Luke 24

1Sui afa boṉi totonao ana uiki, si maṉa na kai bii dani, keka fula isana kwaiṉeia eri, keka ṉalia mai si do makwa lea ki na kera thauwai nia, ma tei ei lau bida. 2Ma kera rikia fau eri kera abulisia faisia kwaiṉeia. 3Ma kera kotho iei, ma kesi rikia seena tha Lord Jesus. 4Ma lalae mai, si maṉa na manatade nai rua sulia si do eri, rikia fasi, ro nonii wane keka takwe isada fafia maku ne faarora maada: 5Ma si maṉa na kera mau, ma kera agwaoro fafia maada uri theegano, keko soree isada, Uria ta na muki rofea wane ne maruki isana toa mae ki? 6E ai si ni kunei, e tatae naa: muki manatatoona fasi ṉata la ne ṉata ania isamulua si maṉa ne ni u i Galili, 7Be una eri, Kaluwane imole keki fale nia e ai si ei boo i abana toa na kera abula taa, keka fota fafi nia ana’ai rarafolo, ma ula fa boṉi nia kai tatae lau. 8Ma keka manatatoona bae lana, 9Ma keka oli faisia kwai ṉeia eri, ma keka faaroṉoa akwala ma tee wane eki, bia toa eki sui boo, asi do eki sui bana. 10Ma ai eki ni Meri Makadaline, bia ni Joana, ma ni Meri thainana tha Jemesi, ma tei kini lau bida, na kera faaroṉoa aposela ki asi do eki. 11Ma bae lada kera roṉoa e ’uria sa tonee si ṉata ki bana; me ai kesi faamamanea. 12Sui tha Pita ka tatae, ka fita isana kwaiṉeia eri; me agwaoro, ka rikia si maku kwakwaoa eki kai teo talitoona; ma nia ka lae nana, ka kwele asi do ne fula mai.

13Ma rikia fasi, ro wane iada keko lae afa boṉi eri boo uria tee toaa faekwa na kera alaṉia ana Emeasi, ne to fuliṉana fiu fa maele faisia Jerusalema. 14Ma keko tamani uri keroa sulia si do eki sui boo ne fula mai. 15Ma lalae mai, si maṉa na keko tamani ma keko ṉata olili uri keroa, tha Jesus talani nia ka fula karaṉi, ma ka lae bida. 16Ma maadaroa kera suusia fasi kesi thaitoomana tha Jesus. 17Ma nia ka soree isada, Si ṉata ta ki na moki ṉata bamaroa sulia, si maṉa na moki lae, ma moki liodila nania? 18Ma ta wane iadaroa, thatana tha Kiliopasi, e luua, ka soree isana, O wane o bii fula i Jerusalema nosi thaitoomana si do ne fula mai iei afa boṉi eki? 19Ma nia ka soree isadaroa, Si ta ki? Ma keko soree isana, Si do sulia tha Jesus, wane i Nasaretha, porofeta ne sukwai ana ili lana si do ki ma ana bae lana inaofatha God ma toa eki sui boo: 20Ma si ade la na wane inoto ni foa ki ma wane gwauwai kulu ki kera ilia na keka fale nia fasi keki sore mae lana, ma keka fota fafi nia ana’ai rarafolo. 21Sui mili manatatoo ṉado so ni nia naa na kai tae faisia Isirela. Ma ta si lau bia do eki sui boo, itaraena ula naa fa boṉi iburiana na kera ilia si do eki. 22Iu, ma tei kini lau boo ana ofu la kamilia kera alu fatona lamilia, na kera fula si maṉa ne bii dani isana kwaiṉeia eri; 23Ma iburiana na kesi rikia seena, keka fula, keka sorea kera rikia lau boo angel na kera fatai lalaa anida, na kera sorea nia maruki naa. 24Ma tei wane na kera toto bi kamilia kera lae isana kwaiṉeia eri, ma keka rikia ka ’uria boo si do eki na kini eki kera sorea: ma ni nia kesi rikia. 25Ma nia ka soree isada, Ro wane moro oewanea, ma ruruumaroa e bokone, musi faamamanea si do ki sui na porofeta ba ki kera sorea! 26Ta na se talaana na Christ kai to ana taa la eki, ma kai fulatoona inotoa nia, mado? 27Me thafalia atha Mosesi ma porofeta ba ki sui bana, ka inifita si do ki isadaroa ana kekeda la abu eki sui boo suli nia. 28Ma keka fula karaṉia naa toaa faekwa eri, si kula na keko lae uria: ma nia ka ade ’uria sa kai tatha nana. 29Ma kero rata iana, keko una eri, Oki to bi kamarea: uria na kai thaulafia, ma thato e lio folo naa. Ma nia ka kotho fasi kai to bidaroa. 30Ma lalae mai, si maṉa ne teoreri isana faṉa la bida, nia ka ṉalia berede, ka sore lea, ka nia, ma ka falea ifadaroa. 31Ma maada ka laa, ma keko thaitoomana; ma nia ka dola nana, kesi rikia. 32Ma keko sorea uri keroa, Ta na sa i la ruruukaroa e lae olili, si maṉa nia ṉata isakaroa sula tale, si maṉa ne inifita kekeda la abu eki isakaroa, mado? 33Ma keko tatae asi kadee maṉa eri u boo, keko oli uri Jerusalema, ma keko fulatoona akwala ma tee wane eki kera ofu, bia toa na kera ni isada, 34Keka una eri, Na Lord e tatae mamana boo, me fula fatai isatha Saimona. 35Ma keko uunu sulia si do ne fula mai sula tale, ma si ade la eri na keko thaitoomana ana ni lana berede.

