Mateo 24

Sema Iren Digat A Onmothok Ali Nem Engkay

(Mark 13:1-13; Luke 21:5-19)

1Idi bimo-day si Jesus chiwa timplo et man-eekal, sema iren disipolos to, imesop ired kad-an to say itoro riy kamapteng na timplo, angken sema iren bali-baliy a gwared kawad-an na timplo. 2Kigwan Jesus i “Jowan si-nengen emiin ira jay, anya? Nem sejay a konen kod si-kayo, podnon no sa-ki din akow, mesidak ira ja batho ra, et nagwariy angken sa-kin bathon on-eket cha kawad-an to.”

3Et idi mantoktokkong si Jesus cha Chontog na Olivas, kimowan ira ma disipolos tod kad-an to a si-kara bengat, et kigwan cha i “Enti, igwanggwang mod si-kawi no empiyan aliy kepesamak niwan. Nengo pay i sinjal na ikowan mo mowan ali tan sema kekcheng niya timpo?”

4Insongbat Jesus i “Pantanchaan kayo, nahol ni mesaol kayo. 5Tep chakel aliy toon onkowan a mengosal na ngaran kon mengowan i ‘Si-kak i Cristo,’ et chakel i saolen cha. 6Iki-ngelan jo pay i maypangkep na kobat cha iyay-esop a ili tan kobat cha aragwin ili, nem enog i chanag. Tep mesepol a mepesamak ira man, nem nat seman nin i pantepos na dobong. 7Tep sa-kin ili, kobathen toy sa-kin ili, tan sa-ki ngon gobirno, kobathen toy sa-kin gobirno. Gwara di pay iriy jegjeg cha chakel a dogad, tan gwara di pay iriy bithil. 8Nem emiin ira man a mepesamak, singen inges toy pilmiron sahit na pan-enak na bii.

9“No sa-ki din akow, iawat cha kayod gwariy karebengan to say pedigathen cha kayo tan bonoen cha kayo. Et sema ngo iren emiin a too, owesen cha kayo tep naemati kayod si-kak. 10No seman a timpo, chakel i man-olay na pamati red si-kak, et traidoren chiy echom cha tan owesen cha ngo ira. 11Chakel i naiyan-ite-itek a profiten onbo-day, et chakel i saolen cha. 12Onchakel pay i ngaaw, isonga sema gwa-gwa-chen too, onkapsot i semek ched echom. 13Nem sema memasig a memati ingkathod kekcheng na diga-digat to, maysalakan. 14Sema mapteng a chamag maypangkep na pantorayan Afo Chiyos, maykaskasabed emiin a ili say iki-ngelan na emiin a too, et onmothok aliy kekcheng niyay a timpo.”

Sema Ensekig A Oncharal

(Mark 13:14-23; Luke 21:20-24)

15Intoloy Jesus a engowan i “No sa-ki din akow, gwariy ensekig a oncharal a on-akgwat chiwa esantoan a dogad. Si-kathoy in-istoriyen Daniel a profita nonta bayag da. #24:15 Daniel 9:27; 11:31; 12:11 (Sema toon memesen jay, mesepol a egwathan to.) 16No metaen jo man, sema iren gwared Judea, mesepol a bebtihen chiy chonchontog. 17Sema toon gwared bo-dayan na baliy to, mesepol a eg onsekep cha baliy ton mengeda na kokowa tho, nahol ni metaktak. 18Sema ngon toon gwared payow, mesepol a nat onkowan cha baliy ton mengeda na ta-kep na baro tho. 19No sema timpon kepesamak niwan, kakaasi iriy iyangkebchel tan sema iren gwariy anak chen mansososo! 20Pankararag kayo i eg mepesamak ira man no timpo na teg-in ono timpo na Sabbath. 21Tep sema timpo na digat, nagwariy inges niwan manipod nonta ingkaparsowa na dobong ingkathod niman. Et nagwara ngoy inges niwan a mepesa-pesamak mowan ali. 22Isonga, niyemnem Afo Chiyos i kedpengen toy timpo na pandigat tep no eg to wa a-magen iwan, nagwariy mebay-anan a sibibiyag. Nem kiyedpeng to ngarod iwa timpo say nat metiy ira ma too thon pinispis to.

23“No seman alin timpo, no gwariy mengowan cha si-kayo i ‘Matha yo kechi, ajay i Cristo!’ ono ‘Aman chiwa a!’ enog i piyati. 24Tep gwariy mansao-saol a toon manparang a mengowan i si-kara konoy Cristo tan profita kono. Mengemag ira na kaskasdaaw a sinjal tan milagro say no mebedin, saolen chiy angken toon pinispis Afo Chiyos. 25Isonga, pantanchaan kayo tep kowan banchaani kayo wa niman say amtaen joy mepesamak ali.

26“Isonga, no konen cha i ‘Si-neng jo, igwan i Messiah cha dogad a nagwariy toon naiyan-iya-iyan,’ enog i kowan chiwan. No konen cha pay i ‘Si-neng jo, man-eemot cha sekep na baliy,’ enog i piyati. 27Tep say iolik alin Anak na Too, inges toy bakilat a menilow na iyaykayang a medepod bosakan ingkathod denekan. 28Say nakigwan cha, sema kawad-an na iyangketiy, chiwan ngoy kawad-an na naesa-sa-nofan na titit a naengan cha si-kara.

