Jone 2

1Ma ula fa boṉi tee nonii wane e tolekini i Kena, fanua i Galili; ma thainana tha Jesus e ni kula eri: 2Ma keki laetia tha Jesus lau boo, bia toa nia ne toleda, ka lae mai isana lumaa eri. 3Ma si maṉa na waene ka sui, thainana tha Jesus e soree isana, E ai ada ta waene. 4Tha Jesus ka soree isana, Kini ena, si ra oe neri, mado si ra nau? si kadee maṉa nau e ai u. 5Thainana ka soree isana toa ni ra ki, Atona bana ta si do nia kai soree isamulua, muki ilia. 6Ma kera takwelaṉania ono kwadee do ana kafo kula eri, na kera thauwai nia ana fau, do ana kafo ni sisiu la, uria biraṉana Ju ki, ka farana too ro audatha baita ki mado too ulu audatha baita ki. 7Tha Jesus ka soree isada, Muki lula kwadee do nei ki ana kafo, kai fuṉu. Ma kera lula ka fuṉu makisi. 8Ma nia soree isada, Muki iṉoa ta si si maṉa eri, muki ṉalia isana wane ne inoto ana fafaṉa. Ma kera ṉalia. 9Ma si, maṉa na wane eri ne inoto ana fafaṉa e kuutoona kafo eri ne lioe waene, ma ka dora ana maṉo lana mai (sui toa ni ra ki na kera iṉoa kafo eri keka thaitoomana), wane eri ne inoto ana fafaṉa ka ailia mai wane falu eri, 10Ma ka soree isana, Toa ni sui keki alu totonao asi waene ne lea; ma buriana na kera kukuu baita naa, keki bii alua si do ne ai si lea faamau: ma ni oe o alua si waene ne lea uria maṉa eri. 11Do nei, thafali lana bala si do nia ki, tha Jesus e ilia i Kena, fanua i Galili, ka fatai nia inotoa nia; ma toa ni ne toleda keka fitoona.

12Buriana si do eri e sifo uri Kapaneama, nia, ma thainana, ma doorana kera, bia toa nia ne toleda: ma keka to iei sulia aṉee fa boṉi.

13Ma tathafafi la ba, fafaṉa Ju ki, e kwaikaraṉi naa, ma tha Jesus e tae uri Jerusalema. 14Ma i la biu baita tha God nia fulatoona toa na kera usi ana buloka ki ma sifi ki ma bola ki, ma toa na kera tatala ana malefo keka ono bada iei: 15Ma nia e nailia naili ana si kwao, ka tarida sui faisia biu baita eri, sifi ki ma buloka ki lau boo; ma ka kikira malefo toa eki na keki tatala ana malefo, ka kefua tatafe kera ki; 16Ma nia soree isana toa na kera usi ana bola ki, Muki ṉalia kau do nei ki; musi adea na biu Maka nau ana biu ni usi la. 17Ma toa nia ne toleda keka onotoona na kera keda, Biu oe kai oga nau, kai to fifi iaku. 18Mania Ju ki kera luua, keka soree isana, Bala si do ta oki fatai nia isamilia, uria noko ilia si do nei ki? 19Tha Jesus e luuda, ka soree isada, Muki ogea biu tha God nania, ma nau kwai kasia lau ana ulu fa boṉi. 20Mania Ju ki keka sorea, Kera ra sulia fai tafulu fa ṉali ma ono fa ṉali, keka kasia biu baita nei, ma ni oe oki kasia ana ulu fa boṉi? 21Ma nia e ṉata sulia seena na ṉa biu tha God. 22Mania si maṉa na kera tataea naa faisia toa mae ki, toa nia ne toleda kera onotoona na nia e sorea si do eri isada; ma keka fitoona kekeda la eri, ma si baea eri na tha Jesus e sorea.

23Ma si maṉa nia e ni Jerusalema ana tathafafi la ba, si maṉa ana fafaṉa eri, toa oro kera fitoona thatana, uria na kera rikia bala si do ne ilidaki, 24Sui tha Jesus e ai si takofale nia iada, uria ne thaitoomana wane ki sui bana, 25Ma uria nia ai si rofe sa ta wane kai faamamanea ta si do sulia imole; sulaania talani nia e thaitoomana si do na ni ruruuna imole.

Currently Selected:

Jone 2: MLU1949

Highlight

Copy