John 14

Si Jesus I Chalan A Ontorong Cha Aweto

1Et kigwan Jesus ired ma disipolos to i “Enog i chanag, no diket itoloy jon mematid Afo Chiyos tan itoloy jo ngon mematid si-kak. 2Gwariy chakel a pan-iyanan cha baliy Awak. Et onkowanak chiwan a mengisagana na pan-iyanan jo. No nat podno koma jay, ekak ingwanggwang iyay cha si-kayo. 3No kekchengen kon mengisagana na pan-iyanan jo, on-oliak mowan alid jay, et itahin tahejod ma kad-an ko say mekiiyan kayod si-kak. 4Tep amta yo ma chalan a ontorong cha konan ko.”

5Et kigwan Thomas i “Afo, nat amta wi ma konan mo. Ngoy pesing min mengamta na chalan ded man?” 6Et insongbat Jesus i “Si-kak i chalan tan sema podno tan sema biyag. Nagwariy mahakowan cha Awak ampet manchedan cha si-kak. 7No agpayson amta yoak koma, amta yo ngos Awak. Manipod niman, amta yo wes Awak, tan sini-neng jo.”

8Et kigwan ngon Philip cha Jesus i “Afo, ibiybiy mos Awam cha si-kawi say mepnek kawi.” 9Insongbat Jesus i “Philip, ebayag a gwaraak cha si-kayon emiin, et eg moak pay gayam amta? Sema toon eni-neng cha si-kak, sini-neng to ngos Awak. Isonga, niyana kigwan mo i ‘Ibiybiy mos Awam cha si-kawi’? 10Nat patien mo aya i gwaraak cha Awak, tan si Awak, gwara ngod si-kak? Emiin a kigwan kod si-kayo, nat edafod nemnem ko, no diket edafod Awak a gwared si-kak. Tan emiin a ima-imag ko, si Awak i engowan cha si-kak na a-magen ko. 11Patien jo koma i gwaraak cha Awak tan gwara ngos Awak cha si-kak. No nat patien jo kagol na nakigwan ko, pati yo kagol na naima-imag kon milagro.

12“Sejay a konen kod si-kayo, podnon sema toon mematid si-kak, a-magen to ngo ira ja naima-imag ko. Et sema a-magen to, ba-ba-nayan iy say sema naimag ko tep onkowanak cha Awak. 13Angken nengoy ibaga yod si-kak kagol na ingkayka-chom jod si-kak, a-magen ko say maychejaw si Awak kagol na a-magen kon Anak to. 14Konen ko mowan i angken nengoy ibaga yod si-kak kagol na ingkayka-chom jod si-kak, a-magen ko.”

Inkarin Jesus I Ito-no Tho Diy Ispirito Santo

15Et kigwan pay Jesus i “No ensemek joak, patien joy bili-bilin ko. 16Et ibagak cha Awak i ito-no tho di ma maysa-dat cha si-kak a menolong cha si-kayon on-ono-onong cha si-kayo na ingked ingka. 17Sema Naenolong, si-kathoy Ispirito Santon mengipaamta na podnod si-kayo. Sema iren toon nat mematid si-kak, nat mebedin a may-i-kanan ira na Ispirito Santo tep nat naindasin cha tan nat amta ra. Nem si-kayo ngo, amta yo ma Ispirito Santo tep man-iiyan med si-kayo tan gwara di na olay cha si-kayo.

18“Eg tahejo iolay a singen engoso kayo. On-oliak mowan alid si-kayo. 19Sema iren toon nat mematid si-kak, no engkay, nat si-nengen chaak ma, nem si-kayo, si-nengen joak. Et kagol na panbiyagan ko mowan, manbiyag kayo ngo. 20No seman a timpo, amtaen jo i gwaraak cha Awak, tan gwara kayo ngod si-kak, tan gwaraak ngod si-kayo. 21Sema toon naengawat na bili-bilin ko tan napiyati tho, si-kathoy mahasmek cha si-kak. Tan sema mahasmek cha si-kak, sesmeken ngon Awak. Tan sesmeken ko ngo ma too, tan ipaamtak cha si-kathon emiin i maypangkep cha si-kak.”

22Et sema sa-kin Judas a nat si Judas Iscariot, inbagaan tos Jesus i “Afo, niyana si-kawi bengat i ipaamtaan mo na angel mo iy nat emiin a tood ja dobong?” 23Insongbat Jesus i “Sema toon mahasmek cha si-kak, a-magen toy konen ko. Et sesmeken Awak iwa too, tan si-kawin Awak, onkowan kawin mekiiyan cha poso tho. 24Nem sema toon nat mahasmek cha si-kak, nat a-magen toy konen ko. Sema iren nakigwa-kigwan kon inki-ngelan jo, nat naedafod nemnem ko, no diket naedafod Awak a engito-no did si-kak.

25“Kigwan kon emiin ira jay iy gwaraak pay cha si-kayo. 26Nem sema Naenolong a Ispirito Santon ito-no din Awak cha si-kayo a maysa-dat cha si-kak, itoro thon emiin cha si-kayo, tan ipanemnem tod si-kayoy emiin a kigwa-kigwan ko.

27“Sema ipayas kod si-kayo ket, talned nemnem jo. Seja talna, naedafod si-kak, tan nat inges toy talnen naedafod ja dobong a nat onbayag. Isonga, enog i chanag tan enog ngoy tahot. 28Inki-ngelan joy kigwan kon ‘Onbetihak, nem on-oliak mowan ali.’ No podnon ensemek joak, onchadsak kayo komed ikowan kod Awak tep mas ekayang iy say si-kak. 29Kigwan kod si-kayo jay niman asan mepesamak say no mepesamak ma iwan, memati kayo wed si-kak. 30Nat mebejag i pekiteba-tebal kod si-kayo tep si Satanas a naiyantoray chiya dobong, chanchanin onkowan ali. Nagwariy karebengan tod si-kak. 31Nem itolok koy chanchanin mepesamak cha si-kak say amtaen na too i ensemek kos Awak tan a-magen koy inbilin tod si-kak.

“Niman ma, akgwat kayo, emoy ira.”

Currently Selected:

John 14: KAR

Highlight

Copy