Jone 1

1Ana thafali la mai ṉa Baea eri e to bana, ma ṉa Baea eri e to isatha God, ma ṉa Baea eri na ṉa God. 2Ni nia e to ana thafali la mai isatha God. 3Si do ki sui bana nia futaṉai nia; ma nia e ai faisia, e ai ta do si futa na kera futaṉai nia. 4Marukia ni ani nia; ma marukia eri na ṉa lalaa la na ka laafia imole ki. 5Ma ṉa lalaa la eri kai laa i la maerodo; ma ṉa maerodo e ai si suusia. 6Tee wane e fula, na tha God e arasia mai, thatana tha Jone. 7Wane eri e lae mai uria faamamane lana si do ne thaitoomana, fasi kai faamamanea ṉa lalaa la, fasi toa ni sui bana keki fitoo suli nia. 8Nia ṉa lalaa la e ai, e lae mai fasi ka faamamanea si do ne thaitoomana sulia ṉa lalaa la. 9Lalaa la mamana eri, ne laafia wane ki sui bana, kai lae mai uria fanua nei iano. 10Nia e toto ana fanua nei iano, me futaṉai nia fanua nei iano, sui fanua nei iano ka dora ani nia. 11E lae mai isana do nia ki, ma toa nia ki kesi thathagoni nia. 12Sui toa eri na kera thathagoni nia mai, nia ka falea sukwaia ifada keka wela tha God ki, ifana toa eri na keka fitoona thatana: 13Na kera futa ana abu e ai, mado uria na seena imole ka thathamia, mado uria na imole ka thathamia e ai, atha God bana. 14Ma ṉa Baea eri ka imole, ma ka to i maalutamilia (ma mili rikia inotoa nia mala inotoa tee fa Kaluwane ṉa Maka, na nia e arasia mai), e fuṉu ana lea la ma mamana la. 15Tha Jone ka faamamanea si do ne thaitoomana suli nia, ka’ ai una eri, Wane eri nania na nau ku sorea suli nia, Wane na kai lae mai buriku e tatha naa inaoku: uria nia toto inaoku u boo. 16Uria ni nia e fuṉu, ma kulu sui kuka ṉalia ta si asi do nia ki, ma lea la fafona lea la. 17Uria na kera falea ṉa lo atha Mosesi kai falea; lea la ma mamana la ka lae mai atha Jesus Christ. 18E ai ta wane si rikia tha God ana ta si maṉa: tee fa Kaluwane eri, na ni ruruuna ṉa Maka, nia e fatai nia.

19Ma si do na tha Jone e faamamanea nania, si maṉa na Ju ki i Jerusalema mai kera arasia mai wane ni foa ki ma Lifaete ki isana fasi keki soetoona, Oe ni tei? 20Ma nia e faamamanea, e ai si tofea; ka faamamanea una eri, Nau Christ ba e ai. 21Ma kera soetoona, Ṉa ta ni ana? Ni oe tha Elaeja? Ma nia sorea, Ni nau e ai. Oe porofeta ba? Me luuda, ka una eri, E ai. 22Mania kera soree isana, Ma ni oe ni tei? fasi miki luua toa na kera arasi kamilia mai. Ta noki sorea suli oe i talaamu? 23Ni nia e sorea, Nau liṉana ṉata lana tee wane kei ’ei la fanua kwasi, Muki beta tala tha Lord ka kokoto, ’uria si do na tha Aisaia ṉa porofeta e sorea. 24Ma Farisi ki kera arasida mai. 25Ma kera soetoona, keka soree isana, Sui uria ta noki babataesi, mada sa ni oe Christ ba e ai, ma tha Elaeja e ai, ma porofeta ba ka ai? 26Tha Jone e luuda, ka una eri, Nau ku babataesi boo ana kafo: ma tee wane kai takwe i maalutamulua na mulu dora ania, 27Wane eri na toto kai lae mai buriku ne tatha naa inaoku, na si kwao ana butu nia ki mena e ai kwasi farana luke lana. 28Kera ilia si do eki i Bethabara ibali laba i Jodana, asi kula na tha Jone e babataesi iei.

