John 15

May-arig Si Jesus Cha Sengeg Na Gwahal A Grape

1Et in-arig Jesus a kigwan to i “Si-kak i podnon sengeg na gwahal a grape, tan si Awak i naengajo. 2Emiin a pangak a nat nadimawes, naingkal na naengajo, tan emiin a pangak a nadimawes, naingkalan to say onchakel pay i dawes to. 3Si-kayo ira ma pangen iya-kalan ma kagol na esel Afo Chiyos a kigwan kod si-kayo. 4Itolo-toloy jon mayka-chom cha si-kak na olay, tan itolo-toloy ko ngon mayka-chom cha si-kayo na olay. Sema panga na grape, nat mahadawes no ma-kal cha sengeg to. Inges to ngod si-kayon nat mahadawes no nat mayka-chom kayod si-kak.

5“Si-kak i sengeg na gwahal a grape tan si-kayoy panga-panga tho. Sema toon mayka-chom cha si-kak et say mayka-chomak ngod si-katho, si-katho di ma chakel a dawes to. Tep sema toon iyaysi-jan cha si-kak, nagwariy mebedin a a-magen to. 6No nat itolo-toloy na toon mayka-chom cha si-kak, maykepil a inges toy pangen iya-kal et emaha. Et maysa-nop ira ma panga-panga, et maykepil chiwa afoy say mepoolan. 7Nem no itolo-toloy jon mayka-chom cha si-kak tan naniyemnemnem joy nakigwan ko et a-magen jo, angken nengoy ibaga yod Awak, i-kan tod si-kayo. 8No chakel i dawes jo, maychejaw si Awak, tan sema pandawes jo na chakel, si-kathoy mengibiybiy i disipolos tahejo. 9Sema inpanmek Awak cha si-kak, inges niwan ngoy penmek kod si-kayo. Isonga, itolo-toloy jon mayka-chom cha si-kak say gwara na olay i semek kod si-kayo. 10No patien joy bili-bilin ko, gwara na olay i semek kod si-kayo. Inges to ngod si-kak a napiyatik i bili-bilin Awak, et gwara na olay i semek tod si-kak. 11Kigwan ko led si-kayo ira jay say sema chadsak a kenasen jo, inges to diy chadsak ko tan say nagwara diy kolang na chadsak jo.

12“Sejay i bilin kod si-kayo a pansisinemek kayon inges toy penmek kod si-kayo. 13Sema kabanayan a semek a ibiybiy na too, sema pengi-kan to na biyag to para cha kajem to. 14Si-kayoy kajem ko no patien joy bili-bilin ko. 15Nat ibilang tahejo wen bagaen ko tep sema bagaen, nat amta thoy plano na afo tho. Nem nainbilang tahejon kajem ko tep emiin a kigwan Awak cha si-kak, inpaamtak ngo waled si-kayo. 16Nat si-kayoy emispis cha si-kak, no diket si-kak i emispis cha si-kayo, tan chiyotohan tahejo say ondawes kayo et on-ono-onong i dawes jo na ingked ingka. Et angken nengoy ibaga yod Awak kagol na ingkayka-chom jod si-kak, i-kan tod si-kayo. 17Sejay i ibilin kod si-kayo a pansisinemek kayo.”

Sema Iren Toon Nat Naematid Jesus, En-owes Cha Ira Ma Naematid Si-katho

18Kigwan ngon Jesus ired ma disipolos to i “Sema iren toon nat naematid si-kak, owesen cha kayo. Nem nemnem jo i edagwas a iyowes chaak. 19No ingesen jo ira ma tood ja dobong a nat naematid si-kak, sesmeken cha kayo komen singen ahi yo ira. Nem pinispis tahejo say maydasin kayo ired ma tood ja dobong. Isonga, en-owes cha kayo. 20Nemnem jo i kigwan kod si-kayon ‘Nat mas ainportantiy bagaen iy say afo tho.’ No piyadigat chaak na too, pedigathen cha kayo ngo. Tan no piyati riy kigwan ko, patien cha ngoy konen jo. 21A-magen chen emiin ira ja ngaaw cha si-kayo kagol na ingkayka-chom jod si-kak tep nat amta ra ma engito-no did si-kak.

22“No nat kimowanak koma di et intoroan ko ira, nat basol i nat inpamati red si-kak. Nem agpayson kimowanak ali et nat emati pay laeng ired si-kak, isonga nagwariy pangbal cha na iyanbasolan cha. 23Sema toon mahaowes cha si-kak, en-owes to ngos Afo Chiyos a Awak. 24No nat sini-neng cha iriy milagron ima-imag kon nagwariy mahaamag, gwara komiy pangbal chen nat inpamati red si-kak. Nem agpayson sini-neng cha ira ma milagro, et en-owes cha kawi pay laeng Awak. 25Nem epasamak a emiin ira man say metongpal iwa iyaysolat chiwa dinteg chen kigwan to i ‘Iyowes chaak angken nagwariy kagol to.’ #15:25 Psalm 35:19; Psalm 69:4

26“Nem ito-nok i Naenolong a medepod Awak. Si-kathoy Ispirito Santon medepod Awak, tan ipaamta thoy podnod si-kayo. Et no onmothok ali, tistigoan toak. 27Et si-kayo, tistigoan joak ngo tep kiyadkadgwaan joak manipod nonta inchogik a mantoro.”

Currently Selected:

John 15: KAR

Highlight

Copy