Aposetolo 9

Saulo haiiri kerori Keriso ve karu leipe

(Aposetolo 22:6–16; 26:12–18)

1Soka Saulo kitou o paeaita o ita Papuvita ve satiriaraita karu la ape. Are maso harofave vita tai te, 2arero Damasko karikara ve sunako harofave karu vei karoro hea la ukai vei loki leipe, are Iesu ve Mai la aitetaita karu la lōvoa sukaeai oria, are erero vita ita uamori ita la fasi Ierusalema voa lariōvi patai vei.

3Soka are sariva lei kei Damasko karikara haekao leipe lea mea, kauri voa ovava utohoa haea kevarokevaro fei arero eakoa toepōpe. 4Are mea voa putei, arero mō isōpe i la au mapōpe, Saulo e, Saulo e, a araro lei haisora leiti vei aitetaipeta ipi levea? 5Are tava o mō ōpe, Papuvita e, a ita leisa? Are mō ōpe, Ara Iesu, a araro haisora la leipea. 6Soka a itei, karikara voa kei oropaia; a sa leiti etau aro lōvoa omoi roi. 7Areve maeapavora karu o auke ita soi pepeiape; ere i la mapōpe, a—, karu ofae eavai kasirau. 8Saulo mea voa itei, ofae feferopeōpe, a—, etau aea la eavai kasirau. Soka ere arero mai sa lariōvi kei Damasko voa oropōpe. 9Are sare oroisoria soa voa ofae kuku ita peiape, larietau ma ita lari kasirau.

10Soka satiriaraita karu farakeka rare Ananiasi Damasko voa peiape. Papuvita arero auka lei mō ōpe, Ananiasi e. Are mō ōpe, Papuvita e, ara meha. 11Papuvita arero mō ōpe, Itoia, karikara ve otiharo rare Haura voa te, Iudasi ve uvi voa peita Tareso karu farakeka rare Saulo vei lalasi leitia, ipi are Ualare la loki la leipea. 12Are karu rare Ananiasi oropi areve mai sa arero miavaita la haiako auka voa eovi, are ofae lōri lei ata eavai vei. 13A—, Ananiasi tava o mō ōpe, Papuvita e, ara karu rauapo voa mea vita ve fari la mapai, are Ierusalema voa ave maso karu la leita lea maealolo. 14Aea mōvoa are maso harofave vita sa miaraia siahu ia ave rare isaita lea karu foromai la fasai vei. 15A—, Papuvita arero mō ōpe, Teraia, ipi ara sa arero haikaea ovai arave tivi leiti vei, torutoru hariaharia karu ita king karu ita aea Israela ve susumori ita ve omopa voa arave rare la lei fafarapai vei. 16Ipi ara kofa sa are arave rare vei leiti vei leipeta hehea foromai la arero lei ore leiti roi.

17Soka Ananiasi te lea uvi voa oropōpe. Oropi are areve mai posa oraka Saulo voa miavi arero mō ōpe, Saulo e, arave marehari e, a koti otiharo voa aro tai foreraia Papuvita Iesu are sa itapaita vita ara meha. Are araro itapai aro lei a ofae ata eavai vei, aea a Safu Arahoha Lareva sa soari vei. 18Etau usoso ekaka ve tete feare areve ofae oraka voa utohoa sisapi are ofae ata eavōpe. Are itei aea arero ta bapatiso leipe. 19Aite are larietau la’ rofo ata leipe.

Saulo Damasko voa itoro ōpe

Saulo sare hea Damasko voa satiriaraita karu ita farehoria peiape. 20Are utohoa sunako uvi hariaharia voa Iesu are Ualare ve Atute lea o la itoro ape. 21Mapaiape lea karu foromai haihava lei elore elore mō ōpe, Ierusalema voa mea Iesu ve rare la isaita karu la hasiavaita vita meha. Are ta mōvoa koti ipi lōfeare karu la fasi maso harofave karu tai lariōvi patai vei. 22A—, Saulo itoro a’ rofo ata au topiaraiape, aea Iesu Keriso kofa reha, lea o la okofa mei mei, Damasko voa pepeiape Iuda karu areve o la sukavuteai vei usoso leiti kao.