29Fa boṉi iburiana tha Jone ka rikia tha Jesus kai lae na mai isana, ma ka sorea, Rikia fasi, ṉa Lama tha God, na kai ṉalia abula taa lana toa na fanua nei iano! 30Wane eri boo nania na nau ku sorea suli nia, Tee wane kai lae mai buriku ne tatha naa inaoku: uria nia toto inaoku u boo. 31Ma nau kwasi thathaitoomana; sui ku lae mai ku babataesi ana kafo sulia si kula eri, fasi keki fatai nia isana Isirela. 32Ma tha Jone e faamamanea si do ne thaitoomana, ka una eri, Nau ku rikia tha Spirit ka sifo mai mala ta bola faisia ṉa thalo; sisifo mai ka dau ani nia. 33Ma nau kwasi thathaitoomana: sui nia ne arasi nau mai kwa babataesi ana kafo, e soree isaku, Ni tei bana noki rikia tha Spirit kai sifo mai isana, ma kai dau ani nia, nia wane na kai babataesi atha Spirit Abu. 34Ma nau ku rikia naa, ma ku faamamanea wane eri Kaluwane tha God.

35Ma fa boṉi iburiana lau tha Jone kai takwe, ma ro nonii wane ana toa nia ne toleda: 36Ma nia e lio uria tha Jesus maṉa nia kai lae, ka sorea, Moki rikia ṉa Lama tha God! 37Ma ro wane eki kera roṉoa ṉata lana, ma keka lae iburiatha Jesus. 38Sui tha Jesus e akele, ka rikidaroa keko lae iburiana, ka soree isada, Ta si ta na moro rofea? Ma keko soree isana, Rabae (ma toolaṉai lana si do eri, Wane ni Kwaifamanatai ae), ifei noko to ṉado iei? 39Nia ka soree isada, Lae mai, moki rikia. Mania kero lae mai, keko rikia kula ni to nia; ma keko to bi nia afa boṉi eri: sulia thato e lio folo naa. 40Tee nonii wane ana ro wane eki na kero roṉoa tha Jone, keko lae iburiana, thatana tha Adaru, doorana tha Saimona Pita. 41Nia fulatoona totonao doorana bi nia na tha Saimona, ka soree isana, Kamarea mere fulatoona Mesaia eri (ma toolaṉai lana thata eri, ṉa Christ). 42Ma nia tole nia isatha Jesus. Tha Jesus ka lio uri nia, ka sorea, Oe tha Saimona kaluwane tha Jonasi: keki alaṉi oe ana Kifasi (ma toolaṉai lana thata eri, Ṉa fau).

43Fa boṉi iburiana nia thathamii lae kau uri Galili, ka fulatoona tha Filifi: ma tha Jesus ka soree isana, Oko lae mai iburiaku. 44Sui tha Filifi wane i Betheseida mai, toaa susu tha Adaru ma tha Pita. 45Tha Filifi ka fulatoona tha Nathaniala, ma ka soree isana, Kamilia mili fulatoona wane eri, na tha Mosesi ana ṉa lo, ma porofeta ba ki, kera kekeda sulia, nia na tha Jesus wane i Nasaretha, kaluwane tha Josefa. 46Ma tha Nathaniala ka soree isana, Ta si do lea kai lae mai i Nasaretha? Tha Filifi e soree isana, Lae mai, oki rikia. 47Ma Jesus e rikia tha Nathaniala kai lae mai isana, ma ka sorea suli nia, Rikia fasi, tee wane Isirela mamana boo, ne ai ta lole la ania! 48Tha Nathaniala ka soree isana, Nifana ade lana oko thaitoomaku? Tha Jesus e luua, ka soree isana, Si maṉa na tha Filifi e ai si aili oe u mai, si maṉa bo to i aena thakwari, nau ku riki oe. 49Tha Nathaniala e luua, ka soree isana, Rabae, oe ṉa Kaluwane tha God; oe Kiṉa Isirela. 50Tha Jesus e luua, ka soree isana, Sulaania nau ku soree isamu, Nau ku riki oe i aena thakwari ba, oki fitooku bamua? toto oki rikia tei do ne baita ka tatha ana do nei ki. 51Ma nia ka soree isana, Mamana, mamana, ku soree isamulua, Toto muki rikia thalo lo kai ifi, ma angel tha God ki keki tae kau ma keki sifo mai sulia ṉa Kaluwane imole.

Currently Selected:

Jone 1: MLU1949

Highlight

Copy