Jone 20

1Afa boṉi totonao ana uiki ni Meri Makadaline e lae mai la si makafukafua, ka fula isana kwaiṉeia eri, ka rikia gwa fau na kera idua naa faisia. 2Mania nia fita, ka fula isatha Saimona Pita, bia wane ba na tha Jesus e tole nia, ma ka liothau ania, ka soree isadaroa, Kera ṉalia naa ṉa Lord faisia kwaiṉeia, ma ni kamilia mili dora asi kula na kera alu nia iei. 3Mania tha Pita e lae kau, ma ruana wane eri lau boo, keko lae kau uria kwaiṉeia eri. 4Ma kero fita ofu nadaroa: sui ruana wane eri ka talua tha Pita, ka fula totonao isana kwaiṉeia; 5Me agwaoro ma ka lio i lala, ka rikia si maku kwakwaoa ki kai teo bana; ma sui e ai si kotho iei. 6Mania tha Saimona Pita ka fula lau bomai iburiana, ka kotho i la kwaiṉeia; ma nia lio ka rikia si maku kwakwaoa ba ki ka teo, 7Ma maku faekwa, na kera afua ana gwauna, ne ai si teo isana maku kwakwaoa ki, ka teo tee nia ata kula eeta. 8Mania ruana wane eri na tha Jesus e tole nia, ne fula totonao isana kwaiṉeia, e kotho lau bokau, ma nia rikia, ma ka fitoo. 9Uria na kesi thaitoomana u kekeda la abu eri, na nia kai tatae lau faisia toa mae ki. 10Mania wane eki na tha Jesus e toledaroa keko oli naa uri biu keroa.

11Sui ni Meri e takwe i thara isana kwaiṉeia, kai aṉi: mania, si maṉa nia aṉi, ka agwaoro, ka lio i la kwaiṉeia; 12Ka rikia ro angel ana tooni kwakwaoa ki keko ono badaroa, ta do isana gwauna, ta do isana aena, asi kula na seena tha Jesus e teo iei. 13Ma keko soree isana, Kini ena ae, uria ta noki aṉi? Ni nia e soree isadaroa, Uria na kera ṉalia Lord nau, ma nau ku dora asi kula na kera alu nia iei. 14Buriana ne ṉata una eri e sui, nia akele buri, ka rikia tha Jesus kai takwe, sui e ai si thaitoomana na nia tha Jesus. 15Tha Jesus ka soree isana, Kini ena ae, uria ta noki aṉi? ni tei noki rofea? Nia, manatana e sorea sa wane ana beta lana ra eri, ka soree isana, Arai ena ae, mado so ṉali nia faisia si kula eri, oko faaroṉo nau mai asi kula no alu nia iei, ma nau kwai ṉalia faisia. 16Tha Jesus ka soree isana, Meri. Nia akele, ka soree isana, Rabonae; ma toolaṉai lana si ṉata eri, na Wane ni Kwaifamanatai. 17Tha Jesus ka soree isana, Osi sua nau; uria ni nau e ai kwasi tae u isana Maka nau: oko lae isana dooraku kera, oko faaroṉo kera, Nau kwai tae kau isana Maka nau ma Maka kamulua, isana God nau ma God kamulua. 18Ni Meri Makadaline ka fula, ka faaroṉoa toa na tha Jesus e toleda, Nau ku rikia ṉa Lord; ma ka faaroṉo kera na nia sorea si do eki isana.

19Mania lalae e thaulafia naa, afa boṉi eri, fa boṉi totonao ana uiki, asi maṉa na kera fonoa naa maa asi kula na toa eki na tha Jesus e toleda kera to iei, uria na kera mau ana Ju ki, tha Jesus e lae mai, ka takwe i maalutada, ka soree isada, Enenoa kai to ani kamulua. 20Buriana ne ṉata una eri, ka fatai nia ro aba nia ki ma ninimana rakena isada. Mania toa ne toleda kera seethathala, si maṉa na kera rikia ṉa Lord. 21Mania tha Jesus ka sorea lau isada, Enenoa kai to ani kamulua; talafana ṉa Maka e arasi nau mai, alafana lau boo kwai arasi kamulua. 22Buriana ne sorea si do eri, nia ufu fafi kera, ka soree isada, Muki ṉalia tha Spirit Abu: 23Ni tei bana na kamulua muki doanita ana abula taa la nia ki, kera doanita bonaa ani nia; ni tei bana na muki sorea abula taa la nia ki kai to fafi nia, kai to bonaa fafia.

24Ma tha Tomasi, tee nonii wane ana akwala ma ro wane ba ki, na kera alaṉia atha Didimasi, e ai si ni isada si maṉa na tha Jesus e fula. 25Mania toa eri ne toleda keka soree isana, Kamilia mili rikia ṉa Lord. Sui ni nia e soree isada, Mada sa nau e ai kwasi rikia fuila neila i ro aba nia ki, ma kwasi rete sulia fuila neila eki ana kukuku, ma kwasi rete sulia ninimana rakena ana abaku, nau sa kwa fitoo e ai.

26Ma kwalu fa boṉi e sui, toa nia ne toleda kera to lau i la biu, ma tha Tomasi ka ni bida. Tha Jesus e fula mai, si maṉa na kera fonoa naa maa, ka takwe i maalutada, ka sorea, Enenoa kai to ani kamulua. 27Sui nia soree isatha Tomasi, Falea mai kukumu, oki rikia ro aba nau ki; ma oko falea mai abamu, oki rete ania i ninimana rakeku: ma osi fitala, oki fitoo. 28Ma tha Tomasi e luua, ka soree isana, Lord nau ma God nau. 29Tha Jesus ka soree isana, Tomasi, uria no riki nau bamua, oko fitoo: lea iada, toa na kesi rikia, ma sui kera fitoo.

30Mania bala si do oro ki lau tha Jesus e ilia isana toa nia ne toleda, na kesi keda ana buka nei: 31Ma si do nei ki kera keda, fasi muki fitoona tha Jesus ṉa Christ, Kaluwane tha God; ma uria na mulu fitoo, muki maruki ana thatana.

Currently Selected:

Jone 20: MLU1949

Highlight

Copy