John 12

Engiso-jat Si Mary Na Manbangdon Daned Sekin Jesus

(Matthew 26:6-13; Mark 14:3-9)

1Idi gwara pay i enem a akow asan i Piyasta na Inda-bas na Anghil cha Hodjos, kimowan si Jesus cha Bethany a naiyan-iyanan Lazarus a inpanpawil to. 2Et iyansagana ira na mekan chiwan para cha panchejaw cha Jesus. Si Martha i engitolod na kakanen cha, tan si Lazarus i sa-kin ma ekipangan cha Jesus. 3Tan si Mary, ida thoy kagachowen litron palit a danen manbangdon nakigwan cha i nard a inso-jat tod sekin Jesus, et piyonasan to na bowek to. Et iyapnoy baliy na bangdo niwa dana. 4Nem si Judas Iscariot a disipolon Jesus a menraidor alid si-katho, kigwan to i 5“Niyana nat iyaydaho ma dana say may-ap-ap i pilak cha iyangkebitheg? Tep tedon dasos a denariiy balor to.” #12:5 tedon dasos a denarii Say sa-kin denarius, dagbo na sa-kin too na san-akow. Sema tedon dasos a denarii, dagbo na sa-kin tawen. 6Kigwan Judas iwan, nat kagol na kaasi thod iyangkebitheg, no diket mahibot. Tep si-kathoy naengegchi na pilak iren Jesus, et nakiyodangan to ira ma alos. 7Et kigwan Jesus i “Iolay mo ngos Mary. Ikamid to ma dana say osalen ton mengisagana na angel ko para cha kaybekak. 8Gwariy iyangkebitheg na olay cha si-kayo, nem nat chiyayak na olay cha si-kayo.”

9Chakel i Hodjos a iyanki-ngel i gwares Jesus cha Bethany, isonga kimowan ired man. Nem nat si Jesus bengat i piyan chen si-nengen, no diket piyan cha ngon si-nengen si Lazarus a inpanpawil Jesus. 10Isonga, sema aafo na papari, niyemnem cha i bonoen cha ngos Lazarus 11tep kagol cha si-katho, chakel i Hodjos a iyaysi-jan ired ma aafo na papari et emati ired Jesus.

Inchayaw Ches Jesus Nonta Mimothok Cha Jerusalem

(Matthew 21:1-11; Mark 11:1-11; Luke 19:28-40)

12Idi gwa-gwa tho, sema iren chakel a toon ekipiyasta, inki-ngelan cha i manmomothok alis Jesus cha Jerusalem. 13Et engala ira na bolo-bolong a inges toy niyog, et kimowan iren mengaspol cha si-kathon inkeljaw cha i “Hosanna! Mabindisjonan i into-no din Afo Chiyos! Mabindisjonan i Ari na Israel!” 14Et inpa-den Jesus i kilaw a donkey et iyansahayan to. Seman a imag Jesus, etongpal ma iwa iyaysolat cha esel Afo Chiyos a kigwan to i:

15“Si-kayon naiyan-iyan cha Zion, #12:15 Zion i sa-kin ngaran na Jerusalem.

enog i tahot.

Si-neng jo, manmomothok aliy ari yon

mansasahay cha kilaw a donkey.” #12:15 Zechariah 9:9

16Nontan a timpo, sema iren disipolos Jesus, nat igwathan cha nin iya imag Jesus, nem nonta iyanpawil, iyamtaan cha i sema iyaypadto maypangkep Jesus cha esel Afo Chiyos, etongpal tep podnon epasamak cha si-katho.

17Chakel i toon eni-neng na imag Jesus nonta inpanpawil tos Lazarus et tiya-gway ton onbo-day chiwa dohang a iyaybekaan to. Et sema iren too, intolo-toloy chen engichamag na epasamak. 18Isonga, chakel i toon kimowan a mengaspol Jesus tep inki-ngelan chiy maypangkep niwa milagron imag to. 19Isonga, iyantabtabal ira ma Pharisees a kigwan cha i “Si-neng jo, nagwariy silbi na imag tayo. Tep emiin a too, chiyan onora ma too.”

Inpadton Jesus I Ketiy To

20Gwara ngo iriy echom a Greeks a kimowan cha Jerusalem a mekipiyasta. 21Kimowan ired kad-an Philip a i-Bethsaida cha Galilee a kigwan cha i “Afo, pangaasim piyan min mekitebal cha Jesus.” 22Kimowan si Philip a kigwan tos Andrew, et kimowan iren chegwen kigwan ches Jesus. 23Et kigwan Jesus i “Mimothok i timpon si-kak a Anak na Too, maykayangak. 24Sejay a konen kod si-kayo, podnon on-onong i bothil a sa-ki bengat no nat maytenem. Nem no maytenem men singen etiy, et maybebka ket, onsimit et mandawes na chakel. 25Sema toon memateg a chili na biyag to, ma-tiw cha si-katho. Nem sema toon mandingding na biyag tod ja dobong, may-i-kanan na biyag a nagwariy pengingkaan to. 26Sema toon piyan ton mansilbid si-kak, mesepol a onoren toak, tan sema kad-an ko, chiwan ngoy kad-an to. Tan sema mansilbid si-kak, chejawen Awak.”

