Jone 11

1Ma tee nonii wane e matai, tha Lasarasi i Bethani mai, toaa ni Meri ma doorana na ni Matha. 2Meri eri ba e gwaia ṉa Lord ana gwai ba, ma ka usua aaena ana ifuna, na waiwaena nia na tha Lasarasi e matai. 3Mania ro wai doorana eki keroa kwaiarasi kau isana, keko una eri, Lord, rikia fasi, wane ba no liothau ani nia e matai. 4Si maṉa na tha Jesus e roṉoa, nia ka sorea, Mataia nei sa ka maelia e ai, do ana inotoa tha God, fasi keki faainotoa Kaluwane tha God ania. 5Ma tha Jesus e liothau ani Matha, bia doorana, ma tha Lasarasi. 6Mania si maṉa nia roṉoa ne matai, nia ka to u sulia ro fa boṉi asi kula na nia toto iei. 7Sui iburiana nia soree isana toa ne toleda, Lae mai, kuki lae si lau uri Judia. 8Toa ne toleda kera soree isana, Rabae ae, e ai si tau u bana na Ju ki kera rofe uria ufaumu la; ma oki lae lau uria si kula eri? 9Tha Jesus e luuda, ka una eri, Ta na sa tee tafulu kadee thato ma ro si kadee thato ni ana fa thato, mado? Mada sa ta wane kai lae i la thato, nia e ai si taofai nia, uria ne rikia ṉa lalaa la i fanua nei iano. 10Sui mada sa ta wane ka galo afa rodo, nia taofai nia, sulia ṉa lalaa la e ai si ni ani nia. 11Si do eki nia sorea: ma sui iburiana nia soree isada, Dooraka na tha Lasarasi kai biṉa ana; sui kwai lae, fasi kwai tharasi nia faisia biṉa la. 12Mania toa ne toleda kera sorea, Lord, mada sa nia kai biṉa, nia kai maruki. 13Do tha Jesus e ṉata sulia mae lana: ma ni kera manatada sa nia e ṉata sulia wane kai mamalo i la biṉa. 14Mania tha Jesus ka faaroṉo fatai ani kera, ka soree isada, Tha Lasarasi e mae naa. 15Me lea iaku ifamulua na nau kwasi toto isana, fasi muka fitoo; una ena mena, kuki lae akulua isana. 16Mania tha Tomasi, na kera alaṉi nia atha Didimasi, ka soree isana toa keki tole nia bida, Kuki lae lau boo, fasi kuki mae bi nia.

17Mania tha Jesus lalae e fula, ka fulatoona ne to naa i la kwaiṉeia sulia fai fa boṉi. 18Ma Bethani e ni karaṉia Jerusalema, karaṉia ta ro maele; 19Ma toa oro ana Ju ki kera lae mai sani Matha ma sani Meri, keka faainamaruki keroa sulia waiwaena keroa eri. 20Mania si maṉa ni Matha e roṉoa tha Jesus kai lae na mai, e lae ka toda ania: ma ni Meri e ono u bana i maafera. 21Mania ni Matha e soree isatha Jesus, Lord, mado so toto i kunei, waiwaena nau sa ka mae e ai. 22Ma si maṉa eri mena, nau ku thaitoomana na atona bana ta do noki gania atha God, tha God kai falea iamu. 23Tha Jesus ka soree isana, Waiwaena oe toto kai tatae lau. 24Ni Matha ka soree isa na, Nau ku thaitoomana na nia kai tatae lau ana tatae la ba faisia maea afa boṉi iisi. 25Tha Jesus ka soree isana, Nau ṉa tatae la faisia maea, ma ṉa marukia: wane na kai fitooku, ka mae mena, do kai maruki: 26Ma ni tei bana ne maruki ma kai fitooku toto sa ka mae e ai, Oki fitoona si do eri? 27Nia soree isana, Iu, Lord: ku fitoo naa na ni oe Christ ba, Kaluwane tha God, wane na kera maakwali oe oki lae mai i fanua nei iano. 28Ma buriana ne sorea si do eri, nia ka lae kau, ka aili thaufuni ana doorana na ni Meri, ka una eri, Wane ni Kwaifamanatai be ni kunei, ma kai aili oe mai. 29Ma ni nia, si maṉa ne roṉoa, e tatae fofoa, ka lae isana. 30(Ma tha Jesus e ai si fula u mai ana toaa eri, ka to u asi kula na ni Matha e toda ania iei.) 31Mania Ju ki na kera to bi nia i maafera keki faainamaruki nia, si maṉa na kera rikia ni Meri kai tatae fofoa, ka kotho i maa, keka lae iburiana, manatada sa nia ka lae isana kwaiṉeia fasi kai aṉi kula eri. 32Mania ni Meri, si maṉa nia fula asi kula na tha Jesus ni iei, ma ka riki nia, ka asi nia iano isana aaena, ka una eri isana, Lord, mado so toto i kunei, waiwaena nau sa ka mae e ai. 33Mania si maṉa na tha Jesus e riki nia kai tatao, ma Ju eki lau boo keki tatao na kera lae mai bi nia, nia kwai baita i ruruuna, ma liona ka dila, 34Ka sorea, Mulu alu nia ifei? Kera soree isana, Lord, lae mai, oki rikia. 35Tha Jesus ka aṉi. 36Mania Ju ki kera sorea, Rikia fasi liothau la ne liothau ani nia! 37Sui tei toa iada kera sorea, Wane nei, ne ifinia maana wane ba na maane boko, e ai si talaana sa kai adea sa wane nei lau boo ka ai si mae? 38Mania tha Jesus e kwai baita lau nana, ka lae mai isana kwaiṉeia. Ma kwaiṉeia eri na ṉa maufi, ma tee gwa fau e teo isana. 39Tha Jesus ka sorea. Muki idua gwa fau ena. Ni Matha, waiwaena wane eri ne mae, ka soree isana, Lord, si maṉa eri nia makwa taa naa: uria na fai fa boṉi e sui naa ani nia na nia e mae. 40Tha Jesus ka soree isana, Ta na ba ku soree isamu, na mada sa oko fitoo, do oki rikia inotoa tha God? 41Mania keka idua gwa fau eri faisia si kula na kera alua wane eri ne mae. Ma tha Jesus e lio alaa, ka sorea, Maka ae, ku sore lea iamu uria no roṉoa ṉata laku. 42Ma nau ku thaitoomana noki roṉoa ṉado bamua: sui sulaania malului wane nei na keki takwe kakali ku sorea, fasi keki faamamanea no arasi nau mai. 43Ma nia ṉata una eri e sui, ka ’ai ana ’ai la baita, Lasarasi, oki kotho mai i maa. 44Ma nia ne mae ka kotho mai i maa, na kera kani fafia abana ma aena ana maku ni afu lana wane mae; ma kera afua maana ana maku faekwa. Tha Jesus ka soree isada, Luke nia, muki alamatania kai lae.

