Mateo 17

Iyanbaliw I Kasi-neng Jesus

(Mark 9:2-13; Luke 9:28-36)

1Idi epalabas diy enem a akow, iyodop Jesus si Peter tan san-ahin James ni John, et eniyed iren agos ched ekayang a chontog. 2Idi maramen chiyan si-nenges Jesus, iyanbaliw i kasi-neng to. Sema dopa tho, onsilen inges toy akow, tan sema baro tho pay, pimolaw a chilin mandingsi. 3Et iyanparang mes Moses tan si Elijah a chiyan tebales Jesus. 4Kigwan Peter cha Jesus i “Afo, salamat a gwara kiyed jay. No piyan mo, mengemagak na tedon sakmao say sema sa-ki para cha si-kam, sema sa-ki para cha Moses, tan sema sa-ki para cha Elijah.”

5Idi maramen man-eesel pay si Peter, biglen gwariy kolpot a manihal a enirom ira. Et gwara diy esel a edafod ma kolpot a kigwan to i “Sejay i ensemek kon pasiyen Anak ko. Si-kathoy panchadsahan kon chili. Ki-ngeli yoy nakigwan to.”

6Idi inki-ngelan na disipolos to man, iyantalimohod iren dimakbab tep ketahot iren pasiya. 7Nem insofan iren Jesus a kiyapkap to iren kigwan to i “Akgwat kayo. Enog i tahot!” 8Et idi timangkak ira, nagwariy mita ra, malaksid si Jesus bengat.

9Idi maramen manchachalong ired ma chontog, binidin iren Jesus i “Enog i ingwanggwanggwang cha angken siyen tooy mita yo ingkathod manpawilak nin a Anak na Too.”

10Et inbagaan na disipolos to i “Niyana nakigwan na mamaistoro na dinteg i mesepol a medebas nin alis Elijah iy say sema Cristo?”

11Insongbat Jesus i “Medebas ngarod alis Elijah a mengiolnos na emiin. 12Nem konen kod si-kayo i iyakcheng alis Elijah a kimowan, nem nat piyeschian na too, et imag chiy piya-piyan ched si-katho. Inges to di ngod si-kak a Anak na Too. Pedigathen chaak ngo.” 13Idi kigwan Jesus iwan, igwathan na disipolos to i si John a Naemonjag i piyan ton a-seden.

Chiyagchag Jesus I Dimonyon Iyay-ejan Cha Nga-ngen Dahi

(Mark 9:14-29; Luke 9:37-43a)

14Idi enalong ires Jesus, iyaspol chiy chakel a too. Gwariy sa-kin dahin imesop cha kad-an Jesus a iyantalimohod cha sangoanan to. 15Kigwan to i “Afo, pangaasim, kaasiim iyay a anak kon nakimayengkeng. No onkayengkeng ali, naiyandigat a pasiya. Eminchakel a naiyatgwang cha afoy tan chanom. 16Intolod ko ired disipolos mo, nem eg cha mebedin a pemapteng.”

17Insongbat Jesus i “Si-kayon toon eg naemati tan ngaaw i nemnem jo! Sa-noy kebejag na pekiolo-olop kod si-kayo? Sa-noy kebejag na pan-ano-anos cha si-kayo? Ala jo di ta nga-nged si-kak.” 18Et inseg-ang Jesus iwa dimonyon bimo-day da, et mimapteng a chakos iwa nga-nga.

19Nonta agos iren Jesus tan disipolos to, inbagaan cha i “Niyana eg mi mahachagchag iwa dimonyo?”

20Insongbat Jesus i “Tep otik i pamati yo. Tep sejay a konen kod si-kayo, podnon angken no otik i pamati yon inges toy bothil na mostard a kaotihan cha emiin a bothil, mebedin a konen jod ma chontog i ‘Ki-ki-nan ked man da a’ et onki-ki-nan. Gwariy panakabalin jon mengemag a emiin. 21Nem say dimonyon inges niwan, nat mebedin a mechagchag ampet memasig kayon mankararag tan man-ayonar.”

Sema Maykadgwen Inpangowan Jesus Maypangkep Na Ketiy To

(Mark 9:30-32; Luke 9:43b-45)

22Nonta sa-kin akow, idi esi-nop si Jesus tan disipolos tod Galilee, kigwan Jesus i “Si-kak a Anak na Too, iawat chaak cha naengontred si-kak 23et bonoen chaak, nem no maykatdon akow, manpawilak.” Idi inki-ngelan na disipolos to man, iya-ngos iren pasiya.

Bijaran Iren Jesus I Binis Na Timplo

24Idi mimothok si Jesus tan disipolos tod Capernaum, sema iren para singil na binis na timplo, kimowan ired kad-an Peter a inbaga ra i “Naiyanbayad i maistoro yo na binis na timplo?”

25Kigwan Peter i “Ahow.”

Idi imolis Peter chiwa baliy a kad-an Jesus, edagwas si Jesus a imesel a kigwan to i “Simon, ngoy konen mo? Toy naeningilan na aarid ja dobong na binis i? Cha aanak cha ono cha echom?”

26Kigwan Peter i “Cha echom.”

Et kigwan men Jesus i “No agpayso tan, nat mesepol a manbayad i aanak cha. 27Nem eg tayo koma ira sesnithen, isonga taha pannigay cha baybay. Sema medebas a nigayen mon paideng, dohatim iwa temi tho, et metaen moy pilak a on-anay cha binis tayo. Alam et i-kan mod si-kara.”

Currently Selected:

Mateo 17: KAR

Highlight

Copy