

14Aite kofa voa Iesu eleven karu ta forerōpe, ere larietau la’ aipepeiape lea mea; foreri, are erero o haiiri ōpe ipi ere sukaerereai auke lei haiivavu lei roroaiape lea vei, ipi ere arero opi itoipe la ofae eavōpe lea karu ve o la mapi sukaerereai auke leipe eavia. 15Soka are erero mō ōpe, Mearovaeka foromai voa teraia aea Ovoro Lareva la makuri karu foromai voa itoro aria.#Apos 1:8 16Sukaerereai aea bapatiso lei ovaita lea karu la lei makuri leiti roi; a—, sukaerereai auke leita lea karu la seseōvi kaiae tava erero miarai roi. 17Sukaerereaita karu ere mea haihava leita peise la leiti roi: ere arave rare ita harisu la maria voa taivatai roi, aea ere uri hariaharia rauapo ita sukavai roi; 18ere ikaroa la mai sa ovai roi, aea ere paeaita muramura erero levi hasiavai roi; ere ereve mai sa eka karu la mopi, erero lōri lei lareva leiti roi.

Iesu la kauri voa fareōvi pataipe

(Luka 24:50–53; Aposetolo 1:9–11)

19Soka Papuvita Iesu are erero o mei roroka lei, Ualare sa arero kauri voa fareōvi patei, Ualare ve mai toare itai voa avōpe. 20Soka satiriaraita karu ere maea lei, otioti foromai voa itoro ōvovo teraiape, Papuvita ta ere ita farehoria tivi lei, aea lea soasoa voa leiape haihava peise sa lea ovoro ve okofa la pisiri lei muiaiape.]

EVERA SISA O HARIA AEA TA MEHA

[ (9) Soka lea uamori ere Petero aea areve maeapavora karu ita tai te, ere mapōpe lea o foromai la erero utohoa omoipe. (10) Lea ve aite voa Iesu kofa areve satiriaraita karu ve ape sa safu aea peita makuri vei soa sarapai auke leita lea ovoro la soa sare pataita itua‐tao soa isei isei sare sukopaita itua‐tao voa itapi itoro ape.]

Currently Selected:

Mareko 16: TQO1983

Highlight

Copy