Jone 19

1Mania tha Paelate e tolea tha Jesus si maṉa eri, ka kwae tataria ana suila. 2Ma toa ana firua kera eeroa kwalo totora, keka alua i gwauna, keka faatooni nia ana tooni momothelaa; 3Ma keka sorea, Kiṉa Ju ki ae! ma kera fidalia. 4Mania tha Paelate e lae lau kau, ka soree isada, Rikia fasi, kwai tole nia kau isamulua, fasi muki thaitoomana ni nau e ai kwasi fulatoona ta si do kekeo ani nia. 5Mania tha Jesus e lau kau, fafia kwalo totora eri ma tooni momothelaa. Ma tha Paelate e soree isada, Rikia fasi, na wane eri nai nia! 6Mania si maṉia na wane inoto ni foa ki ma toa ni ilido ki kera riki nia, keka ’ai, keka una eri, Fota fafi nia ana ’ai rarafolo, fota fafi nia ana ’ai rarafolo. Tha Paelate ka soree isada, Ni kamulua muki tole nia, muki fota fafi nia ana ’ai rarafolo eri: uria ni nau e ai kwasi fulatoona ta si do kekeo ani nia. 7Ju ki kera luua, keka una eri, Amilia tee lo, ma sulia lo eri e kokoto na nia kai mae, uria ne alaṉi nia ana Kaluwane tha God. 8Mania si maṉa na tha Paelate e roṉoa si ṉata eri, nia mau ka tatha; 9Me kotho lau i la biu eri, ka soree isatha Jesus, O too mai ifei noko lae mai? Sui tha Jesus e ai si luua boo. 10Mania tha Paelate e soree isana, Osi ṉata bamua isaku? osi thaitoomana ni nau ku sukwai fasi kwa fota fafi oe ana ’ai rarafolo, mado kwa lube oe oki lae? 11Tha Jesus e luua, ka una eri, Soki sukwai fafi nau e ai, mada se ai kesi falea sukwaia iamu ita mai ia: mania wane ne fale nau iamu, abula taa la nia e baita ka tatha. 12Sui tha Paelate ka bii rofea si ade la na nia kai ilia fasi kai lubea kai lae: ma Ju ki kera ’ai, keka una eri, Mado so lubea wane nei e ai osi ado bia tha Sisa: ni tei na ka alaṉi nia ana kiṉa ka faretoliṉia tha Sisa. 13Mania si maṉa na tha Paelate e roṉoa si baea eki, nia tolea kau tha Jesus, ka ono ana do ni ono wane ni kotu ata kula na kera alaṉia ana Thamateefau, ma ana ṉata lana Hibaru ki, Gabatha. 14Ma ṉa Tagudoa ana tathafafi la neri: fuliṉana ona kadee thato. Ma nia soree isana Ju ki, Rikia fasi, Kiṉa kamulua! 15Mania kera ’ai, keka una eri, Thauṉia, thauṉia, oko fota fafi nia ana ’ai rarafolo. Tha Paelate ka soree isada, Kwai fota fafia Kiṉa kamulua ana ’ai rarafolo? Wane inoto ni foa ki kera luua, keka una eri, Kamilia e ai amilia ta kiṉa lau, talitoona boo tha Sisa. 16Mania nia ka bii fale nia iada fasi keki fota fafi nia ana ’ai rarafolo.

Mania kera tolea tha Jesus, keka talaia kau: 17Ma ni nia e lae kau, ka tala ṉalia ’ai rarafolo nia, uria si kula na kera alaṉia ana Si kula gwa lelete, ma toolaṉai lana si ṉata eri ana ṉata lana Hibaru ki, Gologotha: 18Kula eri naa, kera fota fafi nia ana ’ai rarafolo, ma ro wane ki lau bi nia, ta wane ata bali ma ta wane ata bali, ma tha Jesus initoo. 19Ma tha Paelate e keda lau boo tee kekeda la, ka alua ana ’ai rarafolo eri. Ma si do na kera keda seena, THA JESUS, WANE I NASARETHA, KIṈA JU KI. 20Mania kekeda la eri toa oro ana Ju ki kera teemai nia: uria na si kula na kera fota fafia tha Jesus ana ’ai rarafolo iei e ni karaṉia toaa susu eri: ma kera keda i ṉata lana Hibaru ki, ma i ṉata lana toa i Girisi, ma i ṉata lana toa i Roma. 21Mania wane inoto ni foa ki ana Ju ki kera soree isatha Paelate, Osi keda, Kiṉa Ju ki; oki keda, Nia sorea, Nau Kiṉa Ju ki. 22Tha Paelate e luuda, ka una eri, Si do nau ku keda, ku keda bonaa.

