Mateo 22

Sema Arig Na Panpartid Kasal

(Luke 14:15-24)

1Engiarig si Jesus mowan a kigwan to i 2“Sema pantorayan Afo Chiyos, may-arig cha arin iyanpartid kasal na anak ton dahi. 3Idi iyaysaganen emiin, engito-no na echom a bagaen to say konen cha ired ma ainbitar i onkowan ma di iren mekikasal, nem eg cha piyan alin onkowan. 4Isonga, engito-no mowan na echom a bagaen ton kigwan to i ‘Jo kowan ired ma ainbitar i iyaysaganiy mekan. Gwiya-tek koy mangkatheben bahak et iyaysagana wen emiin. Gomali jon mekikasal.’ 5Nem sema iren ainbitar, eg cha inkaskaso. Eg ali cha kimowan iy intolo-toloy cha et i chiyan ama-amaga. Kimowan i sa-kid payow to. Kimowan ngoy sa-kin mandeko. 6Ida ngo na echom i bagaen niwa ari, piyadigat cha ira, et biyono ra ira. 7Paladon chiliy bonget niwa ari. Into-no thoy sosolcharo tho say bonoen cha ira ma emono na bagaen to, et inpapool toy siyodad cha. 8Et kigwan to wed echom ton bagaen i ‘Iyaysaganiy emiin para cha kasal, nem sema iren ainbitar, nat maykari iren mayka-chom. 9Isonga, tahejod kalkalsara, et inbitar jon emiin i sebien jod man.’ 10Kimowan ma ired kalkalsara et ininbitar chen emiin i sibi ra, sema iren mangkaronong tan sema iren mangkahedsel. Et sema kwadton pankasalan, iyaskot na tothoo.

11“Idi engkay, simekep i arin mekitbal ired ma ainbitar, et gwariy mita thon toon nat iyanbaro na koston para cha kasal. 12Kigwan to i ‘Kajem ko, niyana simekep ka did jay iy nat kostoy inpanbarom?’ Nem nagwariy insongsongbat niwa too. 13Isonga, kigwan na ari ired bagaen to i ‘Balod joy diwa tho tan seki tho et iba-tok jod kawad-an na enbolinget say onngogngogngog tan kale-kaletketen to ngoy sangi thod man.’ ” 14Et kigwan men Jesus i “Tep chakel i natiya-gway Afo Chiyos, nem otik i napinispis to.”

Sema Salodsod Maypangkep Na Bayad Na Binis

(Mark 12:13-17; Luke 20:20-26)

15Imekal ma iriy Pharisees a tabtabalen cha no nengoy pesing chen menaol Jesus say osalen chiy konen ton pengicharoman ched si-katho. 16Engito-no ira wed Jesus na disipolos cha, pati tothoon Herod. Idi mimothok ired kad-an to, kigwan cha i “Maistoro, amta wi i emiin a nakigwan mo, podno, tan podnon naintorom i maypangkep na piyan Afo Chiyos a a-magen na tothoo. Amta wi pay i nat naindasin moy kasasaad na angken siyen too. 17Et ija pangoy ibaga wi. Iyaytolok emod ma dinteg tayo i panbejad na binis cha Caesar, ono enchi?”

18Nem amten Jesus i ngaaw a nemnem cha, isonga kigwan to i “Si-kayon naengibili-biling a naengamag na mapteng, niyana jowan parasaak? 19Ibiybiy jod si-kak i pilak a naaosal a maybayad na binis.” In-i-kanan ches Jesus na denarius, 20et kigwan to i “Siyay mahadopa tan mahangaran niyay?”

21Kigwan cha i “Si Caesar.”

Et kigwan men Jesus i “No setan ngarod, i-kan jod Caesar i may-i-kan komed si-katho, tan i-kan jo ngod Afo Chiyos i may-i-kan komed si-katho.”

22Idi inki-ngelan cha man, iyasdaaw ira. Bintihan cha wa, et imekal ira.