36Ma si maṉa na keka sorea si do eki, tha Jesus talani nia ka takwe i maalutada, ma ka soree isada, Enenoa kai to ani kamulua. 37Ma kera aanu ma keka mau, manatade soso sa kera rikia spirit. 38Ma nia ka soree isada, Uria ta na kai taa iamulua? ma uria ta na si lio eeta ka tae i manatamulua? 39Rikia fasi ro aba nau ki ma ro aae nau ki, ni nau boo nania: sua nau, ma muki rikia; uria na spirit e ai ana si mariko ma si ogi, na mulu rikia ka ni ani nau. 40Ma iburiana ne sorea si do eri, nia ka fatai nia ro aba nia ki ma ro aae nia ki isada. 41Ma si maṉa na kesi faamamanea u bada sulia kera seethathala, ma kera kwele, nia ka soree isada, Amulua ta si do ni ania kunei? 42Ma keka falea sina ia na kera naarea, ma si dudualiṉa ifana. 43Ma nia ṉalia, ka ania inaofada.

44Ma nia ka soree isada, Si baea eki nania na nau ku sosoree isamulua, si maṉa ku ni u bi kamulua, na si do ki sui bana kai mamana e ai si ei boo, na kera keda ana ṉa lo tha Mosesi, bia porofeta ba ki, ma ṉu ki, suli nau. 45Sui nia e faatooa manatada, fasi keka thaitoomana maalutana kekeda la abu eki; 46Ma nia ka soree isada, Kera kekeda una eri, ma ṉa Christ kera tooa kai to una eri ana taa la ki, ma kai tatae faisia toa mae ki ana ula fa boṉi; 47Bia keka ṉata sulia manata akele la ma doanita la ana abula taa la ki ana thatana i maalutana kulee toa ni sui, keka thafalia mai i Jerusalema. 48Ma ni kamulua toa ni faamamane lana si do mulu thaitoomana sulia si do eki. 49Ma rikia fasi, kwa arasia mai alaṉaia Maka nau fafi kamulua: sui muki to i la toaa susu i Jerusalema, maasia si maṉa na keki faatooni kamulua ana sukwaia ne ita mai ia.

50Ma nia ka talaida i thara, lalae mai keka fula otofana Bethani: ma nia ka tafoa ro aba nia ki, ka falea lea la ifada. 51Ma lalae mai, si maṉa nia kai falea lea la ifada, nia ka lae faisida, ma kera ṉali nia uri thalo lo. 52Ma kera faabaita nia, ma keka oli uri Jerusalema ana seethathala la baita: 53Ma keka to ṉado i la biu baita tha God, keka taṉoa ma keka ṉata sulia lea la tha God. Emeni.

Currently Selected:

Luke 24: MLU1949

Highlight

Copy