Mateo 23

Kigwan Jesus Ired Tothoo I Tanchaanan Chiy Mamaistoro Na Dinteg Tan Pharisees

(Mark 12:38-39; Luke 11:43,46; 20:45-46)

1Kigwan men Jesus cha tothoo tan disipolos to i 2“Sema iren mamaistoro na dinteg tan Pharisees, gwariy karebengan chen man-iksplikar na dinteg Moses. 3Isonga, amag jon emiin i naintoro ra, nem enog i iyonoran i naimag cha tep nat naimag cha ngoy naintoro cha. 4Sema bili-bilin a nainpilit chen patien na too, singen inges toy enbel-at a nainpasakbat ched too, nem eg ira oncha-chen menakbat angken otik bengat. 5Emiin a naimag cha, naimag cha say si-nengen ira na tothoo tan chejawen cha ira. Sema iren ejanan na iyaysolat a esel Afo Chiyos a naiyaybedbed cha toktok tan diwa, nainbanaw cha. Et nainchokiy chiy bedbed cha ngoro na ta-kep na baro ra. 6No mekidihob ira, piyan chen mekitokkong ired ma ainportantin too, tan piyan cha pay a ontokkong chiwa kamaptengan a tokkongan cha synagog. 7Piyan chen mesalodoan no onkowan ired kad-an na market, tan piyan cha pay a mengaranan na maistoro. 8Nem si-kayo, enog i intolok a ngaranan cha kayo na echom na maistoro tep san-aahi kayon emiin tan si-kak bengat i maistoro yo. 9Enog pay i ngiyaranan i angken siyen tood ja dobong na Awa tep si Afo Chiyos bengat a gwared dangit i Awejo. 10Enog i intolok i echom a ngaranan cha kayon afo tep si-kak a Cristo bengat i Afo yo. 11Say kahejangan cha si-kayo, si-kathoy mansilbid si-kayo. 12Sema toon mengikayang na angel to, maykombaba, tan sema ngon toon mengikombaba na angel to, maykayang.”

Sema Seg-ang Jesus Ired Ma Mamaistoro Na Dinteg Tan Sema Iren Pharisees

(Mark 12:40; Luke 11:39-42,44,52; 20:47)

13Intoloy men Jesus a engowan i “Kakaasi kayon mamaistoro na dinteg tan Pharisees a naengibili-biling a naengamag na mapteng! Tep singen inbengbeng joy selbeng a sakepan na toon onkowan cha pantorayan Afo Chiyos. Eg jo piyan a mayka-chom cha pantorayan to, nem naekibiyang kayod tothoon piyan chen mayka-chom chiwan.

14“Kakaasi kayon mamaistoro na dinteg tan Pharisees a naengibili-biling a naengamag na mapteng! Tep nasiyaol joy iyangkebalo say a-daen joy kameng cha, pati baliy cha, tan nainbayag joy kararag jo say sa-dinan joy ngaaw a naima-imag jo. Isonga, mema-men enbel-at aliy chosa yo. #23:14 Sejay a birsikolo, nagwared echom a Greek a sola-solat.

15“Kakaasi kayon mamaistoro na dinteg tan Pharisees a naengibili-biling a naengamag na mapteng! Tep nabima-sil kayod baybay, tan nakimowan kayod aragwin ili say menepol kayo na angken sa-kin toon manbalin a disipolo yo. Et no mayka-chom cha si-kayo, nainpanbalin jon toon mas enbel-at i chosa thod inpiyirno iy say si-kayo.

16“Kakaasi kayon ekorab a naengibalnay! Tep nakigwan jo i no gwariy mengingaran niwa timplon mengisangba, nat mesepol a tongpalen toy insangba tho, nem no ingaran toy balitok na timplo, mesepol men tongpalen to. 17Si-kayon ekorab! Singen nagwariy igwathan jo! Nengoy mas ainportanti? Sema balitok ono sema timplon mengipabalin niwa balitok a esantoan? 18Nakigwan jo pay i no gwariy mengingaran na altar a mengisangba, nat mesepol a tongpalen toy insangba tho, nem no ingaran toy iyaytangdal cha altar, mesepol a tongpalen to. 19Si-kayon ekorab ngarod! Nengoy mas ainportanti? Sema tangdal ono sema altar a mengipabalin niwa tangdal a esantoan? 20Isonga, sema mengingaran na altar a mengisangba, nat sema altar bengat i ingaran to, nem pati sema iyaytangdal chiwan. 21Sema ngon mengingaran na timplon mengisangba, nat sema timplo bengat i ingaran to, nem pati si Afo Chiyos a naiyan-iyan chiwan. 22Et no gwara ngoy mengingaran na dangit a mengisangba, nat sema dangit bengat i ingaran to, nem pati thronon Afo Chiyos tan si Afo Chiyos a natimokkong chiwan.

