GENESIS 12

1Ma tha Jihova e sorea naa isatha Aberamo, Oi lae kamua faisia fanua oe, ma ina lamu kera, ma toa na i maafera maka oe, uria ta fanua na nau kwai fatai nia isamu; 2Ma ni nau kwai adea na kulee toa na keki inoto faamau keki thafali mai ani oe, ma nau kwai falea lea la ifamu, kwai faabaitaa thatamu; ma kai lea iana imole ki inunufamu: 3Ma nau kwai alua lea la ifana toa eki na kera alua lea la ifamu, kwai alua taa la fani tei ne alua taa la fafi oe: ma ani oe keki alua lea la ifana ina lana toa eki sui bana na ni fanua na i iano. 4Mania tha Aberamo e ade sulia ṉata lana tha Jihova neri, ka lae kau; ma tha Lota ka lae bi nia: ma fiu tafulu fa ṉali ma lima fa ṉali e sui atha Aberamo asi maṉa eri ne akwasia i Harana. 5Ma tha Aberamo ka talaia kau kwaina na ni Serai, ma tha Lota na kaluwane doorana, ma ogogonia kera na kera ofua mai, ma imole eki na kera safu kera anida i Harana; ma keka lae kau fasi keki lae uria fanua i Kenana; lalae keka fulatoona boo fanua eri i Kenana. 6Ma tha Aberamo ka laefia fanua, ka fula asi kula tha Sikemo, isana fanua dedema i More. Ma Kenanaete ki ni fanua eri asi maṉa eri. 7Ma tha Jihova ka fula fatai mai satha Aberamo, ka una eri, Ifana kwalafamu kwai falea boo fanua nei: ma nia ka thauwai nia fulii era ni foa la iei ifatha Jihova, ne fula fatai mai isana. 8Ma nia ka idu kau faisia fanua eri uria tee gwa tolo karaṉia i Bethele ibali tae lana thato, ka kasia biui‐maku nia imaalutana Bethele ibali su lana thato, ma Ai ibali tae lana thato: ma i fanua eri nia ka thauwai nia fulii era ni foa la ifatha Jihova, ka ’ai thataṉa tha Jihova. 9Ma tha Aberamo ka liliu ana, ka lae nado uria i mutana.

10Ma unii thaofaa ni fanua eri: ma tha Aberamo ka sifo uria Ijifi fasi kai to ni laea iei; uria na unii thaofaa e kulua fafia fanua eri. 11Ma lalae mai, si mana karania kai fula i Ijifi, nia ka una eri isana kwaina na ni Serai, Lio fasi, nau ku thaitoomana riki lana seemu, ni oe na kini riki lamu e lea: 12Mania, lalae mai, toa i Ijifi kera riki oe, keki bii sorea, Kwaina wane nei nai nia: sui keki thauṉi nau kwai mae, ma ni oe keki faamaruki oe. 13Ku thathamia oki sorea ni oe na waiwaena nau: fasi kwai to ni lea la inunufamu; ma nau kwai maruki suli oe. 14Ma lalae mai, tha Aberamo e fula naa i Ijifi, toa eki i Ijifi keka lio uria kini eri, ma riki lana e lea faamau. 15Wane gwauwai tha Fero ki kera riki nia lau boo, keka taṉoa inaofatha Fero: ma keka tolea kini eri uria maafera tha Fero. 16Ma nia ka thasi lea ifatha Aberamo inunufana: ma wane eri kai rikii do ana sifi ki, ma buloka ki, ma ase wane ki, ma wane ni ra ki, ma kini ni ra ki, ma ase kini ki, ma kamela ki. 17Ma tha Jihova ka alua unii taa la baita ki ka to fafia tha Fero ma toa na i maafera nia inunufana ni Serai, kwaina tha Aberamo. 18Ma tha Fero ka ailia mai tha Aberamo, ka una eri, Ta neri no ilia iaku? uria ta nosi faaroṉo nau mai ana kini nei na nia na kwaimu? 19Uria ta no sorea na ba, Waiwaena nau na nia? sa mado e a’i nau kwa tolea ifaku italaaku: maṉia, asi maṉa eri, rikia fasi kwaimu, tolea, oko lae kamua. 20Ma tha Fero ka ṉata fifi isana wane nia ki suli nia: ma keka arasia kau bia kwaina, ma si do nia ne rikidaki sui bana.

Currently Selected:

GENESIS 12: MLU1949

Highlight

Copy