John 13

Chiyaychayan Jesus I Seki Iren Ma Disipolos To

1Idi chanchanin manchogiy Piyasta na Inda-bas na Anghil cha Hodjos, amta wen Jesus i mimothok i timpon onbetik chiya dobong et on-olid Aweto. Ensemek ton chili ira ma toon iyayka-chom cha si-kathod ja dobong, et inbiybiy toy semek tod si-kara ingkathod ingkathiy to.

2Idi edagwi wa, mankakakan si Jesus tan disipolos to. Nontan a timpo, iyawis mala na Diablos Judas Iscariot a anak Simon a menraidor Jesus. 3Si Jesus, amta tho i in-i-kan Aweton emiin i panakabalin cha si-katho. Amta tho ngo i edafod Afo Chiyos tan on-olid Afo Chiyos. 4Isonga, imakgwat si Jesus et ingkal toy ta-kep na baro tho, et insafiy toy towaljed gwakes to. 5Et engiso-jat na chanom cha batiya, et inchogi thon chaychayan i seki na disipolos ton piyonasan to na towaljen insafiy tod gwakes to. 6Idi sibin Jesus si Simon Peter, kigwan Peter cha si-katho i “Afo, nat si-kam komiy onchaychay na sekik.” 7Et kigwan Jesus i “Nat egwathan mo niman i kowan amaga, nem egwathan mo nem engkay.” 8Et kigwan mowan Peter i “Ekak itolok a chaychayan moy sekik.” Et insongbat Jesus i “No ekak chaychayan i sekim, nat maybilang ken disipolok.” 9Et kigwan Simon Peter i “Afo, no setan, nat sekik bengat i dinisan mo, nem pati diwak tan toktok ko!” 10Insongbat Jesus i “Sema toon iyanna-mes, nat mesepol a manna-mes mowan tep malinis ma. Seki tho bengat i mesepol a medinisan. Si-kayo, edinis kayo, nem gwariy sa-kid si-kayon nat edinis.” 11Kigwan Jesus iwan tep amta tho wala no siyay menraidor cha si-katho. Isonga, kigwan to i “Gwariy sa-kid si-kayon nat edinis.”

12Idi chiyaychayan Jesus i seki iren ma disipolos to, inbaro tho mowan i ta-kep na baro tho et imolid kad-an tod damisaan. Et inbaga tho ired ma disipolos to i “Egwathan joy imag kod si-kayo? 13Nainngaran jod si-kak i Maistoro tan Afo, et iyaybagay tep si-kak i agpayson Maistoro yo tan Afo yo. 14Isonga, si-kak a Afo yo tan Maistoro yo, no chiyaychayan koy seki yo, mesepol komen manchichinaychay kayo. 15Tep sema imag ko, si-kathoy arig cha si-kayo say onoran joy imag ko. 16Sejay a konen kod si-kayo, podnon nat mas ainportantiy bagaen iy say afo tho. Tan sema iyayto-no, nat mas ainportanti ngo iy say sema engito-nod si-katho. 17No egwathan jo ira jay a kigwan ko, mabindisjonan kayo no a-magen jo.

18“Nat si-kayon emiin i engibanagan ko nonta kigwan ko i mabindisjonan kayo. Tep amtak i nemnem jon emiin a pinispis ko, et gwariy sa-kid si-kayon menraidorak. Nem pinispis tahejo ngorechan say metongpal i esel Afo Chiyos a kigwan to i ‘Sema toon ekipangan cha si-kak, tiyaraidor toak.’ 19Kowan kona iyay niman asan mepesamak say no mepesamak, patien jo i si-kak i Cristo. 20Sejay a konen kod si-kayo, podnon sema toon mengegwat na ito-nok, si-kak pay i egwathen to. Tan sema mengegwat cha si-kak, egwathen to pay ngo ma engito-nod si-kak.”

Inpaamten Jesus I Traidoren Judas

(Matthew 26:20-25; Mark 14:17-21; Luke 22:21-23)

21Idi iyakcheng a kigwan Jesus iwan, ensahit i nemnem to et kigwan to i “Sejay a konen kod si-kayo, podnon gwariy sa-kid si-kayon menraidorak.” 22Iyansisini-neng ira ma disipolos to tep nat amta ra no siyed si-kara ma piyan ton a-seden. 23Sema sa-kin disipolon ensemek Jesus a chili, mantoktokkong cha askang to. 24Isonga, iyanchingjas si Simon Peter chiwa disipolon iyay-askang cha Jesus et kigwan to i “Ibagam cha Jesus no siyed si-kathayo ma piyan ton a-seden.”

25Et imesop iwa disipolod Jesus a inbaga tho i “Afo, siya ma piyan mon a-seden?” 26Et insongbat Jesus i “Sema toon i-kanan ko niya tinapay a isiwsiw ko, si-katho man.” Et insiwsiw toy tinapay, et inni-kan tod Judas a anak Simon Iscariot. 27Apaman a iden Judas iwa tinapay, simekep si Satanas cha nemnem to. Et kigwan Jesus cha si-katho i “Kanoim ma et amag moy niyemnem mon a-magen.” 28Sema iren echom a disipolos a kakinakan, nagwared si-kariy engawat na piyan Jesus a a-seden nonta kigwan to man cha Judas. 29Kagol a naengegchis Judas na pilak cha, kin na echom i kigwan Jesus cha Judas i menongkal na mesepol para cha piyasta ono mengi-kan na pilak ired ma iyangkebitheg. 30Apaman a iden Judas iwa tinapay, imawas. Et edagwi.

Sema Badon Bilin Jesus

31Idi bimetik si Judas, kigwan Jesus i “Niman i timpon maykayangak a Anak na Too. Et kagol na a-magen ko, maykayang ngos Afo Chiyos. 32Et no maykayang ngos Afo Chiyos kagol cha si-kak, ikayang toak ngo, et a-magen ton chakos iwan. 33Si-kayon nainbilang kon anak ko, on-onongak pay nin cha si-kayo na kemtang bengat. Anafen joak, nem konen ko mowan cha si-kayo i kigwan ko ired ma naengibalnay na Hodjos i ‘Nat mebedin a onkowan kayod ma konan ko.’ 34Niman, sejay a konen kod si-kayo, badon bilin a pansisinemek kayo. Sema nainpanmek kod si-kayo, inges ngon man komiy pansisinemek jo. 35Tep no mansisinemek kayo, si-kathoy mengipaamted emiin a too i disipolos tahejo.”

Inpaamten Jesus I Dibahan Peter

(Matthew 26:31-35; Mark 14:27-31; Luke 22:31-34)

36Et kigwan Simon Peter cha Jesus i “Afo, toy konan mo i?” Insongbat Jesus i “Nat mebedin a tetneren moak niman cha konan ko, nem tetneren moak nem engkay.” 37Et kigwan Peter mowan i “Afo, niyana nat mebedin a tetneren taha niman? I-kan koy biyag ko para cha si-kam.” 38Insongbat Jesus i “I-kan mo ayay biyag mo para cha si-kak? Sejay a konen kod si-kam, podnon no aneng onkakaok i manok, memintedo ken mengowan i eg moak amta.”

Currently Selected:

John 13: KAR

Highlight

Copy