Sema Ikowan Ali Na Anak Na Too

(Mark 13:24-27; Luke 21:25-28)

29“No mekcheng ma iwan a timpo na pandigat, mebolinget miy akow tan eg onnihal i bolan. Ma-kas ngo iriy pasingsing, tan emiin a gwared iyaykayang, onki-gwed. 30Gwara wiy sinjal cha iyaykayang a mengipaamta i chanchaniy ikowan ko din Anak na Too, tan emiin a gropon tood ja dobong, onngogngogngog ira tep chanchani diy kekowis cha. Metaen chaak men Anak na Toon emangkedafoak alid dangit a edikmothan na kolpot. Mahedsang i panakabalin ko, tan mandingsiak alin pasiya na kinachiyos ko. 31Et gwara diy mapkes a notheng na trompita, et ito-nok ali chiy anghilis kod intiron dobong say sa-nofen chiy took a pinispis kod emiin a soli na dobong. #24:31 emiin a soli na dobong Sema kigwan tod Greek a sola-solat, sejay: sema epat a naedafoan na chahem.

Sema Maachal Cha Kejow A Fig

(Mark 13:28-31; Luke 21:29-33)

32“Nemnem joy kejow a fig. Gwariy maachal chiwan. Apaman a man-green tan onjep-es i panga-panga tho, et ichogi thon manbolong, amta yo i chanchani wiy tiya-kow. 33Inges to ngo man no metaen jon emangkepasamak a emiin ira man a kigwa-kigwan kod si-kayo. Et amtaen jo wa i chanchaniy timpo na iolik alid jay. 34Sejay a konen kod si-kayo, podnon gwared jay i echom a toon sibibiyag pay laeng no mepesamak a emiin ira man. 35Sema gwared iyaykayang tan chiya dobong, mepokaw, nem sema ese-esel ko, eg mepoka-pokaw.”

Nagwariy Mahaamta No Empiyan Aliy Ioli Di Na Anak Na Too

(Mark 13:32-37; Luke 17:26-30,34-36)

36Intoloy Jesus a engowan i “Nagwariy mahaamta na oras tan akow na iolik ali. Angken sema iren anghilis cha dangit tan si-kak a Anak Afo Chiyos, eg mi amta. Si Afo Chiyos a Awa bengat i mahaamta. 37No timpo na iolik alin Anak na Too, say niyan-amaga na tothoo, inges to ngoy niyan-amaga na tothoo nonta timpon Noah. 38Tep nontan a timpon nat ingkajowjow nin na dobong, kekinakan, kaininom, tan kainimbaliy i tothoo ingkathod akow a insekep Noah cha bapor a imag to. 39Nat igwathan iren ma too iriy emanekot a chanchanin mepesamak. Tep nonta ejowjow i dobong tan aanod iren emiin, nontan bengat a iyamtaan cha i metiy ma ira. Et inges niwan ngo no onkowanak alin Anak na Too. 40No gwariy chegwen dalekin man-ob-obded payow, ma-diy sa-ki tan mepejas ngoy sa-ki. 41No gwara pay i chegwen bibiin kekiniling, ma-diy sa-ki tan mepejas ngoy sa-ki. 42Isonga, pansagana kayo na olay tep eg jo amta i koston akow a ioli di na Afo yo.

43“Nem nemnemnem joy mahabaliy. No iyamta thoy oras na kalebian a inkowan ali na mengibot, iyanbantay koma say nat mebedin a onsekep iwa mengibot. 44Isonga, mesepol ngon mansagana kayo tep si-kak a Anak na Too, onkowanak ali na oras a eg jo namnamaen.

Sema Bagaen A Esagana Na Olay I Naepiyal

(Luke 12:41-48)

45“Sema bagaen a naepiyal tan edaing, si-kathoy pengipiyalan na afo ton bantayan toy echom a bagaen say iap-ap niwa bagaen i kakanen cha na gwiya-gwa-gwa. 46Magesat iwa bagaen no onmothok aliy afo ton sebien ton towan amagiy inpiyal tod si-katho. 47Sejay a konen kod si-kayo, podnon ipiyal na afo tod si-katho i emiin a kokowa tho say bantayan to. 48Nem no bilang i mahedsel iwa bagaen a konen tod nemnem to i ‘Mebejag pay emo diy ioli na afok.’ 49Et becha-bechasen toy echom a bagaen, tan mekipangan tan mekiinom ired ma iyangkebotheng. 50On-oli wa diy afo tho na akow a eg to namnamaen tan oras a eg to amta. 51Et chosaen na afo tho et ika-chom to ired ma naengibili-biling a naengamag na mapteng a gwared ma inpiyirnon onngogngogngog ira tan kale-kaletketen cha ngoy sangi red man.”

Currently Selected:

Mateo 24: KAR

Highlight

Copy