Aposetolo 10

Koneliusi ve fari

1Soka karu farakeka rare Koneliusi Kaisarea voa peiape; are Roma maola karu firu rare Italia voa kapena karu aea. 2Are Ualare la sukaerereaita karu, areve uvi karu foromai ita Ualare la taivotaita karu. Are ta merava karu la meru lō miara lō miara lei, Ualare la veveu lei lei vovo meiape. 3Sare sōsi soa aea voa are haiako auka paea, Ualare ve aneru oropōpe la ovava kofa ita eavōpe. Lea aneru arero mō ōpe, Koneliusi e! 4Are ofae koko maea totororo ita arero fofoisa, lalasi mō leipe, Papuvita e, lekōru? Lei, aneru arero mō ōpe, Ave loki o rauapo aeata a merava karu la lōfoa lōfoa lei miaraita ave meru rauapo ita la Ualare sa usoso omopa posaseaita etau feare ovi, aro haikaeaita meha. 5Faitora meu karu hea Iopa voa itapi, karu aea rare Simona, rare aeata Petero la aravaita lea karu la isa kotia. 6Are karu rare Simona, boromakao ruru la pisosita vita ita pea, lea karu ve uvi makaikara miri voa. 7Arero laua sukavōpe aneru arero kiripi terōpe lea mea, are areve uvi tivi karu oraka, aea Ualare la sukaererea arero kiva leita maola karu farakeka ita la isa, 8laua foromai erero satiriōri roroka lei, are erero Iopa voa itapōpe.

9Soka lea aite sare voa ere otiharo voa isei, Iopa karikara haekao leipe soa, Petero uvi kōu vevete voa Ualare loki leiti vei pataipe sare koko soa feare. 10Are eroa sa’ larietau lari vei haikaeōpe. A—, ere larietau leiape soa are ovo‐ipi murumuru lei iavi haiako auka paea, 11are kauri fapōpe la ofae eavōpe reha; etau usoso auvia rovaea feare, lalave orakaraka mea voa paraea faukōpe. 12Makuri etau hariaharia foromai, mora voa roroaita etau, aea tititaita etau, aea fufukaita ori foromai ita auvia iri voa kokoruka momoeiape. 13I arero mō isōpe, Petero e, itei, savi laria. 14A—, Petero mō ōpe, Papuvita e, lōfeare kakaeite; ara etau merava, aea ape ōta leita etau ita la lari sore. 15I soa orakoria ata mō isōpe, Ualare sa lei ovava leitita lea etau la a erero merava rare levi aria. 16Lōfeare mai soa oroisoria leiape; lei lei lea etau kauri voa utohoa ata haiovi pataipe.

17Soka Petero are ofae eavōpe auka etau ve eite lekōru lea vei haikaeakaea ape soa, Koneliusi sa itapōpe karu Simona ve uvi vei lalasi lei, utape maria voa soi pepeiape. 18Ere o mō isa moipe, Simona, rare aeata Petero, mōvoa pea ei?

19Petero lea auka etau vei hai sukafori kaeaiape soa, Arahoha arero mō ōpe, Mapaia! Karu oroisoria aro la elipea. 20A itei fauka, ere ita farehoria kavai vei horahora levi leitia, ipi erero ara sa itapai. 21Soka Petero fauka lea karu tai foreri mō ōpe, E elipeta vita ara meha. E kotita ipi levea? 22Lō mei ere mō ōpe, Maola kapena karu farakeka rare Koneliusi, mai haura leita, Ualare la taivotaita, Iuda toruipi karu foromai voa fari lareva ita meita lea vita la Ualare ve aneru sa o mei, karu aro tai itapi, a areve uvi voa kei are o a voa mapai vei. 23Soka Petero erero maeafukapi, erero lei lea uvi voa iavai vei sasaukōpe.

