Mateo 18

Siyay Kahejangan?

(Mark 9:33-37; Luke 9:46-48)

1Nontan a timpo, kimowan i disipolos Jesus cha kad-an ton kigwan cha i “Siyed si-kawiy kahejangan cha pantorayan Afo Chiyos?”

2Ena-gway si Jesus na nga-nga et inpaakgwat tod ma kawa na tothoon 3kigwan to i “Sejay a konen kod si-kayo, podnon no eg jo sa-dathan ithan a ogadi yon ingesen joy nganga-nga, eg kayo mayka-ka-chom cha pantorayan Afo Chiyos. 4Tep sema toon mengibaba na angel ton inges to ja nga-nga, si-kathoy kahejangan cha pantorayan Afo Chiyos. 5Tan sema toon mengegwat na ebaben toon inges to ja nga-nga kagol na pamati thod si-kak, si-kak pay i egwathen to.

Sema Penolisog

(Mark 9:42-48; Luke 17:1-2)

6“Nem angken siyen toon mengipabasol na angken sa-kin ebaben toon naematid si-kak, magangkana koma no may-i-ket i enbel-at a bathod bokdow to et iba-tok ched baybay say metiy iy say sema mengipabasol na too. 7Kakaasin pasiyay tood ja dobong tep chakel aliy solisog! Tep sigoradon gwara diy solisog, nem sema toon mengipabasol, kakaasi ngon chili tep si-kathoy panchedanan niwa solisog! 8Isonga, no seta diwam ono sekim i panbasolan mo, ketnom et ikepil mo. Tep magangkana no mayka-chom ked biyag a nagwariy pengingkaan to angken sa-ki bengat i diwam ono sekim iy chegwiy diwam ono sekim a iba-tok chaked ma afoy a eg ma-ma-chepan. 9Tan no seta ngon matham i panbasolan mo, ekal mo et ikepil mo. Tep magangkana no mayka-chom ked biyag a nagwariy pengingkaan to angken sa-ki bengat i matham iy chegwiy matham a iba-tok chaked ma afoy na inpiyirno.

Sema Arig Na Kalniron Iya-tiw

(Luke 15:3-7)

10“Tanchaani yon eg mandisdisjon cha angken sa-kin ebaba. Tep konen kod si-kayo i sema anghilis chen naengajo ira, igwan na olay ired kawad-an Awak cha dangit. 11Tep si-kak a Anak na Too, kimowanak ali say isalakan ko iriy iyangkaathiw. #18:11 Nagwara jay a birsikolod echom a Greek a sola-solat.

12“Nemnem jo jay. Nem bilang i gwariy toon gwariy sandasos a kalniro tho et gwariy sa-kin aathiw. Nat ipayas to aya ma siyam a polo tan siyam a kalnirod ma chontog, et a-nafen to ma sa-kin aathiw? 13Sejay a konen kod si-kayo, podnon no sepolen to, naiyan-imdengan to ma sa-ki iy say sema siyam a polo tan siyam a nat aathiw. 14Inges to ngos Awak a gwared dangit a eg to piyan a maysi-jan cha si-katho ma angken sa-kin ebaben too.

Sema Pesing No Gwariy Iyanbasol Cha Si-kathayo

15“No gwariy iyanbasol a echom mod si-kam, mo tebal si-kathon sa-sa-ki tho maypangkep na basol to. No piyanen to ma konen mo, man-inawatan kayo wa. 16Nem no eg to piyan a iki-ngelan, ta-gway ka wa na sa-ki ono chegwen echom a mengipaneknek na podnoy konen jo. 17No eg to ngo pay piyan a iki-ngelan iwa konen cha, igwanggwang mo ired ma naemati no mesi-nop ira. Et no eg to pay laeng ira iki-ngelan, ibilang jon toon nat amta thos Afo Chiyos tan para singil na binis. 18Sejay a konen kod si-kayo, podnon angken nengoy iparit jod ja dobong, iparit ngon Afo Chiyos a gwared dangit. Tan angken nengoy itolok jod ja dobong, itolok ngon Afo Chiyos a gwared dangit.

19“Konen ko pay cha si-kayo i no gwariy chegwed si-kayon man-inawat na ibaga yod Awak a gwared dangit, metongpal. 20Tep no angken chegwa ono tedo bengat i esi-nop tep naemati ired si-kak, gwaraak ngod si-kara.”

Sema Arig Na Bagaen A Eg Emakawan

21Et kimowan mes Peter cha kad-an Jesus et kigwan to i “Afo, no gwariy echom kon naiyanbaso-basol cha si-kak, meminpiyaak a memekawan cha si-katho? Ingkathod meminpitho?”

22Insongbat Jesus i “Konen kod si-kam i nat meminpitho bengat, no diket meminpithon polo tan pitho. 23Tep say pantorayan Afo Chiyos, may-arig cha arin piyan ton meningil na othang ira na bagaen to. 24Idi inchogi thon meningil, gwariy bagaen a intolod ched si-kathon iyan-othang na dinibo. #18:24 dinibo Sema kigwan tod Greek a sola-solat, sejay: sampolon dibon talents. Say sa-kin talent, enem a dibon denarii i banol to, tan say sa-kin denarius, dagbo na sa-kin too na san-akow. 25Eg nahabayad iwa bagaen, isonga inbilin niwa ari i maydeko iren sambaliy tan aanak cha, pati sema kokowa ra say mebejaran i othang to. 26Iyantalimohod iwa bagaen a chakos cha sangoanan na ari, et iyanpakaasin kigwan to i ‘Afo, pangaasim, pan-anos ka, et sigoradok a bejaran kon emiin i othang kod si-kam.’ 27Isonga, kiyaasian niwa arin iyomas to ma othang to, et intolok ton onbetik.

28“Idi maramen manbebetik iwa bagaen, iyaspol toy echom ton bagaen a gwariy othang tod si-kathon otik a dibo bengat. #18:28 otik a dibo Sema kigwan tod Greek a sola-solat, sejay: sandasos a denarii. Iyegnian toy bokdow niwa too et singkel ton kigwan to i ‘Bayarim i othang mo!’ 29Et iyantalimohod ma iwa echom ton bagaen, et iyanpakaasin kigwan to i ‘Pangaasim, pan-anos ka, et sigoradok a bejaran koy othang kod si-kam.’ 30Nem nat timolok iwa pilmiron bagaen, et inpakalebos to ingkathod mahabayad koma na othang to. 31Idi mita iren ma echom a bagaen i imag to, iyangkaopay ira, isonga kimowan ired ma ari et kigwan chen emiin iwa epasamak. 32Nonta inki-ngelan na ariy epasamak, tiya-gway to ma bagaen et kigwan to i ‘Si-kam a ngaaw a bagaen! Iyomas kon emiin i othang mo tep iyanpakaasi ka. 33Niyana eg mo ngo kiyaasian i echom mon bagaen iy kiyaasian taha?’ 34Kebonget a pasiyen chiliy ari, isonga inpakalebos to ma bagaen ingkathod mahabayad koma na emiin a othang to. 35Isonga, inges ngon jay i pesing Awak a gwared dangit no eg jo podnon pekawanan i echom jo.”

Currently Selected:

Mateo 18: KAR

Highlight

Copy