23Mania toa ana firua, buriana na kera fota fafia tha Jesus ana ’ai rarafolo e sui, kera ṉalia maku nia ki, keka toliṉia ata fai do, toa ana firua ki wane boo si do, wane boo si do; ma tooni nia lau boo: sui tooni eri kesi ladoa ta si kula, kera falia i gwauna ka fula i aaena. 24Mania kera sorea uri kera, Kusi seṉa, kuki ilalatoona ni tei kai ṉalia: fasi kekeda la ba kai mamana, ne sorea,

Kera ukalia ṉa maku nau ki faisi kera,

Ma tooni nau kera ilala uria.

Mania si do eki toa ana firua eri kera ilia. 25Ma toa eri na kera takwe isana ’ai rarafolo tha Jesus ṉa thainana, ma doorana thainana, ni Meri kwaina tha Kiliofasi, ma ni Meri Makadaline. 26Mania si maṉa na tha Jesus e rikia thainana, ma wane eri ne tolea na nia liothau ania, kai takwe isana, nia soree isana thainana, Kini ena ae, rikia fasi, kaluwane oe! 27Sui nia soree isana wane eri, Rikia fasi, thainamu! Ma ita asi kadee maṉa eri ka lae alaa wane eri e tole nia kai to i maafera nia.

28Buriana si do eri tha Jesus, ne thaitoomana na kera faasuia naa si do eki sui, fasi kekeda la abu eri kai mamana, ka sorea, Lioku e lalaṉa. 29Kera takwelaṉania do ne fuṉu ana waene ne afae i kula eri: ma kera alua ta fulo ne fuṉu ana waene eri i gwauna kukusui hisopa, kera falea uria fokona. 30Mania tha Jesus e kuufitoona waene eri, ka sorea, E sui naa: ma nia gwau tuli, ka falea maṉona.

31Mania Ju ki, sulaania ṉa Tagudoa neri, fasi seedalua ka ai si to ana ’ai rarafolo afa boṉi mamaloa (uria fa boṉi mamaloa eri fa boṉi baita), kera ṉata kwaitakoi isatha Paelate sa keki oea aaeda, sui keki ṉalia kau. 32Mania toa ana firua kera lae mai, keka oea aaena wane totonao, ma aaena ruana wane eri na kera fota fafia bi nia ana ’ai rarafolo: 33Sui si maṉa na kera fula isatha Jesus, ma kera rikia ne mae naa, e ai kesi oea aaena: 34Ma sui tee nonii wane ana toa ana firua e labukwadaṉia i ninimana rakena ana sua, ma si maṉa eri u boo abu ma kafo ka igwa mai. 35Ma wane eri ne rikia e faamamanea si do ne thaitoomana, ma si do nia faamamanea e mamana: ma nia thaitoomana ne ṉata mamana, fasi ni kamulua muki fitoo. 36Uria na kera ilia si do eki, fasi kekeda la abu eri kai mamana, Ta si ogi ana seena e ai kesi oea. 37Ma tee si kekeda la abu lau ka sorea, Toto keki lio uria wane eri na kera labukwadaṉia.

38Ma buriana si do eki tha Josefa wane i Arimathia, uria nia wane tha Jesus e tolea, sui ka thathaufuni bana uria ne mau ana Ju ki, ka gani atha Paelate sa kai ṉalia kau seena tha Jesus: ma tha Paelate ka alamatania iana. Mania nia lae mai, ka ṉalia seena tha Jesus. 39Ma tha Nikodimasi e lae lau bomai, wane eri ne lae mai inao isatha Jesus i la rodo, ka ṉalia mai mura na kera dola ana alosi, ma kulua lana fuliṉana tee taleṉee fa pauda. 40Mania kera ṉalia seena tha Jesus, keka afua ana si maku kwakwaoa bia do makwa lea eki, uria biraṉana Ju ki si maṉa na kera alua imole. 41Ma tee ra ni asi kula na kera fota fafi nia ana ’ai rarafolo iei; ma i la ra eri tee kwaiṉeia falu, kula ne ai kesi alua u ta wane iei. 42Ma kula eri naa, sulaania Tagudoa Ju ki (uria na kwaiṉeia eri e ni karaṉi mai) keka alua tha Jesus iei.

Currently Selected:

Jone 19: MLU1949

Highlight

Copy