Jone 12

1Mania si maṉa na ono fa boṉi e to ana fafaṉa tathafafi la ba tha Jesus e lae mai uri Bethani, asi kula na tha Lasarasi ka ni iei, wane ba na tha Jesus e tataea faisia toa mae ki. 2Mania kera thasi faṉa ifana i thaulafia i kula eri: ma ni Matha ka ra ka fale iada; ma tha Lasarasi ka teoreri ana faṉa la i maalutana toa na kera faṉa bi nia. 3Mania ni Meri e ṉalia mai ta si gwai inoto ne kulua faamau, do usi lana e baita faamau, ka gwaia aaena tha Jesus, ma ka usua aaena ana ifuna: ma maafera eri sui boo ka makwa lea sulia gwai eri. 4Ma tha Judasi Isikarioto kaluwane tha Saimona, tee nonii wane ana toa nia ne toleda, wane na toto kai faaalamai nia, ka sorea, 5Uria ta na kesi usi ana gwai nei ana ulu taleṉee peni, fasi keki falea ana toa na kesi rikii do? 6Ma nia ṉata una eri, uria na toa na kesi rikii do ki keka oga nia e ai; uria nia wane ne abula dodora, wai malefo kera ni isana, nia kai ṉaṉalia do na kera alua iei. 7Mania tha Jesus e sorea, Muki alamatania; do nei e to isana maakwalia fa boṉi na keki kwaiṉei nau ania. 8Uria toa na kesi rikii do keki to ṉado bada isamulua; ma nau kwasi to ṉado isamulua.

9Mania toa oro ana Ju ki kera thaitoomana na nia to kula eri: keki lae mai, talitoona uria tha Jesus e ai, fasi keki rikia tha Lasarasi lau boo, wane ne tataea faisia toa mae ki. 10Sui wane inoto ni foa ki keka furia ṉata fafia si ade la na keka ilia fasi keka thauṉia tha Lasarasi lau boo; 11Uria na sulia wane eri toa oro ana Ju ki kera lae nada, keka fitoona tha Jesus.

12Afa boṉi iburiana, malului wane baita na kera lae mai isana fafaṉa eri, si maṉa na kera roṉoa na tha Jesus kai lae na mai uri Jerusalema, 13Keka ṉalia abana niu ki, keka lae kau fasi keki toda ani nia, keka suuni, keka una eri, Tha God ka thuthufi nia: Lea iana, Kiṉa Isirela, na kai lae mai ana thatana tha Lord. 14Ma tha Jesus, buriana ne fulatoona tee kalee ase, ka ono i fafona, talafana si do na kera keda, 15Osi mamau, thari Saeono: rikia fasi, Kiṉa oe kai lae mai, kai ono fafona kaela ase. 16Si do eki toa nia ne toleda kesi filoṉania u inao: sui lalae si maṉa na kera faainotoa tha Jesus, kera bii manatatoona na kera keda si do eki suli nia, bia na kera ilia si do eki iana. 17Mania malului wane eri na kera ni isana si maṉa ne ailia tha Lasarasi faisia kwaiṉeia, ma ka tataea faisia toa mae ki, toa eki kera faamamanea si do na kera thaitoomana suli nia. 18Sulia si kula eri lau boo malului wane ba kera lae mai, kera toda ania, uria na kera roṉoa ne ilia bala si do eri. 19Mania Farisi ki kera ṉata kwailiu bi kera i talaada, keka una eri, Muki rikia na muki ilia ta si si mamana neri: lio fasi, toa na fanua ni sui kera lae iburiana.

