Mateo 15

Sema Iyan-afilan Na Toro-toro Na Pharisees Tan Dinteg Afo Chiyos

(Mark 7:1-13)

1Nonta sa-kin akow, gwara iriy Pharisees tan mamaistoro na dinteg a edafod Jerusalem a kimowan ired kad-an Jesus a kigwan cha i 2“Niyana nachichal iren ma disipolos moy ogadin iyelbat tayod afo-afo thayo la? Apay nga naengan ira iy eg ira nin iyanbolo na kosto?”

3Insongbat Jesus i “Et si-kayo ngo ngay? Niyana nachichal joy bilin Afo Chiyos tep say onoran joy ogadi yo? 4Tep inbilin Afo Chiyos i ‘Chayaw mos awam ni inam,’ #15:4 Exodus 20:12; Deuteronomy 5:16 tan ‘No gwariy man-a-sel na ngaaw maypangkep aweto ni ineto, mesepol a metiy.’ #15:4 Exodus 21:17; Leviticus 20:9 5Nem nakigwan jo kitdi i no gwariy itolong na tood aweto ni ineto, angken eg to piyan a i-kan basta manpangbal cha si-karen konen to i ‘Seja komen itolong kod si-kayo, iyaykarin may-i-kan cha Afo Chiyos.’ 6Isonga, naiyomas joy esel Afo Chiyos tep say onoran joy ogadi yo. 7Si-kayon naengibili-biling a naengamag na mapteng! Podnoy inpadton Isaiah maypangkep cha si-kayo nonta insolat toy kigwan Afo Chiyos a:

8‘Sema iren too, nachijaw chaak na ese-esel cha,

nem aragwiy nemnemnem ched si-kak.

9Nagwariy silbi na panchejaw ched si-kak

tep naintoro chiy bili-bilin na toon

nakigwan cha i bili-bilin ko.’ ” #15:8-9Isaiah 29:13

Sema Naengipaskig Na Too

(Mark 7:14-23)

10Et tiya-gway men Jesus i chakel a toon kigwan to i “Iki-ngeli yo say egwathan jo. 11Nat sema nasimekep cha temi na tooy naengipaskig, no diket sema nabimo-day cha temi tho.”

12Et kimowan ma iriy disipolos tod kad-an Jesus a kigwan cha i “Amtam i iyasnit ira ma Pharisees niwa kigwan mo?”

13Insongbat Jesus i “Emiin a nat intanem Awak a gwared dangit, mebosbos. 14Isonga, iolay jo ira ma Pharisees. Inges cha ira ma ekorab a naengibalnay. No ibalnay na ekorab i sa-kin ekorab, ma-kas iren chegwed ebot.”

15Et kigwan men Peter i “Enti iksplikar mo pango ma in-arig mo nonta engkay da.”

16Kigwan Jesus i “Pati si-kayo, eg jo pay nin ngo egwathan? 17Eg jo amta i sema nasimekep cha temi na too, nakimowan cha ekes to, et nabimo-day? 18Nem sema nabimo-day cha temi tho, naedafod nemnem to, et si-kathoy naengipaskig. 19Tep sema nemnem to, si-kathoy naedafoan na emiin a ngaaw a pangkep a naiyanbalin na ngaaw a ogadin inges to ira jay: memono, mekibii tan mekidahi, mengibot, mantistigo na itek, tan mengomang na echom. 20Seman iriy naengipaskig na too. Nem say pengan na eg manbolon kosto, nat seman i naengipaskig cha si-katho.”

Sema Pamati Na Biin Nat Hodjo

(Mark 7:24-30)

21Et iyamtik si Jesus chiwan et kimowan cha sahop a kad-an na siyodad na Tyre tan Sidon. 22Gwariy biin nat Hodjon naiyan-iyan chiwan. #15:22 Say kigwan tod esel na Greeks, biin i-Canaan. Sema iren toon i-Canaan, nat Hodjos ira. Kimowan cha kad-an Jesus a kimeljaw a kigwan to i “Afo, Polin David, pangpangaasim, kaasii moak. Iya-janan i anak kon bii na dimonyo et mandigat a pasiya.”

23Nem eg polos simongbat si Jesus. Et kimowan i disipolos tod kad-an ton kigwan cha i “Pa-kal mo pango tep naimono-onod cha si-kathayo tan nakimelkeljaw.”

24Et kigwan Jesus i “Sema iren iyayto-noan ko di, Hodjos bengat a may-arig cha kalniron aathiw.”

25Nem sema bii, imesop ngorechan et iyantalimohod cha sangoanan Jesus a kigwan to i “Afo, pangaasim, tolongi moak.”

26Et kigwan Jesus a in-arig to i “Nat mapteng no a-daen chiy kakanen na aanak et ita-boy ched aso.”

27Kigwan na bii i “Ahow mango, Afo, nem angken asod doongan niwa damisaan, nakiyakan cha ngoy dagdag a naiya-kas iy maramen mankakakan ngoy afo ra.”

28Et kigwan Jesus i “Bii, banay ithan a pamatim! Sema inbagam, metongpal.” Et mimapteng a chakos iwa anak to.

Inpamapteng Jesus I Chakel A Mansekit

29Et imekal mes Jesus et kimowan cha kilig na baybay na Galilee. Et eniyed cha chontog et timokkong chiwan. 30Chakel a pasiyay toon kimowan cha kad-an ton engitolod ali na epilay, ekorab, aomel, sema iren gwariy charal na parti na angel cha, tan sema iren chakel a mansekit. Intolod cha ired sangoanan Jesus, et inpamapteng to ira. 31Iyasdaaw i chakel a too nonta mita ren mahaesel i aomel, mahaahad i epilay, mahasi-neng i ekorab, tan sema iren gwariy charal na parti na angel cha, mimapteng. Et chijaw ches Afo Chiyos a Chiyos na poli-polin Israel.

Pikan Jesus I Esolok A Epat A Dibon Too

(Mark 8:1-10)

32Et tiya-gway Jesus i disipolos to et kigwan to i “Emangkaikaasiiak ired ja too tep gwara ired si-kak na tedon akow et nagwara wiy kakanen cha. Nat piyan kon pebtik ko ira iy eg ira nin engan tep onkapsot emo la ired chalan.”

33Kigwan iren ma disipolos to i “Ahow mango, nem toy pengedaan tayo na on-anay a kakanen cha iy chakel ira tan iyaydasin iyay a dogad?”

34Inbagen Jesus i “Piyen tinapay i gwared si-kayo?”

Kigwan cha i “Pithon tinapay tan otik a babechiseng a paideng.”

35Et inpatokkong men Jesus iriy too. 36Ida thoy tinapay a pitho tan paideng et iyansalamat cha Afo Chiyos. Piyetpet-ing ton in-i-kan tod disipolos to et in-ap-ap ched too. 37Engan iren emiin et iyapsel ira. Et kiyoskos iren ma disipolos i ebay-anan et pino thoy pithon basket. 38Say kabibidang na engan, epat a dibon daleki, nem eg iyaybilang i bibii tan aanak a gwara pay ired man.

39Et inpabtik Jesus iriy too, et ekidogan cha disipolos tod bangken kimowan ired sahop na Magadan.

Currently Selected:

Mateo 15: KAR

Highlight

Copy