23“Kakaasi kayon mamaistoro na dinteg tan Pharisees a naengibili-biling a naengamag na mapteng! Tep nasiningpet jon mengi-kan cha Afo Chiyos na maykasampolod ma gwared si-kayo, angken sema babechiseng a tanem a naiyay-amis na nakiyakan jo, nem eg jo nainkaskaso ma mas ainportantin iyaytorod dinteg a inges toy pengemag na kostod echom jo, mahaasi, tan mepiyal. Mapteng no siningpet jon engamag iren ja mas ainportanti iy maramen intoloy jo pay a engamag na sigod. 24Si-kayon ekorab a naengibalnay! Inges joy toon enagat na sepsep chiwa inomen to, nem iyakmon toy camel! Tep nachimanag kayo na otikel a basol jo iy eg jo naniyemnem iwa banay a basol jo.

25“Kakaasi kayon mamaistoro na dinteg tan Pharisees a naengibili-biling a naengamag na mapteng! Tep inges jo ma toon engasang na awas na tasa tan beneg na pingkan, nem sema sekep to, iyapno na ensekig tep nainbili-biling jon naengamag na mapteng cha sangoanan na echom, nem aagom kayo tan napinidit jon mengeda na nat kegwen jo. 26Si-kayon Pharisees a ekorab! Dinisi yoy nin i sekep na tasa tan pingkan et malinis ngoy awas cha.

27“Kakaasi kayon mamaistoro na dinteg tan Pharisees a naengibili-biling a naengamag na mapteng! Tep inges joy panchon na etiy a epintolan na polaw. Say kasi-neng to, ekanas, nem iyapno na pohel na etiy tan echom a ensesekig. 28Et inges jo ira jay. Nainbili-biling jon naengamag na mapteng cha sangoanan na echom, nem say podno, emiin a gwared nemnem jo, ngaaw.

29“Kakaasi kayon mamaistoro na dinteg tan Pharisees a naengibili-biling a naengamag na mapteng! Tep naimag joy panchon iren ma profita nonta bayag da, tan naiyartian joy panchon na tothoon mangkaronong. 30Nakigwan jo i ‘No gwara kawi komed man nonta timpo na afo-afo wi la, nat iyayka-chom kawi komen emono iren ma profita.’ 31Nem no konen jo man, jowan igwanggwanggwang i poli-poli tho kayo iren ma emono-bono iren ma profita. 32Tiwa ngarod, kecheng joy inchogi na afo-afo yo la! 33Si-kayon oleg! Si-kayon ngaawes a oleg! Bebtihan jo ayen mechosed inpiyirno? 34Isonga, mengito-noak cha si-kayo na profita tan iyangkedaing a tothoo tan sema iren naengitoro na esel Afo Chiyos. Sema echom, bonoen jo, tan sema echom, idansa yod koros. Sema echom ngo, bechasen jod synagog jo, tan emiin a bebtihan cha, osilen jo iren pedigathen. 35Isonga, onmothok i chosed si-kayo kagol na ingkathiy iren ma emiin a maronong a tothood ja dobong manipod na ingkabonon Abel #23:35 Genesis 4:8 a nagwariy imag ton ngaaw ingkathod ingkabonon Zechariah #23:35 2 Chronicles 24:20-21 a anak Barachiah a biyono na afo-afo yo led dogad a gwared kawa na timplo tan altar cha bo-dayan to. 36Sejay a konen kod si-kayo, podnon sema chosa na ingkathiy iren man a too, onmothok cha si-kayon toon sibibiyag niman.”

Sema Semek Jesus Ired Ma I-Jerusalem

(Luke 13:34-35)

37Et kigwan men Jesus i “Si-kayon i-Jerusalem a naemono iren ma profita tan naiyantog na echom a toon into-non Afo Chiyos cha si-kayo! Eminpiyen piyan kon si-nofen kayo tan kajoan tahejon inges toy manok a sa-dinan to na payad toy sisiw to, nem nat piyan jo! 38Isonga, towan iolay kayon Afo Chiyos, pati siyodad tan timplo yo say maomas ali. 39Tep konen kod si-kayo i eg joak si-nengen mowan ingkathod timpo na pengowan jo i ‘Mabindisjonan i into-no din Afo Chiyos.’ ”

Currently Selected:

Mateo 23: KAR

Highlight

Copy