GENESIS 37

1Ma tha Jekofo ka to bana i la fanua na maka nia e toto ni laea iei, fanua i Kenana neri. 2Si ade la ne ita mai atha Jekofo nai nia. Tha Josefa, ne to bana sulia tee tafulu fa ṉali ma fiu fa ṉali, ka tharea feree sifi ki ofu bia thoona kera; ma wela wane eri kai to bia kaluwane ni Bila ki ma kaluwane ni Silifa ki, na ro kini maka nia: ma tha Josefa ka faaroṉoa maka nia ana abula lada ne taa. 3Ma tha Isirela e liothau atha Josefa ka tatha ana liothau lana ana baree wela nia ki sui bana, uria ne kwalafi nia asi maṉa ne arai naa: me thauwai nia tooni ifana ana kasi maku oro ki ne mogolilia. 4Ma si maṉa na thoona kera kera rikia na maka kera e liothau ani nia ka tatha ana liothau lana ana thoona kera sui bana, keka riki nia ka taa, ma kera dora ana mai tasi faṉa iamu: 5Ma sui mado so lalakwee arasi nia, moosubole, ka faaroṉoa thoona kera: ma keka bii riki nia ka taa ka tatha. 6Ma nia ka soree isada, Nau ku thathamia muki roṉoa fasi moosuboli nei na ni nau ku moosubolea: 7Uria na, rikia fasi, kulu kuka kani fafia ifii koni la ra, ma lio fasi, ifii koni nau ka tatae, ka takwe kokoto lau boo; ma, rikia fasi, ifii koni kamulua ki keka takwe kakalia, ma keka gwau toli uri theegano isana ifii koni nau eri. 8Ma thoona kera keka soree isana, Ni oe oki tatha mamana boo inaofamilia, mado? ma oki inoto mamana boo ani kamilia, mado? Ma keka bii riki nia ka taa ka tatha inunufana moosubole nia ki ma bae lana. 9Ma nia ka moosubolea tee moosubole lau, ka faaroṉoa thoona kera, ka una eri, Rikia fasi, ni nau ku moosubolea lau ta moosubole; ma, rikia fasi, thato ma madami ma tee tafulu fa bubulu tee fa bubulu, kera gwau toli uri nau. 10Ma nia ka faaroṉoa maka nia ma thoona kera; ma maka nia ka sore nia, ka una eri isana, Ṉa ta ni ana moosubole nei no moosubolea na ba? Ni nau ma thainamu ma dooramu kera miki lae mamana boo, miki gwau toli uri theegano inaofamu, mado? 11Ma thoona kera kera ugalia; maka nia molo ka lalomatoona si ṉataa eri i ruruuna. 12Ma thoona kera keka lae nada fasi keka tharea feree sifi maka kera i Sekema. 13Ma tha Isirela ka soree isatha Josefa, Thoomu kera keka tharea feree sifi eki i Sekema, mado? lae si mai, kwai arasi oe kau isada. Ma wela eri ka soree isana, Ni nau kwai to bakua nai nia. 14Ma nia ka una eri isana, Nau ku thathamia oki lae, rikia fasi sa mado e a’i thoomu kera keka to lea bada, ma feree sifi eki keka to ni lea la; sui lalae oli mai, oko faaroṉo nau mania. Mania nia ka arasia faisia kurua eri i Hefirono, lalae ka fula i Sekema. 15Ma tee nonii wane ka fulatoona, ma, rikia fasi, nia ka liliu ana i masuu: ma wane eri ka soetoona, ka una eri, Si ta noko rofe uria neri? 16Ma nia ka sorea, Nau ku rofe uria thooku kera: ku thathamia oki faaroṉo nau fasi asi kula na keka tharea feree sifi kera ki iei. 17Ma wane eri ka sorea, Kera lae naa faisia i kunei: uria ni nau ku roṉoa ṉata lada, be una eri, Kulu kau uri Dothana. Ma tha Josefa e lae buriana thoona kera, ka fulatooda i Dothana. 18Ma si maṉa na kera riki nia ni da u mai, asi maṉa eri mena ne a’i si fula u mai karaṉi kera, keka bii furia ṉataa fafi nia fasi keka thauṉia. 