Jone 18

1Buriana na tha Jesus e sorea si baea eki e sui, nia ka lae kau bia toa nia ne toleda, ka tatha rarafolo ana darigwaugwau i Kidorona, asi kula na tee ra ni iei, ma ka kotho iei, nia ma toa nia ne toleda. 2Ma tha Judasi lau boo, ne faaalamai nia, e thaitoomana si kula eri: uria na tha Jesus kai fufula ṉado i kula eri bia toa nia ne toleda. 3Mania tha Judasi e rikia naa toa ana firua, ma toa ni ilido ki, na wane inoto ni foa ki ma Farisi ki kera falea iana, sui ka lae mai fafia laeta ki ma kwethu ki ma rauma. 4Mania tha Jesus, e thaitoomana si do ki sui boo na kai lae mai fafi nia, ka lae mai, ka soree isada, Ni tei na muki rofea? 5Kera luua, keka una eri, Tha Jesus, wane i Nasaretha. Tha Jesus ka soree isada, Ni nau ku to bakua. Ma tha Judasi lau boo ne faaalamai nia, e takwe bana isada. 6Mania si maṉa nia soree isada, Ni nau ku to bakua, kera dua falaburi, keka asi kera iano. 7Mania nia ka soetooda lau, Ni tei na muki rofea? Ma keka sorea, Tha Jesus, wane i Nasaretha. 8Tha Jesus e luuda, ka una eri, Ku faaroṉo kamulua sui naa na nau ku to bakua: mania mada sa muki rofe uri nau, alamatania toa nei ki keki lae nada: 9Fasi si baea eri kai mamana ne sorea, Ana toa eri no falea ifaku e ai ta wane si aana faisi nau. 10Mania tha Saimona Pita ana tee nini ni firu, e lafua, ka kwaea wane ni ra aofia ni foa, ma ka kwaemusia aliṉa aola nia. Ma thatana wane ni ra eri na tha Malakasi. 11Mania tha Jesus e soree isatha Pita, Alua lau nini ni firu i fuila: titiu na Maka nau e falea ifaku, kwasi kuufia akua?

12Mania toa ana firua eki ma wane inoto ne tatha inaoda, ma toa ni ilido ki ana Ju ki, kera raua tha Jesus, keka kani nia, 13Keka tolea isatha Anasi totonao; uria ni nia waifuṉa tha Kaiafasi, ne aofia ni foa afa ṉali eri. 14Kaiafasi wane ba ne soree isana Ju ki, na do na kai lea ifada na tee nonii wane kai mae uria toa eri.

15Ma tha Saimona Pita e lae iburiatha Jesus, ma tee nonii wane lau ana toa ne toleda. Ma aofia ni foa e thaitoomana wane eri, me kotho mai bia tha Jesus i la labata aofia ni foa; 16Sui tha Pita e takwe bana buira maa. Mania ruana wane na tha Jesus e tolea, nia na aofia ni foa e thaitoomana, ka lae kau, ka ṉata isana kini ni ifini lana maa, ka tolea mai tha Pita. 17Mania kini eri ne ifinia maa ka soree isatha Pita, Ma ni oe lau boo wane ana toa ba ki na wane nei e toleda? Nia sorea, Ni nau e ai. 18Ma toa ni ra ki ma toa ni ilido ki kera takwe kula eri, kera soonia era ana makeo; uria na si maṉa eri si maṉa ana gwagwaria; ma keki thara ada: ma tha Pita lau boo e takwe isada, kai thara ana.

