Aposetolo 8

1Arero paea opai vei, Saulo ta haiiri farakeka ere ita leipe.

Saulo ekalesia karu la hasiavaiape

Lea sare kofa voa Ierusalema voa pepeita ekalesia karu la irori mai ita toa hasiavaita soa rovaea sa foreri, karu foromai Iudea aea Samaria ve soasoa voa liōvea oroavaiape; aposetolo karu sa haria au popōvōpe. 2Soka Ualare la tore lei taivotaita karu hea Setefana la viopi, tepe fi rovaea are vei feri savoipe.

3A—, Saulo ekalesia karu la hasiōvi, uvi rauapo voa lō oropa lō oropa lei, heavita uamori ita la irori mai ita aruovi erero dibura uvi voa lei fasi sasaukaiape.#Apos 22:4–5; 26:9–11

Filipi Samaria voa

4Soka toa liōveōpe karu sa Ovoro Lareva la mea foromai voa itoro ōvovo terōpe. 5Soka Filipi Samaria karikara voa kei foreri, Keriso vei itoro ape. 6Itoro a’, karu sitavu haiiri farakeka ita Filipi sa itoro ape o la haisukafori mapaiape, ere Filipi sa moiape o la mapi, are sa leiape siahu ve peise la ofae eavaiape lea mea. 7Ipi harisu maeasiviri ere toaiape karu rauapo ve maea voa pepea i rovaea ita maria voa foreri, maea susuru eka karu aea mora huaveahuavea karu ita ta lei lareva leiape. 8Soka lea karikara voa karu hailareva foromai leiape.

9A—, heavita aea, rare Simona, omopa soa voa are kaeavuru mai lea karikara voa leiape. Are elore maea karu soa haria o a’, Samaria karu la lōri lei haiisoiape. 10Aea karu foromai, soa ipi kofa soa arori kofa karu, areve o la mapi kakeva lei mō mōiape, Mea vita are Ualare ve Siahu rare Rovaeka la aravaita Vita reha. 11Ere arero mapi kakeva leipe, ipi are soa savori voa areve kaeavuru tivi sa erero lei haihava leiape eavia. 12A—, Filipi ovoro lareva Ualare ve basileia vei, aea Iesu Keriso ve rare vei itoro a’ ere sukaerereōpe lea mea, erero foromai heavita uamori ita la bapatiso leipe. 13Simona are ta Ovoro Lareva la sukaererea, aea arero bapatiso lei roroka lei, are Filipi voa tōpiari lei vovo meiape. Are Filipi sa leiape siahu ve peise, haihava leita etau etau ita la ofae eovi, are ta haihava leipe.

Petero auka Ioane ita Samaria voa

14Soka Ierusalema voa pepeiape aposetolo karu ere Samaria karu Ualare ve o la sukaerereōpe lea fari la mapōpe lea mea, ere Petero, Ioane ita la erero tai itapōpe. 15Ereuka fauka foreri Samaria karu Safu Arahoha Lareva ta ovai vei Ualare la loki leipe; 16ipi lea soa Safu Arahoha Lareva lea karu voa fauka pavai kasirau, erero Iesu ve rare voa bapatiso leiape lea sa haria. 17Soka ereuka ereukave mai sa erero miaviape lea mea, ere Safu Arahoha Lareva la ovaiape reha.

18Soka Simona, Arahoha la aposetolo ve mai sa miavi miaraiape lea la ofae eovi, are moni ereukaro tai oviti, 19mō ōpe, Mea siahu araro ta miaraia, ara arave mai sa miavaita lea karu ta Safu Arahoha Lareva la ovai vei. 20A—, Petero arero mō ōpe, Ave moni a ita farehoria saroroapai vei, ipi ave haiiri a Ualare sa au miaraita meru la itaea lei ovaita ore. 21Elave mea tivi voa, a soa taheka ovai kasirau ipi ave haiiri Ualare ve soso voa haura kakaeite kofa. 22Soka ave mea kaiae vei haiiri keroria, aea Papuvita la loki leitia, are ave lea haikaeaita haiiri la a voa fareōvi mutapaita varo. 23Ipi ara ofae eavai, a hilisi rovaeka lei kaiae ve fasaita etau voa meitore. 24Lō mei, Simona, kaeavuru karu, tava o mō ōpe, Euka sa Papuvita la ara vei loki leitia, euka moita lea etau farakeka aea araro tai levi forerai vei.

