GENESIS 13

1Ma tha Aberamo e lae kau faisia i Ijifi, ni nia, bia kwaina, ma si do nia ne rikidaki sui baṉa, ma tha Lota bi nia, uria fanua i mutana. 2Ma tha Aberamo ka rikii do faamau ana katele ki, ma asi silifa, ma asi golu. 3Ma nia ka liliu ana faisia fanua eri i mutana, lalae ka fula i Bethele, isana si kula na biui‐maku nia e toto iei inao mai, imaalutana Bethele ma Ai; 4Isana si kula ana fulii era ni foa la eri, ne thauwai nia iei inao mai: ma kula eri naa, tha Aberamo ka bii ’ai thatana tha Jihova.

5Ma tha Lota lau boo, ne abetai nia tha Aberamo, ana feree sifi, ma aini buloka ki, ma biui‐maku ki. 6Ma fanua eri e a’i si faradaroa fasi kekoi to ofu iei: uria na si do na kero rikidaki e oro ka tatha, e adea ka afetai sa kekoi to ofu. 7Ma firu la ka tae mai imaalutana toa ni fono toi la kakalia katele tha Aberamo ki ma toa ni fono toi la kakalia katele tha Lota ki: ma Kenanaete ki ma Berisaete ki kera to bada i fanua eri asi maṉa eri. 8Ma tha Aberamo ka una eri satha Lota, Ada firu la ka to imaalutakaroa, ma imaalutana toa nau ni fono toi la ki ma toa oe ni fono toi la ki; uria ni koro ro wane ana tee kwalafaa. 9Fanua nei sui boo ni inaofamu, mado? nau ku thathamia oki lae kamua faisi nau: mado so filia ibali aba mauli, ni nau kwai lae uri bali aba aola: mado so filia ibali aba aola, ni nau kwai lae uri bali aba mauli. 10Ma tha Lota ka tafoa maana, ka rikia fanua dedema eri sui bana i ninimana Jodana, na kafo oro ni iei ta si kula si e’i boo, si maṉa na tha Jihova e a’i si labatai nia u fanua i Sodoma ma fanua i Gomora, e ’uria ra tha Jihova, ’uria lau boo fanua i Ijifi, sula tale ne lae uri Soa 11Sui tha Lota ka filia fanua dedema eri sui bana i ninimana Jodana ifana italaana; ma tha Lota ka lae naa uri bali tae lana thato: ma keko lae eeta kwailiu. 12Tha Aberamo ka to bana i la fanua i Kenana, ma tha Lota ka to bana i la toaa susu eki la fanua dedema, ka kasia biui‐maku nia ka lio uri Sodoma. 13Ma sui wane eki i Sodoma liode taa ma kera abula taa faamau inaofatha Jihova.

14Ma tha Jihova ka soree isatha Aberamo buriana na tha Lota e lae eeta faisi nia, Tafoa fasi maamu si maṉa eri, oko lio kau faisia si kula noko ni mai iei neri, uria fanua i Notoa ma i Mutana, ma uri bali tae lana thato, ma ibali su lana: 15Uria na fanua nei sui bana noko rikia nania nau kwai falea ifamu ma ifana kwalafamu toto si sui. 16Ma ni nau kwai adea na kwalafamu keki ’uria gegeona theegano: mada sa ta wane ka thaitoomana teemai lana gegeona theegano, kai teemai nia lau boo kwalafamu. 17Tatae, laefia fanua nei sulia tekwa lana ma rerebaa lana; uria ni nau kwai falea boo ifamu. 18Sui tha Aberamo ka idua biui‐maku nia, ka lae mai, ka to bana i la fanua dedema i Mamari, na ni Hefirono; ma kula eri naa, ka bii thauwai nia fulii era ni foa la ifatha Jihova.

Currently Selected:

GENESIS 13: MLU1949

Highlight

Copy