19Mania aofia ni foa e soetoona tha Jesus sulia toa nia ne toleda, ma sulia kwaifamanataia nia. 20Tha Jesus e luua, ka una eri, Nau ku ṉata lalaa isana toa na fanua: ku kwaifamanatai ṉado i la biu ni ofu la ma i la biu baita tha God, kula na Ju ki sui bana keki ofu mai iei; ma nau e ai kwasi sore thaufuni ata do. 21Uria ta noko soetooku? soetoona toa na kera roṉoa ṉata laku, si do na nau ku soree isada: rikia fasi, toa eri kera thaitoomana si do nau ku soredaki. 22Buriana ne ṉata una eri, tee nonii wane ana toa ni ilido ki na kera takwe isada ka fidalia tha Jesus, ka una eri, Oko luua aofia ni foa una eri? 23Tha Jesus e luua, ka una eri, Mada sa nau ku ṉata taa, oki faamamanea si do no thaitoomana ne taa: sui mada sa ku ṉata lea, uria ta noki kwae nau? 24Mania tha Anasi e arasi nia, na kera kania, isana aofia ni foa na tha Kaiafasi.

25Ma tha Saimona Pita e takwe bana, ka thara ana. Mania kera soree isana, Ma ni oe lau boo wane ana toa ba ki ne toleda? Nia tofea, ka sorea, Ni nau e ai. 26Tee nonii wane ana toa ni ra aofia ni foa, ina lana wane ba na tha Pita e kwaemusia aliṉana, ka sorea, Nau ’uria sa ku riki oe i la ra ba bi nia. 27Mania tha Pita ka tofea lau: ma si maṉa eri u boo kukua ka ’ai.

28Mania keki talaia tha Jesus faisia tha Kaiafasi uri la biu baita toa i Roma: nai la uusuwadia u boo; ma ni kera e ai kesi kotho i la biu eri, fasi e ai kesi sua, fasi keki ania fafaṉa tathafafi la ba. 29Mania tha Paelate e lae kau isada, ka sorea, Si ta na muki alaṉia ana wane nei? 30Kera luua, keka soree isana, Mada sa wane nei e ai si ilia si do ne taa, sa mika falea ifamu e ai. 31Mania tha Paelate e soree isada, Kamulua muki tole nia, ma wane ni kotu kamulua kai ṉata sulia sulaania lo kamulua. Mania Ju ki kera soree isana, E ai kesi alamatai kamilia miki thauṉia ta wane: 32Fasi bae lana tha Jesus kai mamana, na nia sorea na ba, ka fatai nia mae la na nia toto kai mae ania.

33Mania tha Paelate e kotho lau i la biu baita toa i Roma, ka ailia mai tha Jesus, ka soree isana, Oe Kiṉa Ju ki? 34Tha Jesus e luua, ka una eri, O sorea si do eri i talaamu, mado tei toa lau kera faaroṉo oe ania suli nau? 35Tha Paelate e luua, ka una eri, Nau ṉa Ju? Kulee toa oe bia wane inoto ni foa ki kera fale oe ifaku: si ta no ililia mai? 36Tha Jesus e luua, ka una eri, Tooa nau do fanua nei iano e ai: mada sa tooa nau do ana fanua nei iano, do toa ni ra nau keki firu, fasi e ai kesi fale nau ifana Ju ki: ma sui tooa nau e ai si ita ana fanua nei. 37Mania tha Paelate e soree isana, Oe na kiṉa nania? Tha Jesus e luua, ka una eri, Oi sorea na nau ṉa kiṉa. Si do eri kera kwalafi nau uria, ma si do eri nau ku lae mai uria ana fanua nei iano, fasi kwa faamamanea si do nau ku thaitoomana sulia mamana la eri. Ni tei ne mamana kai roṉoa liṉana ṉata laku. 38Tha Paelate ka soree isana, Ma ṉa ta na ṉa mamana la?

Ma buriana ne sorea si do eri nia ka lae lau kau isana Ju ki, ka soree isada, Nau e ai kwasi fulatoona ta si do kekeo ani nia. 39Ma sui biraṉamulua, nau kwai lubea ta wane kai lae ifamulua ana fafaṉa tathafafi la: mania muki thathamia kwai lubea ṉa Kiṉa Ju ki kai lae ifamulua? 40Mania kera sui keka ’ai lau, keka una eri, Wane nei e ai, tha Barabasi ana. Sui tha Barabasi wane ne laulau.

Currently Selected:

Jone 18: MLU1949

Highlight

Copy