Sema Salodsod Maypangkep Na Panpawil Na Iyangketiy

(Mark 12:18-27; Luke 20:27-40)

23Nontan met laeng a akow, gwara ngo iriy echom a Sadducees a kimowan cha kad-an Jesus. Sema iren Sadducees, eg cha napiyati i manpawil i etiy. Kigwan ched Jesus i 24“Maistoro, say dinteg tayon insolat Moses, kigwan tod man i ‘No gwariy sambaliy a nagwariy anak cha iy metiy i dahi, mesepol a sema ahi to, imbaliyen to ma ebalo say no man-enak ira, maybilang a anak niwa etiy.’ #22:24Deuteronomy 25:5 25Niman ma, gwared si-kawiy pithon san-aahin daleki. Engimbaliy i kafangodowanan, nem etiy iy nagwariy anak cha. Et sema sigonchen ahi tho, inimbaliy to ma ebalo, 26nem etiy ngo iy nagwariy anak cha. Inges to pay i maykatdon ahi tho, et iyansosobdat ira ingkathod maykapitho. 27Et etiy ngo ma bii na kaonoran. 28Isonga, no timpo di na panpawil na iyangketiy, siya ngarod iren ma pithoy koston imbaliy niwa bii? Tep emiin a pithon daleki, inimbaliy cha ma bii.”

29Insongbat Jesus i “Iyankamali kayo tep eg jo egwathan i iyaysolat cha esel Afo Chiyos, tan eg jo egwathan i panakabalin to. 30Tep no manpawil iriy etiy, nat mengimbaliy ira tep ingesen chiy anghilis cha dangit. 31Nem sema maypangkep na panpawil na iyangketiy, eg jo aya bisiy kigwan Afo Chiyos cha si-kayo? 32Kigwan to i ‘Si-kak i Chiyos Abraham, Chiyos Isaac, tan Chiyos Jacob.’ #22:32 Exodus 3:6 Kigwan Afo Chiyos iwan angken etiy ires Abraham nonta bayag da. Sema piyan ton a-seden, manpawil i iyangketiy tan sibibiyag ired sangoanan Afo Chiyos. Si Afo Chiyos, nat Chiyos iren ma iyangketiy, no diket sema iren sibibiyag.”

33Sema iren toon engiki-ngel niwan, iyasdaaw ira na intoron Jesus.

Sema Kainportantian A Bilin

(Mark 12:28-34; Luke 10:25-28)

34Idi inki-ngelan na Pharisees i igwak Jesus ira ma Sadducees, esi-nop ira, et kimowan ired kad-an Jesus. 35Sa-kid si-karen edaing a maistoro na dinteg, siyalodsod tos Jesus say pechasen ton 36kigwan to i “Maistoro, ngoy kainportantian a bilin cha dinteg Afo Chiyos?”

37Insongbat Jesus i “ ‘Mesepol a sesmeken mon pasiyes Afo Chiyos a Afom cha posom, cha ispiritom, tan cha nemnem mo.’ #22:37 Deuteronomy 6:5 38Sejay i kainportantian a bilin. 39Sema maykadgwen ainportanti, inges niyay a ‘Semek moy echom mon inges toy penmek mo na angel mo.’ #22:39 Leviticus 19:18 40Emiin a dinteg Moses tan sema intoro iren ma profita, iyaybasar chiya chegwen bilin.”

Sema Salodsod Maypangkep Na Cristo

(Mark 12:35-37; Luke 20:41-44)

41Idi esi-nop pay i Pharisees chiwan, siyalodsod ngo iren Jesus a kigwan to i 42“Nengoy nemnem jo maypangkep niwa Cristo? Siyay edafoan to?”

Insongbat cha i “Si-kathoy polin David.”

43Kigwan men Jesus i “No setan ngarod, niyana Afoy inngaran David cha Cristo nonta inpangowan Ispirito Santod si-katho i:

44‘Kigwan Afo Chiyos cha

Afok i

“Tokkong ked ja gwanan ko

ingkathod a-gwahen ko

ira ma naengontred

si-kam a

singen inkathin

mo ira.” ’ ” #22:44 Psalm 110:1 #22:44 Nonta bayag da, no gwariy arin igwak toy kabakal to, ipaolig to ma kabakal to, et ikathin toy bokdow to. Sejay i chingjas i igwak to.

45Intoloy Jesus a engowan i “No kigwan David ngo i sema Cristoy Afo tho, ngoy pesing na Criston medepod David?” 46Nem nagwariy mahasongbat, et manipod nontan ma, nagwara wiy engitoled a mansalodsod cha Jesus.

Currently Selected:

Mateo 22: KAR

Highlight

Copy