Jone 3

1Sui tee wane ana Farisi ki, thatana tha Nikodimasi, e to bana, ta wane ana toa na kera gwauwai ana Ju ki: 2Wane eri e fula isatha Jesus afa rodo, ka soree isana, Rabae ae, kamilia mili thaitoomana ni oe wane ni kwaifamanatai na tha God e arasi oe mai: uria na ta wane sa ka ilia bala si do noki ilidaki e ai, mada sa tha God e ai si ni isana. 3Tha Jesus e luua, ka soree isana, Mamana, mamana, ku soree isamu, Mada sa ta wane si futa lau iburi, nia sa ka rikia tooa tha God e ai. 4Tha Nikodimasi ka soree isana, Wane ne arai naa kai futa ufita lau? kai kotho lau i rakena thainana, fasi kai futa? 5Tha Jesus e luua, ka una eri, Mamana, mamana, ku soree isamu, Mada sa ta wane si futa ana kafo bia tha Spirit, nia sa ka kotho ana tooa tha God e ai. 6Do ne futa ana imole ka imole bana; do ne futa atha Spirit ka spirit bana. 7Osi kwekwele uria na nau ku soree isamu, Muki futa lau iburi e ai si ei boo. 8Thauthau kai tatha ifei ne thathamia, ma oko roṉoa kuru lana, sui o dora ania ifei ne too mai iei na ka lae mai, mado ifei na kai tatha uria: toa ni sui bana na kera futa atha Spirit kera una eri. 9Tha Nikodimasi e luua, ka soree isana, Keki ili ufita asi do nei ki? 10Tha Jesus e luua, ka soree isana, Ma ni oe, o wane ni kwaifamanatai ana Isirela, ma osi thaitoomana maalutana do eki? 11Mamana, mamana, ku soree isamu, Kamilia miki ṉata sulia si do na mili thaitoomana, ma miki faamamanea si do na mili rikidaki naa; ma musi faamamanea si do na miki sorea. 12Mada sa nau ku ṉata sulia si do fanua nei iano ki, ma mulu fitala bamulua, nifana ade lana fasi muki fitooku, mada sa kwa ṉata sulia si do ni mai thalo? 13Me ai ta wane lau si tatae uri thalo, talitoona bana nia ne sifo mai faisia thalo, nia na ṉa Kaluwane imole na ni mai thalo. 14Ma talafana tha Mosesi e tafoa baekwa i tolo ba i la fanua kwasi, alafana lau boo keki tafoa Kaluwane imole: 15Fasi ni tei bana na kai fitoona ka ai si sui, ma kai to ana marukia tatha.

16Uria na tha God e liothau una eri ana fanua nei iano, nia ka falea mai tee fa Kaluwane nia, fasia ni tei bana na kai fitoona ka ai si sui, ma kai to ana marukia tatha. 17Uria na tha God e ai si arasia mai Kaluwane nia uria fanua nei iano fasi kai ṉata mala wane ni kotu sulia toa na fanua nei iano e ai; fasi kai faamarukida bana. 18Wane ne fitoona, e ai kesi ṉata una eri suli nia: wane ne ai si fitoona, wane ni kotu e ṉata naa sulia, sulaania nia e ai si fitoona thatana tee fa Kaluwane tha God. 19Ma kwae lada nania, na ṉa lalaa la e fula naa i fanua nei iano, ma wane ki kesi thathamia lalaa la eri, keka thathamia ada maerodo ni ana; uria na abula lade taa. 20Uria na ni tei na kai ilia si do taa kai lalakwatania ṉa lalaa la, ma ka ai si lae mai isana ṉa lalaa la, ada keka rikia ra nia ki ne taa. 21Ma ni nia na kai ilia si do ne mamana kai lae mai isana ṉa lalaa la, fasi ka fatai nia ra nia ki, na nia e ilia si ra eki atha God.

22Buriana si do eki tha Jesus ma toa nia ne toleda kera fula i fanua i Judia; ma nia e makafa to bida i kula eri, ka babataesi. 23Ma tha Jone e babataesi lau boo i Aenona karaṉia i Salima, uria na kafo oro ni iei: ma kera lae mai, nia ka babataesida. 24Uria na kesi suia u tha Jone uri la lokafu. 25Mania oli susuua e fula mai maalutana toa na tha Jone e toleda bia Ju ki fafia sisiu la. 26Ma kera fula isatha Jone, keka soree isana, Rabae ae, wane ba ne toto isamu ibali laba i Jodana na ba, wane no faamamanea si do no thaitoomana suli nia, rikia fasi, wane eri kai babataesi, ma toa eki sui boo keki lae mai isana. 27Tha Jone e luuda, ka sorea, Ta wane sa ka ṉalia ta si do e ai, mada se ai kesi falea iana i thalo mai. 28Ni kamulua talani kamulua muki faamamanea si do na mulu thaitoomana suli nau, na nau ku sorea na ba, Nau Christ ba e ai, kera arasi nau mai kwa lae inaona. 29Wane na kini falu ni isana, ni nia ṉa wane seelea: sui wane ne ado bia wane seelea na kai takwe isana, ka roṉoa ṉata lana, kai seethathala faamau sulia ṉata lana wane seelea eri: mania seethathala la nau eri e too bonaa. 30Ni nia kai baita alaa e ai si ei boo, ma ni nau kwai oli tuli.

31Wane ne toto mai ia ka lae mai, si do ki sui bana kai gwauwai ani nia: wane ne ita i fanua nei iano mai, do fanua nei iano na ni nia, ma ka ṉata sulia fanua nei iano: wane ne lae mai i thalo, si do ki sui bana kai gwauwai ani nia. 32Ma si do ne rikia naa me roṉoa, do nia faamamanea neri: me ai ta wane si faamamanea si do nia sorea. 33Wane ne faamamanea si do nia sorea e safua si do nei, na tha God e mamana. 34Uria na wane na tha God e arasia mai kai ṉata asi baea tha God ki: uria si maṉa ne falea tha Spirit e ai si fale faekwa ania. 35Ṉa Maka ka liothau ana Kaluwane nia, me falea si do ki sui bana i abana. 36Wane na kai fitoona ṉa Kaluwane ana marukia tatha; ma wane ne ai si ade sulia ṉa Kaluwane toto si rikia marukia, ma rakeiria tha God kai to bana fafi nia.

Currently Selected:

Jone 3: MLU1949

Highlight

Copy