27Et intoloy Jesus a kigwan to i “Niman, ensahit i nemnem ko. Nengoy konen ko? Konen ko emod Awak i ‘Awa, enog i intolok iya diga-digat a onmothok cha si-kak’? Enchi, nat mebedin tep say kagol a kimowanan ko did ja dobong, say da-kaman kon emiin ira ja digat.” 28Et kigwan Jesus i “Awa, ibiybiy moy kinachiyos mo say mechejaw i ngaran mo.” Biglen gwariy esel a edafo did dangit a kigwan to i “Inbiybiy ko waliy kinachiyos ko babaen cha si-kam, et ibiybiy ko mowan.” 29Sema iren chakel a toon kainakgwat chiwan, inki-ngelan cha ngo ma esel. Kigwan na echom i kimirol, nem sema ngon echom, kigwan cha i “Gwariy anghil a ekitebal cha si-katho.”

30Et kigwan Jesus cha si-kara i “Sema esel a inki-ngelan jo, nat para cha panmaptengan ko, no diket panmaptengan jo say memati kayo. 31Niman i timpon mechosa iriy tood ja dobong. Niman i timpon ma-gwak i naiyantoray niya dobong a si Satanas. 32Nem si-kak, no maykejangak cha koros, iesop ko diy emiin a too say mebedin a memati ired si-kak.” 33Kigwan Jesus iwan say ipaamta thoy pesing ton metiy.

34Sema iren chakel a too, insongbat cha i “Kigwan tod dinteg tayo i manbiyag i Cristo na ingked ingka. Niyana kigwan mo i mesepol a maykayang cha koros i Anak na Too? Siya ma Anak na Too?” 35Et kigwan Jesus cha si-kara i “Si-kak a may-arig cha silow, gwaraak pay nin cha si-kayo na kemtang bengat. Itolo-toloy jon man-ahad cha kawad-an na silow iy maramen gwara pay i silow cha si-kayo; nahol ni mebolingetan kayo. Tep sema toon naiyan-ahad cha kawad-an na enbolinget, nat amta tho no toy konan to i. 36Isonga, si-kak a silow, pemati kayod si-kak niman iy gwaraak pay cha si-kayo say manbalin kayo na anak na silow.” Idi kigwan Jesus iwan, bintihan to ira ma too, et nat amta ra no toy kimowanan to i.

Nat Emati Ira Ma Hodjos

37Angken chakel i imag Jesus a milagron sini-neng na too, eg pay ira ematid si-katho. 38Epasamak iwan say metongpal i inpadton Isaiah a profita nontan da. Tep kigwan to i:

“Afo, singen nagwariy emati na kigwan mi.

Singen nagwariy engawat na panakabalin mon inbiybiy mo.” #12:38 Isaiah 53:1

39Isonga, nat mebedin a memati ira ma too tep podno ma insolat Isaiah a kigwan to i:

40“Kiyorab Afo Chiyos ira tan inpabolinget toy

nemnem cha,

say nat mahasi-neng tan mahaawat koma ira.

Tep no egwathan cha wa, on-oli ched si-kak

say pemapteng ko ira, nem eg cha piyan.” #12:40 Isaiah 6:10

41Kigwan Isaiah iwan tep sini-neng toy kinachiyos Jesus nontan da, isonga kigwan toy maypangkep cha si-katho.

42Nem angken seman, chakel i naengibalnay na Hodjos a ematid Jesus. Nem nat inpaamta ra i emati ira wa tep entahot chiy Pharisees a kigwan cha i no gwariy naematid Jesus, nat maytolok a onsekep cha synagog. 43Tep sema iren naengibalnay a nat engipaamta na pamati red Jesus, mas piyategan chiy chayaw na too iy say apolbar Afo Chiyos.

44Et kimeljaw si Jesus a kigwan to i “Sema toon naematid si-kak, nat si-kak bengat i pematian to, no diket si Afo Chiyos ngon engito-no did si-kak. 45Et sema eni-neng cha si-kak, sini-neng to ngo ma engito-nod si-kak. 46Si-kak a may-arig cha silow, kimowanak chiya dobong say sema toon mematid si-kak, nat ontoloy a man-iyan cha kawad-an na enbolinget. 47Sema toon mengi-ngel na konen ko, nem eg to a-magen, nat si-kak i mengowis cha si-katho. Tep nat kimowanak alin mengowis na tood ja dobong, no diket kimowanak alin mengisalakan cha si-kara. 48Nem sema manbebneg cha si-kak tan nat a-magen toy konen ko, gwariy mengowis alid si-katho. Tep sema kigwa-kigwan kon nat piyan ton patien, seman i mengowis cha si-katho no kaonoran a akow. 49Tep nagwariy kigwan kon edafod nemnem kon mismo, no diket si Awak a engito-nod si-kak, si-kathoy engibilin cha si-kak na konen ko tan pesing kon mengowan. 50Tan amtak ngo i sema nakigwan to, si-kathoy naedafoan na biyag a nagwariy pengingkaan to. Isonga, sema kigwa-kigwan ko, si-katho ma inbilin Awak cha si-kak a konen ko.”

Currently Selected:

John 12: KAR

Highlight

Copy