GENESIS 11

1Ma toa na fanua ne i iano ni sui bana, ada tee ṉataa ne totoo, ma bae lada ne totoo. 2Ma lalae mai, si maṉa na kera liliu ada ibali tae lana thato, keka fulatoona si kula dedema i fanua i Saena; ma keka to naa iei. 3Ma kera ṉata uri kera kwailiu, keka una eri, Kulu kau, kulu thauwai nia ana mamako tei do na kai ’uria gwa fau ki, kuki alua i la era fasi kai akofia do eki kai ṉilo. Ma do eki ana mamako e ’uria fau ki ifada, ma si ta ka talaa si do sa keki faaṉadoa ania. 4Ma keka una eri, Kulu kau, kulu thauwai nia ta toaa susu ifakulua bia ta failaṉi duuna kai fane da iaa, kai suana thalo lo; kulu alua thatakulua ania fasi ka talo, ada keka foatata ani kulu fafia maana fanua na i iano sui boo. 5Ma tha Jihova ka sifo mai fasi kai rikia toaa susu eri ma failani eri na kwalafaa imole ki keka thauwai nia. 6Ma tha Jihova ka una eri, Rikia fasi, toa nei tee toa boo, ma ṉata lana toa eki sui bana ka totoo; ma kera thafalii ilia si ade la nei: ma si maṉa eri kesi lufia ta sii faisida, asi ade la eki na kera manatatoona sa keki ilia. 7Kulu kau kulu sifo, kuki adea na ṉata lada kai eeta kwailiu, fasi tei toa iada keki dora ana maalutana ṉata lana tei toa lau. 8Mania tha Jihova e foatata ani kera, keka liliu ada fafia maana fanua ne i iano sui boo: ma keka ekwa asi ra ana thauwai lana toaa susu eri. 9Sulia si ade la eri kera alaṉia thatana toaa eri ana Bebelo; uria na i la toaa eri tha Jihova e adea na ṉata lana toa na fanua na i iano kai eeta kwailiu: ma faisia toaa susu eri tha Jihova e foatata ani kera keka liliu fafia maana fanua na i iano sui boo.

10Si ade la ne ita mai atha Semo nai nia. Tha Semo e to sulia tee taleṉee fa ṉali; ma ro fa ṉali e sui buriana olo lana kafo eki fafia fanue, nia ka bii tharea tha Afakasata: 11Ma tha Semo ka to bana buriana ne tharea tha Afakasata sulia lima taleṉee fa ṉali, ma nia ka tharea tei kaluwane nia ki ma thari nia ki.

12Ma tha Afakasata e to sulia ulu tafulu fa ṉali ma lima fa ṉali, sui ka tharea tha Sala: 13Ma tha Afakasata ka to bana buriana ne tharea tha Sala sulia fai taleṉee fa ṉali ma ulu fa ṉali, ma nia ka tharea tei kaluwane nia ki ma thari nia ki.

14Ma tha Sala e to sulia ulu tafulu fa ṉali, sui ka tharea tha Iba: 15Ma tha Sala ka to bana buriana ne tharea tha Iba sulia fafai taleṉee fa ṉali ma ulu fa ṉali, ma nia ka tharea tei kaluwane nia ki ma thari nia ki.

16Ma tha Iba e to sulia ulu tafulu fa ṉali ma fai fa ṉali, sui ka tharea tha Pileke: 17Ma tha Iba ka to bana buriana ne tharea tha Pileke sulia fai taleṉee fa ṉali ma ulu tafulu fa ṉali, ma nia ka tharea kaluwane nia ki ma thari nia ki.

18Ma tha Pileke e to sulia ulu tafulu fa ṉali, sui ka tharea tha Riu: 19Ma tha Pileke ka to bana buriana ne tharea tha Riu sulia ro taleṉee fa ṉali ma sikwa fa ṉali, ma nia ka tharea kaluwane nia ki ma thari nia ki.

20Ma tha Riu e to sulia ulu tafulu fa ṉali ma ro fa ṉali, sui ka tharea tha Siraka: 21Ma tha Riu ka to bana buriana ne tharea tha Siraka sulia ro taleṉee fa ṉali ma fiu fa ṉali, ma nia ka tharea kaluwane nia ki ma thari nia ki.

22Ma tha Siraka e to sulia ulu tafulu fa ṉali, sui ka tharea tha Neho: 23Ma tha Siraka ka to bana buriana ne tharea tha Neho sulia ro taleṉee fa ṉali, ma nia ka tharea kaluwane nia ki ma thari nia ki.

24Ma tha Neho e to sulia ro tafulu fa ṉali ma sikwa fa ṉali, sui ka tharea tha Tira: 25Ma tha Neho ka to bana buriana ne tharea tha Tira sulia tee taleṉee fa ṉali ma tee tafulu fa ṉali ma sikwa fa ṉali, ma nia ka tharea kaluwane nia ki ma thari nia ki. 26Ma tha Tira e to sulia fiu tafulu fa ṉali, sui ka tharea tha Aberamo, ma tha Neho, ma tha Harana.

27Si ade la ne ita mai atha Tira nai nia. Tha Tira e tharea tha Aberamo, ma tha Neho, ma tha Harana; ma tha Harana e tharea tha Lota. 28Ma si maṉa na maka nia na tha Tira e to u bana, tha Harana e mae i la fanua ne futa mai iei, i A neri, fanua toa i Kaladia. 29Ma tha Aberamo ma tha Neho kero tole kini: thatana kwaina tha Aberamo ni Serai; ma thatana kwaina tha Neho ni Milika na thari tha Harana; ma wane eri maka ni Milika ma maka ni Isika. 30Ma sui ni Serai e abaato; e a’i ana ta wela. 31Ma tha Tira ka talaia kaluwane nia na tha Aberamo, ma kokoo nia na tha Lota, kaluwane tha Harana na kaluwane nia, ma ni Serai na kini‐fuṉao nia, kwaina kaluwane nia na tha Aberamo; ma kera lae ofu kau faisia i A, na fanua toa i Kaladia, sa keki lae uria fanua i Kenana; ma lalae kera fula i Harana, keka to iei. 32Ma fa boṉi tha Tira ki ro taleṉee fa ṉali ma lima fa ṉali: sui tha Tira ka mae i Harana.

Currently Selected:

GENESIS 11: MLU1949

Highlight

Copy