23Sare rauapo kaleipe lea mea, Iuda karu arero paeai vei laua seseōvōpe;#2 Kor 11:32–33 24a—, Saulo ere sa seseōvaiape lea haiiri la ore leipe. Ere karikara otiape‐ape foromai la sare ita faita ita arero paeai vei kiva lei arorisa pepeiape. 25A—, faita aea voa Saulo ve o la mapi kakeva leipe karu sa arero ovi arua rovaea voa vuapi, karikara fave lōva uta voa paraea fauka koravasa voa pavōpe.

Saulo Ierusalema voa

26Are Ierusalema voa forerōpe soa, are satiriaraita karu ita farehoria leiti vei haikaeōpe; a—, ere arero tore leipe, ipi are ta satiriaraita karu ere lea la sukaerereai kao. 27A—, Banabasi arero toari, aposetolo karu tai lariōvi, aea are Papuvita la otiharo voa ofae eovi arero o mei, aea are Damasko voa Iesu ve rare vei ivara ita itoro ape lea fari la erero omoipe. 28Soka Saulo ere ita farehoria pōvi, Ierusalema voa lō tera lō iti lei, 29Papuvita ve rare vei ivara ita itoro ape: are ta Helene uri sukavaita karu ita laua sukōva sukōva a’, ere ita o serea elore elore ape; a—, ere arero paeai vei seseōvōpe. 30Soka paumarehari lea la ore leipe soa, ere arero Kaisarea voa lariōvi fauka, arero Tareso voa itapi kavōpe.

31Soka ekalesia Iudea soa foromai voa aea Galilea aeata Samaria soa voa tairu ita pepeiape. Safu Arahoha Lareva sa toari ekalesia rofo ita asi rauapo lei, Papuvita la taivotei vovo roroaiape.

Petero Luda aea Iopa voa

32Petero mea ve otioti foromai voa sariva lei lei, are ta Luda voa pepeiape safu karu tai fauka forerōpe. 33Lōvoa are maea susuru eka karu farakeka la eavōpe; areve rare Aeneasa, are sisoro eight kite voa eka lei au eaeiape. 34Petero arero mō ōpe, Aeneasa e, Iesu Keriso ave eka la lei lareva loita meha; itei ave kite irurukea fasaia. Soka are utohoa itoipe reha. 35Soka Luda voa aeata Sarono mea vevete voa pepeiape karu foromai arero ofae eovi, haiiri kerori Papuvita la sukaerereōpe.

36Soka Iopa voa satiriaraita ua farakeka peiape; areve rare Tabita, lea rare Helene uri voa mavitoaita Dorikasa, areve eite Diera. Are leiape mai lareva, aea maeaforoe mai sare foromai voa leiape. 37Lea soa voa are eka lei opōpe. Opi ere arero ma visea roroka lei, arero ovi patei arori lalava voa miavōpe. 38Luda Iopa ve haekao karikara reha, aea satiriaraita karu Petero lōvoa peiape o la mapōpe lea mea, ere karu oraka la arero tai itapi loki lei mō ōpe, A elaro tai lavelave kotiria. 39Petero itei ereuka ita farehoria kavōpe. Are uvi voa forerōpe lea mea, ere arero arori lalava voa lariōvi pataipe. Ua lelesi lelesi foromai arero tai fi ita soi pepeiape, aea Dorikasa makuri soa pisosiape lea maea iri puta, arori puta ita arero muiaiape. 40A—, Petero erero foromai la maria voa sukavutea, sukakoka avi Ualare la loki leipe. Aite are opōpe ua tai kerori mō ōpe, Tabita e, itoia. Lō mei are ofae feferopea, are Petero la ofae eavōpe lea mea, are itei avōpe. 41Petero mai arero muia moravi, aea safu karu aea ua lelesi lelesi ita la isa, arero makuri ita erero muiōpe. 42Lea fari Iopa ve soa foromai voa fafarapi, aea karu rauapo Papuvita la sukaerereōpe. 43Soka Petero soa taheka savori Iopa voa peiape, boromakao ruru la pisosita vita aea rare Simona ita farehoria.

Currently Selected:

Aposetolo 9: TQO1983

Highlight

Copy