Jone 13

1Ma si maṉa na fafaṉa ba ana tathafafi la e ai u, tha Jesus e thaitoomana kadee maṉa nia ne fula naa na nia kai lae faisia fanua nei iano, kai lae isana ṉa Maka, e liothau ana toa nia ki na ni fanua nei iano, me liothau faamau iada. 2Ma si maṉa na kera ni ana fafaṉa i thaulafia, ma tha devil e ṉata naa i ruruuna tha Judasi Isikarioto, kaluwane tha Saimona, fasi ka faaalamai nia, 3Tha Jesus, ne thaitoomana na ṉa Maka e falea si do ki sui bana i abana, ma nia e lae mai ka ita atha God, ma kai oli lau isatha God, 4Ka tatae faisia faṉa la, ka tanusia tooni nia ki, ka alua kau; ka ṉalia si thala ana usu lana seena imole, ka afisi nia ania. 5Sui nia kikia ta si kafo i la do ni sisiu, ka thafalia ka taua aaena toa ne toleda, ma ka usua ana thala eri na nia e afisi nia ania. 6Me lae mai ka fula atha Saimona Pita. Ma tha Pita ka soree isana, Lord, ni oe, oki taua aaeku? 7Tha Jesus e luua, ka soree isana, Si do kwai ilia osi thaitoomana si maṉa eri; sui do toto oki thaitoomana bamua. 8Tha Pita ka soree isana, E ai dodoloa oki taua aaeku. Tha Jesus e luua, ka una eri, Mada sa kwasi taufi oe, oe ṉa do nau e ai. 9Tha Saimona Pita ka soree isana, Lord, talitoona aaeku e ai, ro aba nau ki lau boo ma gwauku. 10Tha Jesus ka soree isana, Wane ne sisiu naa e ai si thathamia lau tau lana, aaena bana kai taua, nia falu teefau: ma ni kamulua mulu falu, una ena kamulua sui e ai. 11Uria ne thaitoomana wane na kai faaalamai nia; mania nia ka sorea, Musi falu si sui.

12Ma buriana ne taua aaeda e sui, ma ka ṉalia tooni nia ki, ma ka teoreri lau, nia ka soree isada, Muki thaitoomana maalutana si do nau ku ilia ani kamulua? 13Muki alaṉi nau ana Wane Inoto, ma, Lord: ma mulu ṉata ka too; uria ni nau do eri mamana boo. 14Mania mada sa ni nau, ṉa Lord ma ṉa Wane Inoto, ku taua aaemulua, kula sa muki ilia lau boo na muki taua aaemulua kwailiu. 15Uria nau ku ilia si do nei fasi muki lio sulia, muki ade lau boo ’uria ade la na nau ku ilia iamulua. 16Mamana, mamana, ku soree isamulua, Wane ni ra e ai si baita si tatha ana wane inoto nia; ma wane na kera arasia mai e baita si tatha ani nia ne arasi nia mai. 17Mada sa mulu thaitoomana si do eki, kai lea iamulua mada sa muki ilia. 18Nau kwasi ṉata suli kamulua sui: ku thaitoomana toa na nau ku filida naa: sui fasi kekeda la abu ba kai mamana, Wane na ka ania berede nau e taka ani nau ana bora aaena. 19Too asi maṉa eri ku faaroṉo kamulua ania si maṉa ne ai si mamana u, fasi, lalae kai mamana naa, muki fitoo na nau ku to bakua. 20Mamana, mamana, ku soree isamulua, Wane na kai thathagonia ni tei bana na nau kwai arasia isana, kai thathagoni nau; ma wane na kai thathagoni nau kai thathagoni nia ne arasi nau mai.

21Buriana na tha Jesus e ṉata una eri e sui, liona ka dila faamau, ka faamamanea si do ne thaitoomana, ka sorea, Mamana, mamana, ku soree isamulua, Tee nonii wane iamulua kai faaalamai nau. 22Mania toa ne toleda kera lio kwailiu uri kera, manatade rurua sulia ni tei ne ṉata sulia. 23Tee nonii wane ana toa nia ne toleda e to isana tatafe, ka teoreri i ruruuna tha Jesus, wane na tha Jesus e liothau ania. 24Mania tha Saimona Pita ka fafuilala uria wane eri, ’uria sa ka soree isana, Oko faaroṉo kamilia ana wane na nia kai ṉata sulia. 25Ni nia e bosuli ana ruruuna tha Jesus, ka soree isana, Lord, ni tei neri? 26Mania tha Jesus e luua, ka una eri, Nia neri, na nau kwai tonia si faṉa ifana, ma kwai falea. Ma nia tonia si faṉa eri e sui, ka falea ifatha Judasi, kaluwane tha Saimona Isikarioto. 27Ma buriana si faṉa eri, tha Satan ka kotho i ruruuna. Mania tha Jesus e soree isana, Si do noki ilia, ili fofoa ania. 28Me ai ta wane isana tatafe eri si thaitoomana si do ne ṉata una eri isana uria. 29Uria na tei toa manatade una eri, sa uria na tha Judasi wai malefo eri ni isana, na tha Jesus e soree isana, Oki usia si do na kuki rofedaki ana fafaṉa; mado, kai falea ta si do ana toa na kesi rikii do ki. 30Ma nia e ṉalia si faṉa eri, ka kotho u boo i maa: ma fanua e rodo naa.

31Mania buriana ne lae naa, tha Jesus ka sorea, Si maṉa eri kera faainotoa Kaluwane imole, ma keka faainotoa tha God ani nia; 32Lalae kera faainotoa tha God ani nia, tha God lau boo kai faainotoa Kaluwane imole eri ani nia i talaana, ma si maṉa eri u boo na nia kai faainoto nia. 33Kala wela ki, ta kasi maṉa faekwa kwai to u isamulua. Toto muki rofe uri nau: ma talafana lau boo na nau ku sorea naa isana Ju ki, Si kula na nau kwai lae uria, kamulua muka dora ana fula la iei; ku ṉata una eri isamulua lau boo si maṉa eri. 34Si ṉata fifi falu nau ku falea iamulua, Sa muki liothau kwailiu ani kamulua; talafana lau boo ni nau ku liothau iamulua, muki liothau kwailiu ani kamulua lau boo. 35Asi do eri toa ni sui bana keki thaitoomana na ni kamulua toa nau ku tole kamulua, mada sa muki liothau kwailiu ani kamulua.

36Tha Saimona Pita ka soree isana, Lord, ifei noki lae uria? Tha Jesus e luua, ka una eri, Si kula na nau kwai lae uria, o dora ana fula la iei iburiaku si maṉa eri; sui do toto oki lae lau boo iburi. 37Tha Pita ka soree isana, Lord, uria ta na kwai dora ana lae la iburiamu si maṉa eri boo? Nau kwai falea maṉoku uri oe. 38Tha Jesus e luua, ka una eri, Oki falea maṉomu uri nau? Mamana, mamana, ku soree isamu, Si maṉa na kukua e ai si ’ei u, ni oe ulu fa sore lana oki sorea o dora bamu iaku.

Currently Selected:

Jone 13: MLU1949

Highlight

Copy