45Mania toa oro ana Ju ki, na kera lae mai sani Meri ma kera rikia si do na tha Jesus e ilia, keki fitoona. 46Sui tei toa iada kera lae kau isana Farisi ki, keka faaroṉoda asi do na tha Jesus e ilidaki.

47Mania wane inoto ni foa ki ma Farisi ki kera ofua mai tee ofu la, ma keka sorea, Ta neri na kuki ilia? uria na wane eri ka ilia bala si do oro ki. 48Mada sa kuki to faisi nia una eri, imole ni sui keki fitoona: ma toa i Roma toto keki lae mai, keki ṉalia fanua kulu ma kulee toa kulu lau boo faisi kulu. 49Ma sui tee wane iada, tha Kaiafasi, uria nia aofia ni foa afa ṉali eri, ka soree isada, E ai dodoloa musi thaitoomana ta si do, 50Ma musi filoa na do e lea ifakulua sa ta tee nonii wane kai mae uria toa eki, ada kulee toa eri sui boo ka sui teefau. 51Ma si do eri nia e ai si sorea i talaana: uria nia aofia ni foa afa ṉali eri, ka ṉata mala porofeta, ka sorea na tha Jesus toto kai mae uria kulee toa eri; 52Ma talitoona uria kulee toa eri e ai, fasi kai ofua lau boo ana tee si do wela tha God ki na kera foatata anida. 53Mania ita afa boṉi eri ka lae alaa keki furia ṉata suli nia si ade la na keki ilia fasi keka thauṉi nia.

54Mania tha Jesus e ai si lae fatai lau i maalutana Ju ki, ka lae faisia si kula eri uria fanua na ni karaṉia na fanua kwasi, uri la toaa susu thatana Ifiremu; ma nia to iei bia toa nia ne toleda. 55Ma tathafafi la ba ana Ju ki e kwaikaraṉi naa: ma toa oro kera lae faisia fanua kakali ki mai, kera tae uri Jerusalema si maṉa na tathafafi la e ai si fula u mai, fasi keki faafalu kera. 56Mania kera rofe uria tha Jesus, ma keka ṉata kwailiu, si maṉa na kera takwe i la biu baita tha God, keka una eri, Nifana manatamulua? Sa nia ka ai si fula isana fafaṉa? 57Ma wane inoto ni foa ki ma Farisi ki kera sorea naa, sa mada sa ta wane e thaitoomana si kula ne ni iei, kai faatai nia, fasi keki rau nia.

Currently Selected:

Jone 11: MLU1949

Highlight

Copy