Lea aite sare voa, are itei, ere ita kavōpe, aea Iopa paumarehari hea ta are ita farehoria kavōpe. 24Kei kei lea ve aite sare voa are Kaisarea voa forerōpe. Koneliusi arero taiape, aeata are sa isa kokorukōpe karu, areve paumarehari aea moraitai‐itai. 25Petero sa uvi voa oropai vei leipe soa Koneliusi arero sukaea, areve mora ipi voa sukakoka avōpe. 26A—, Petero arero moravi mō ōpe, Itoia, ara ta karu. 27Petero arero laua sukōvi sukōvi uvi voa oropi, are kokoruka itotea popōvōpe karu rauapo la ofae eavōpe. 28Are erero mō ōpe, E ore Iuda karu ere toruipi‐ipi hariaharia karu ita topiaraita aeata areve uvi voa oropaita lea safu ia. A—, Ualare sa araro satiriarai ara merava o aea kaka o karu aea la levi ari vei. 29Lea vei a sa araro isaia lea mea, ara haiiri sukavutea auke ita kotita meha. Soka arave lalasi o meha, a ara vei itapaia ipi levea?

30Soka Koneliusi mō ōpe, Foaru sare voa, mea ora soa feare, ara arave uvi voa Ualare la loki leitita, sare sōsi soa voa. 31Soka karu farakeka puta sosorusosoru mopi arave omopa voa soi pōvi mō arita, Koneliusi e, Ualare ave loki o la mapi, aea a sa au miaraita meru rauapo ta Ualare ve omopa voa hai la kaeaipea. 32Lea vei Iopa karikara voa itapi, Simona, areve rare aeata Petero vei lalasi leitia. Are Simona, boromakao ruru la pisosita karu ve uvi voa pea, makaikara miri voa. 33Soka ara a vei utohoa itapi, a eapo kotita meha. Soka ela farehoria Ualare ve omopa voa pepea, Papuvita sa aro satiriaraia lea o la a eapo elaro o mei, ela mapai vei.

34Soka Petero areve ape fapi mō ōpe, Okofa ara eavaita meha, Ualare karu ve soso o ari sore;#Deut 10:17 35a—, toruipi‐ipi karu foromai voa arero taivotei aea mai haura leitita lea karu are sa haikaeaita karu ere reha. 36Israela karu voa itapōpe lea o e ore, tairu ve Ovoro Lareva Iesu Keriso, karu foromai ve Papuvita vei itoro ape. 37Omopa Galilea voa leiape, aea aite Iudea ve soa foromai voa lea etau e foromai ore, Ioane sa itoro ape lea bapatiso soa ve aite voa. 38E Iesu Nasareta karu ve fari ta ore, Ualare arero Safu Arahoha Lareva aea siahu ita sa veveti, are mai lareva lei, Diabolo ve siahu voa roroaiape karu foromai la lei lareva lei vovo meiape, ipi Ualare are ita fareho leiape eavia. 39Aea are Iuda mea voa aeata Ierusalema voa leiape lea etau foromai vei okofa moita karu ela meha. Ere arero ovi tola voa vitei lōri paeōpe. 40A—, oroisoria sare voa Ualare arero moravi itoipe, aea karu sa arero ofae eovi ore leiti vei muiaiape; 41karu foromai kao, a—, Ualare sa omopa haikaeōpe okofa moita lea karu, ela meha. Are opi ata itoipe lea soa ve aite voa are ita fareho larietau ita ma ita lalape karu ela meha. 42Ualare sa omoipe vita are reha, are sa makuri karu aea opai karu ita ve mai la seseōvi tava miarai vei, aea lea o la karu la itoro a’ okofa omoi vei are elaro haisa itapi la roroa meha. 43Peroveta karu foromai ta are vei o mō mei moiape, Arero sukaerereaita lea karu foromai ve iri kaiae areve rare voa felaukea mutapai roi.

44Petero sa lea o la moiape soa Safu Arahoha Lareva lea ovoro la mapaiape karu foromai tai arori voa faukōpe. 45Soka Iuda karu, Iesu la sukaererea, Petero ita farehoria Iopa voa kotipe lea karu haihava leipe, ipi Safu Arahoha Lareva ta toruipi haria karu voa sisōvōpe lea vei. 46Ipi ere lea karu sa uri hariaharia sukōvi, Ualare ve fari rovaea moravōpe la mapōpe. Lea mea Petero mō ōpe, 47Ma mea karu la bapatiso leiti vei karu o erere arita ore ei? Ere ta Safu Arahoha Lareva la ovai, usoso ela sa ovōpe lōfeare. 48Soka are o erero Iesu Keriso ve rare voa bapatiso leiti vei omoipe. Soka ere arero loki leipe are sare hea ere ita fareho pavai vei.

Currently Selected:

Aposetolo 10: TQO1983

Highlight

Copy