GENESIS 38

1Ma lalae mai asi maṉa eri, tha Juda e sifo faisia doorana kera, ka akele kau sana tee nonii wane i Adalama, thatana na tha Haera. 2Ma i kula eri tha Juda e rikia thari tee nonii wane i Kenana, thatana na tha Sua; ma nia ka folia thari eri ka ofu bi nia. 3Ma nia ka iana, ka tharea tee kaluwane, ma tha Juda ka alaṉia thatana atha A. 4Ma nia ruana ka iana lau, ka tharea tee kaluwane, ma kini eri ka alaṉia thatana atha Onana. 5Ma nia ula ka iana lau boo, ka tharea tee kaluwane, ka alaṉia thatana atha Sila: ma tha Juda ka to bana i Sesiba si maṉa ne tharea. 6Ma tha Juda ka foli‐kini ifana kaluwane inao nia eri na tha A; thatana kini eri na ni Tama. 7Ma kaluwane inao tha Juda, na tha A, e abula taa bana inaofana maana tha Jihova; ma tha Jihova e thauṉia ka mae. 8Ma tha Juda ka una eri satha Onana, Lae fasi, oko kotho isana kwaina thoomu, oko ofu bia, oko alua wela ifana thoomu. 9Ma tha Onana e thaitoomana sulia wela sa keki tharea, na wela nia u boo ka a’i neri; ma lalae mai, si maṉa ne kotho mai sana kwaina thoona, ka kikia i theegano do sa kai kwalafia wela ania, ada ka alua wela ifana thoona. 10Ma abula lana asi kula eri e taa atha Jihova: mania e thauṉia ka mae lau boo. 11Mania tha Juda e soree isana kini fuṉao nia na ni Tama, To si amua, ṉa gwa oru i maafera maka oe, maakwalia kaluwane nau na tha Sila toto ka daraa: uria ne una eri, Ada mado e a’i ni nia ka mae lau bana alafana ro thoona ki ma ni Tama ka lae nana, ka to bana i maafera maka nia. 12Ma buriana fa boṉi oro ki, kwaina tha Juda, na thari tha Sua, ka mae naa; ma kera faainamarukia tha Juda, ma nia ka tae kau uri Timinata isana toa nia ki na keka sufia ifuna sifi ki, ni nia bia tha Haerama, na wane eri i Adalama na kero ado. 13Ma kera faaroṉoa ni Tama, keka una eri, Rikia fasi, waifuṉa oe kai tae na mai uri Timinata fasi kai sufia ifuna sifi nia ki. 14Ma kini eri ka tanusia tooni nia ki ne farana gwa oru, ka thu fafia seena asi maku ne taru, ka kokofi nia ania, ka ono bana asi kula ne to lalaa sula tala na ka lae uri Timinata; sulaania e rikia na tha Sila e daraa naa, ma kesi tolea fasi kai toowane ani nia. 15Ma si maṉa na tha Juda ka rikia, manatane soso sa ta sesele neri; uria na kini eri e thu fafia maana. 16Ma nia ka akele isana sula tala, ka una eri, Koro kau, nau ku thathamia soki alamatai nau kwai kotho isamu; (sulaani nia e dora ania kini fuṉao nia neri) Ma kini eri ka sorea, Si ta noki falea mai iaku, fasi oko bii kotho mai isaku i maana? 17Ma nia ka sorea, Nau kwai arasia ta kali gota ifamu ana aini gota eki. Ma kini eri ka sorea, Oki falea mai do ni faamamane la maakwalia si maṉa na toto oki arasia mai, mado? 18Ma nia ka sorea, Si ta na kwai falea ifamu ana do ni faamamane la? Ma kini eri ka sorea, Do oe ana fafuilalaa, ma kokome oe nei ki, ma kubau oe na ni abamu nania. Ma nia ka falea mai, sui ka kotho isana, ma kini eri ka iana ani nia. 19Ma nia ka tatae, ka lae nana, ka tanusia si maku eri ne tataru faisia seena, ka tooni lau ana tooni eki na ka farana inamaea nia. 20Ma tha Juda ka arasia kau kali gota i abana wane eri i Adalama na kero ado, fasi kai oli fafia do ni faamamane la eki i abana kini eri: ma sui e a’i si fulatoona. 21Sui nia ka soetoona wane i fanua eri ki, ka sorea, Nifei nia sesele ba ne toto bana asi kula ne to lalaa sula tala? Ma keka una eri, E a’i bana ta sesele si toto u boo i kunei. 22Ma nia ka oli kau satha Juda, ka sorea, Nau ku dora ana rofetoona lana; ma wane na kera to i fanua eri kera una eri lau bada, E a’i ta sesele si toto u boo i kunei. 23Ma tha Juda ka sorea, Kini eri kai ṉalia boo ifana, ada keka faaseenoni iakaroa sulia: rikia fasi, ku arasia kau kali gota nei ma ni oe osi rofetoona kini eri. 24Ma lalae mai, ulu madami e sui, keka bii faaroṉoa tha Juda, keka una eri, Kini fuṉao oe ba na ni Tama e abula mala sesele; ma ta do lau, rikia fasi, nia ka iana sulia o’e la. Ma tha Juda ka sorea, Talaia mai, era kai akofia. 25Lalae keka talaia mai e sui, kini eri ka bii kwaiarasi sana waifuṉa nia, ka una eri, Sulia wane ne ana asi do nei ki, ni nau ku iana; ma nia ka sorea, Nau ku thathamia oki thaitoomana maalutana si do nei ki, ṉa do ana fafuilalaa, ma kokome nei ki, ma kubau nei. 26Ma tha Juda ka faamamanea, ka una eri, Kini nei e abula kokoto ka tatha ani nau; sulaani nau kwasi falea ifana kaluwane nau na tha Sila. Me a’i si ofu lau bia kini eri. 27Ma lalae mai, asi maṉa nia ni fiwela la, rikia fasi, ro iu ni rakena. 28Ma lalae mai, asi maṉa ne to bana ana fiwela la, ta wela ka tekwasia abana ithara: ma kini ne nanaia ka rau i abana, ka kani fafia asi oko memenaa, ka una eri, Ulunao nai nia. 29Ma lalae mai, si maṉa na wela wane eri ka oli fafia abana, rikia fasi, doorana kai futa mai: ma nia ka sorea, O usutai nia maethakaa ka laa ifamu uria ta? sulia si kula eri kera alaṉia thatana atha Faresi. 30Ma thasina ka futa buri mai, wela eri na si oko memenaa ni ana abana: ma keka alaṉia thatana atha Sara.

Currently Selected:

GENESIS 38: MLU1949

Highlight

Copy