20Ma tei toa i Girisi kera lae bia toa na kera tae uria foa la isana fafaṉa eri: 21Mania toa eki kera lae mai isatha Filifi, wane i Betheseida, fanua i Galili, keka ṉata kwaitakoi isana, keka una eri, Arai ena ae, kamilia mili thathamia mika rikia tha Jesus. 22Tha Filifi e lae mai ka faaroṉoa tha Adaru: tha Adaru ka lae mai bia tha Filifi, keko faaroṉoa tha Jesus. 23Ma tha Jesus ka luuda, ka una eri, Kadee thato be fula naa, na keki faainotoa Kaluwane imole ania. 24Mamana, mamana, ku soree isamulua, Mada sa ta foee uiti e ai si asia i theegano, si mae, do eri kai to talitoona boo; ma mada sa nia kai mae, nia kai fuṉu ana foee do oro. 25Wane na kai ogoni ana maṉona, maṉona kai aana faisi nia; ma wane na ka lalakwatania maṉona i fanua nei iano, maṉona kai to isana ana marukia tatha. 26Mada sa ta wane ka ra ifaku, nia kai lae mai iburiaku; ma si kula nau kwai to iei, kula eri lau boo wane ni ra nau kai to iei: mada sa ta wane ka ra ifaku, nia na Maka nau kai fare baita ania. 27Lioku e dila faamau si maṉa eri; ma sui si ta na kwai sorea? Maka ae, oki beta nau faisia kadee thato eri. Sui sulia si kula eri na ku fula asi kadee thato eri. 28Maka ae, oki faainotoa thatamu. Mania liṉana si ṉata la ka sifo mai faisia thalo, ka una eri, Nau ku faainotoa naa, ma kwai faainotoa lau. 29Mania malului wane na kera takwe isana, kera roṉoa, keka sorea, Kukururua e dee: tei toa lau keka sorea, Tee angel e ṉata isana. 30Tha Jesus e luuda, ka sorea, Si ṉata la nei e ai si sifo mai uri nau, e sifo uri kamulua. 31Si maṉa eri maṉa ana kotu baita ifana fanua nei iano: si maṉa eri keki sui nia ne inoto i fanua nei iano kai lae kau. 32Ma ni nau, mada sa kera tafo nau ia faisia fanua nei iano, kwai ilia toa ni sui keki lae mai isaku. 33Nia ṉata una eri, ka fatai nia mae la na nia toto kai mae ania. 34Mania malului wane eri kera luua, keka una eri, Kamilia mili roṉoa ana ṉa lo na Christ ba kai to ṉado toto si sui: ma nifana ade lana oko sorea, Kaluwane imole keki tafo nia ia e ai si ei boo? Kaluwane imole eri ni tei? 35Mania tha Jesus e soree isada, Ta kasi maṉa lau ṉa lalaa la kai to isamulua. Lae asi maṉa na ṉa lalaa la ni isamulua, fasi maerodo e ai si rodo faisi kamulua: ma wane na ka galo i la maerodo e ai si thaitoomana si kula na kai lae uria. 36Si maṉa na lalaa la ni isamulua, muki fitoona lalaa la eri, fasi kamulua na kaluwane lalaa la ki.

Si do eki tha Jesus ka sorea, sui ka lae nana, ka thaufuni nia faisida. 37Sui nia ilia mena bala si do oro eki inaofada, e ai kesi fitoona bada: 38Fasi bae lana tha Aisaia ṉa porofeta kai mamana, ne sorea,

Lord, ni tei ne fitoona si do na mili ṉata sulia?

Ma ni tei na kera fatai nia abana tha Lord isana?

39Sulia si kula eri kesi talaana fitoona lana, uria na tha Aisaia e sorea lau,

40Nia e faarorodoa maada, ma ka ilia ruruuda ka sadi;

Ada mado e ai keka lio ana maada, ma keka thaitoomana ana ruruuda,

Ma keka akele iburi,

Fasi kwa faamarukida.

41Si do eki tha Aisaia e sorea, uria ne rikia inotoa nia; me ṉata suli nia. 42Una ena mena, toa oro ana toa gwauwai ki lau boo keka fitoona; sui sulaania Farisi ki kesi faamamanea, ada keki arasida faisia biu ni ofu la: 43Uria na kera thathamia inotoa ita ana wane ki ka tatha ana inotoa ita atha God.

44Tha Jesus ka ’ai, ka sorea, Wane na ka fitooku, e ai si fitooku, kai fitoona ni nia ne arasi nau mai. 45Ma wane na kai riki nau kai riki nia ne arasi nau mai. 46Nau ku lae mai ṉa lalaa la i la fanua nei iano, fasi ni tei bana na kai fitooku ka ai si to i la maerodo. 47Ma mada sa ta wane ka roṉoa si ṉata nau, ma ka ai si faamamanea, nau e ai kwasi ṉata suli nia mala wane ni kotu: uria ni nau kwasi lae mai fasi kwai ṉata una eri sulia toa na fanua nei iano e ai, fasi kwa faamarukia toa na fanua nei iano. 48Wane na ka fare faekwa iaku, ma ka ai si roṉoa si ṉata nau, ana tee wane ni kotu na kai ṉata suli nia: si baea ba nau ku sorea, si do eri kai ṉata suli nia afa boṉi iisi. 49Uria ni nau e ai kwasi ṉata asi do i talaaku; ṉa Maka ne arasi nau mai, nia e faaroṉo nau mai asi do nau kwa sorea, ma kwa ṉata sulia. 50Ma nau ku thaitoomana si ṉata fifi nia ṉa marukia tatha: mania si do eki nau ku ṉata sulia, alafana ṉa Maka e soree isaku, una eri lau boo nau kwai ṉata.

Currently Selected:

Jone 12: MLU1949

Highlight

Copy