19Ma keka soree uri kera kwailiu, Rikia fasi, wane nei ni moosubole la kai lae na mai. 20Mania kulu kau, kulu thauṉia, kuki ṉana ania uri lala ta malau, ma kuki una eri, Ta do maruki ne taa e dudumeme ania: kuka rikia fasi moosubole nia ba ki ka mamana, mado ka a’i. 21Ma tha Rubeni e roṉoa, ka suusi nia faisia abada; ka una eri, Kulu sa kuki thauṉia ka mae e a’i. 22Ma tha Rubeni ka una eri isada, Musi adea ’abuna ka igwa; muki naṉa ani nia uri la malau na ni fanua kwasi nania, musi thauṉia ana abamulua: fasi kai faamaruki nia i abada neri, kai falea lau bana ifana maka nia. 23Ma lalae mai, si maṉa na tha Josefa e fula naa isana thoona kera, keka tanusia tooni nia faisia tha Josefa, tooni eri ana kasi maku oro ki ne mogolilia ne tooni ania; 24Ma keka rau nia, keka naṉa ania uri la tee malau: ma malau eri e gwa’u, e a’i ta si kafo si ni iei. 25Ma keka ono bada fasi keki ania si berede: ma kera tafoa maada keka lio, ma, rikia fasi, laea ana kwalafaa tha Isimela keki lae na mai faisia i Giliata, bia kamela kera ki, na keka ṉalia si do makwa lea ki, ma ta si baoma, ma ta si mura, keka lae nada fasi keki sifo fafia uri Ijifi. 26Ma tha Juda ka soree isana doorana kera, Si ta na kuki ṉalia ana adomi lakulua la, mada sa kuki thauṉia thasikulua nei, kuki thaufunia ’abuna? 27Kulu kau, kulu usi ani nia ifana kwalafaa tha Isimela, nai nida, ma kusi thauṉia ana abakulua; uria na thasikulua neri, na wane ana ina lakulua. Ma keka ala fafia ṉata lana. 28Ma tei toa i Midiana na keka usi do ana todado la ki, keka tatha sula tala; ma kera abaa tha Josefa, keka tafoa mai faisia malau eri, keka usi atha Josefa ifana toa eki ana kwalafaa tha Isimela, usi lana ro tafulu malefo asi silifa. Ma toa eki keka talaia tha Josefa uri Ijifi. 29Ma tha Rubeni ka oli mai sana malau; ma, rikia fasi, tha Josefa ka a’i si to bana i la malau eri; ma nia ka seṉaa tooni nia ki. 30Sui ka oli lau isana thasina kera, ka una eri, Wela eri e a’i si to bana; ma ni nau kwai lae nakua urifei? 31Ma kera ṉalia tooni ba tha Josefa, keka thauṉia ta kalee gota, keka thuthumai nia tooni eri la ’abuna; 32Ma keka falea tooni eri ana kasi maku oro ki ne mogolilia isana toa na keka ṉalia kau isana maka kera; keka una eri, Kamilia mili fulatoona tooni nei: oko thaitoomana maalutana; tooni kaluwane oe neri, mado e a’i? 33Ma nia ka thaitoomana tooni eri, ka sorea, Tooni kaluwane nau nai nia; ta do maruki ne taa e dudumeme ani nia; e a’i si e’i kera alamagaa boo tha Josefa. 34Ma tha Jekofo ka seṉaa tooni nia ki, ka ali nia asi maku rarasieila, ka tatao uria kaluwane nia sulia fa boṉi oro ki bana. 35Ma kaluwane nia ki sui bana, ma thari nia ki sui bana kera tae mai fasi keka faainamarukia; ma nia ka tofe, ka sorea ne a’i si inamaruki boo; ma nia ka una eri, Uria ni nau kwai tatao uria kaluwane nau ka toto bana, maasia si maṉa kwai sifo isana i la kwaiṉeia. Asi ade la una eri maka nia ka aṉisia. 36Ma wane eki i Midiana keka usi ani nia i Ijifi ifatha Botifa, na wane inoto ana ra tha Fero ne tatha inaona omea ni fono toi la kali nia.

Currently Selected:

GENESIS 37: MLU1949

Highlight

Copy