25Soka ereuka Papuvita ve o la okofa mei, itoro a roroka lei, ereuka Ierusalema voa ata kerori Samaria karikara rauapo voa Ovoro Lareva la itoro ōvovo pataipe.

Filipi aea Etiopia basileia karu rovaea

26Soka Papuvita ve aneru Filipi la o mōri moipe, Itei, maea lei diho itai voa isaia, soa Ierusalema la kiripi Gasa voa fauka isaita lea otiharo voa. Lea otiharo voa faitora soa karu kotia isaia leitia kasirau. 27Soka are itei maea leipe reha.

Soka Filipi Etiopia karu farakeka aea areve elore voa ata kerori isaipe la eavōpe. Lea vita basileia ve tivi karu rovaea, are Etiopia ve Kanadaki, lea o ve eite Papuōvu ve tivi harofave vita, areve basileia ve moni foromai la kiva leita vita. Are Ierusalema voa Ualare la maso toai vei patei, 28elore voa ata kerori, areve kariota voa avi, Isaia peroveta karu ve buka la mutiape. 29Lea mea Arahoha Filipi la mō ōpe, Areve kariota ve haekao voa isaia. 30Soka Filipi arero tai soea, arero Isaia peroveta karu ve buka la mutiape la mapi, arero lalasi lei mō ōpe, A mutipeta lea o ve eite a ore ei? 31Lei are mō ōpe, Karu araro satiriarai auke leitita, a—, ara leafeare ore leiti roi ei? Soka are Filipi kariota voa foreri avi are ita isai vei loki leipe. 32Soka are mutiape karoro ve o meha:

Are usoso karu sa savai vei lariōvaita mamoe feare,

aea usoso mamoe mere areve mehe la sarapaita karu ve omopa voa fi ari auke leitita,

lōfeare are areve ape fapai kasirau.#Isa 53:7–8

33Are haiiri ipi lei, karu arero haura ta seseōvai kao.

Areve heatao ve fari leisa moi roi?

Ipi areve makuri mearovaeka voa soa sarapi fareōvi kaloi.

34Lea Etiopia karu Filipi la lalasi lei mō ōpe, Araro eapo omoia, lea peroveta karu mea o la moipe vita leisa, are elore maea vei ei? ō karu haria vei ei? 35Lea mea Filipi lea karoro ve o voa fareōvi, Iesu ve Ovoro Lareva arero satiriarōpe. 36Soka ere isaiape lea mea, ere ma oti voa forerōpe. Foreri Etiopia karu mō ōpe, Ofae eavaia, ma meha. Araro bapatiso leiti vei o erere oita etau aea ia ei? 37Filipi mō ōpe, A ave haiiri foromai ita Iesu la sukaerereai oria, aro bapatiso leitita lea lareva. Lō mei are tava o mō ōpe, Arave sukaerereaita haiiri meha, Iesu Keriso are Ualare ve Atute. 38Are kariota lariōvaita vita la pavai o a’, ereuka ma voa fauka, Filipi auka Etiopia karu ita, aea Filipi arero bapatiso leipe reha. 39Ereuka ma voa fauka ata pataipe lea mea, Papuvita ve Arahoha Filipi la fareovōpe, aea lea Etiopia karu arero ofae ata eavai kao; a—, are elore otiharo voa hailareva ita isaipe. 40A—, Filipi Arahoha arero Asoto karikara voa lei forerōpe. Soka are karikara karikara voa itoro ōvovo kavōpe, kei kei Kaisarea voa forerōpe.

Currently Selected:

Aposetolo 8: TQO1983

Highlight

Copy